Klêi kơ’nâi pêi pro roh tơplâ mơdât mâu ngế xôi roh Têt 2025, khu cheăng a tơring Đức Cơ, kong pơlê Gia Lai hiăng châ hlo 2 roh, rup 4 ngế pơto 220 kilô mlŏi reăng. Trung tă Nguyễn Lê Hồ Tân Ảnh, Đô̆i trương Đô̆i  Kán sát séa ngăn tơplâ mơdât mâu ngế ‘na Xôi kân – Cheăng kâ – Ma tŭi (Kŏng an tơring Đức Cơ) tối ăm ‘nâi:

‘’Ki hên cho mlŏi rôe ôh tá tro luât ing kong têa Kul djâ a Việt Nam. Troăng rôe dêi mâu ngế ki kố cho rôe ing troăng măng pơlê pơla klêi mê tê. Mâu ngế ki kố klêi rôe vâi tâ mlŏi tung mâu kơxâk lơ tâ a mâu rơxế ô tô, rơxế ki pơto tơmối, kơtôa tung rơxế vâ pơto. Ki hên châ ‘nâi tơdroăng kố cho ing kuăn pơlê tơbleăng châ tơƀrê. Tơrŭm ƀă mâu khu cheăng, kơvâ cheăng, đoân theh, mô đô̆i gâk tơkăng kong, khu xo hnoăng mơhá liăn tơmeăm ki rôe ing kong têa ê vâ ‘nâi tơdroăng mâu ngế ki ai pơto, tê mơdró, ‘măn mlŏi reăng vâ ti tăng rup’’.

Tung lâp kơpong tơkăng kong Gia Lai, khu cheăng dế tơrŭm krá tơniăn lâp pơlê pơla, mơdât mâu tơdroăng pro xôi luât.

Đăi tă Nguyễn Văn Nghị, Phŏ Chính ủy Khu xiâm pơkuâ Mô đô̆i gâk tơkăng kong kong pơlê Gia Lai, tối ăm ‘nâi, khu gâk kring tơkăng kong ƀă kŏng an mâu tơring tơkăng kong Đức Cơ, Chư Prông, Ia Grai, hiăng rup lối 1.000 kilô mlŏi reăng.

‘’Tung mâu hơnăm hiăng hluâ, kơpong tơkăng kong dêi kong pơlê Gia Lai ai tơdroăng tê mơdró mlŏi ôh tá tro luât, tung mâu khế achê têt, Mô đô̆i gâk tơkăng kong Gia Lai hiăng pêi pro pơkâ mơdât, hbrâ mơdât mâu tơdroăng tê mơdró ôh tá tro luât, tê mơdró liu. Tung pơla kố nah châ kuăn pơlê tŏng gum xua mê khu cheăng hiăng rup châ mâu roh tê mơdró mlŏi ôh tá tro luât. Ngin mơdât mâu tơdroăng kố vâ kơpong tơkăng kong dêi kong pơlê Gia Lai tơniăn lĕm.’’