A pơlê kong kân Hồ Chí Minh, pôa Tô Lâm, Kăn xiâm pơkuâ hnê ngăn Đảng Kŏng san Việt Nam hiăng ai roh trâm mâ ƀă Kăn xiâm hnê ngăn Đảng Nhân yân kong têa Kul, Kăn xiâm hnê ngăn Kuô̆k hô̆i râ má môi Kul – pôa Hun Sen, ƀă Kăn xiâm pơkuâ hnê ngăn Đảng Kăch măng Lếo, Kăn xiâm hnê ngăn kong têa Lếo – pôa Thongloun Sisoulith.

A roh trâm mâ, tung pơla kơpong ƀă lâp plâi tơnêi ai hên tơdroăng ôh tá tơniăn, ôh tá ‘nâi tối hdrối, pái pâ môi tuăn pơtối pêi trâu hơhngế, tâi tâng ƀă po rơdâ tâ nếo tơrŭm cheăng pơla pái Đảng, pái tơnêi têa, thăm krá tơniăn kal kí ƀă tơrŭm pơla mâu kăn pơkuâ râ xiâm; tơkêa rak ƀă mơnhông khôi túa tơrŭm môi tuăn pơla pái kong têa, ngăn kố cho tơmeăm ki kơnía, cho pơkâ ki thế tiah mê ôh tá tơdjâk pa kong ƀă tơdroăng tơniăn hơniâp lĕm, gâk kring ƀă mơnhông dêi rêm tơnêi têa; môi tuăn rak ƀă thăm pêi pro tâ mê nếo tung pơtâng tối, hnê hriâm vâ mâu rơxông kuăn pơlê pái tơnêi têa, ki má lối cho rơxông ối nếo, hlê plĕng nhên ƀă đi đo pâ vế khôi túa tơrŭm môi tuăn ƀă tơrŭm kố.

Pái kăn xiâm pơkuâ môi tuăn mơnhông châ tơƀrê tơrŭm cheăng dâi lĕm, hôm khât, păng ‘nâng, xua ing tơdroăng pơxúa dêi rêm tơnêi têa ƀă pơxúa tơdjuôm dêi kuăn pơlê pái tơnêi têa, xua hơniâp lĕm, rak tơniăn, tơrŭm ƀă mơnhông a kơpong ƀă lâp plâi tơnêi.