A rôh pêi cheăng, Thươ̆ng tươ̆ng Đỗ Xuân Tụng pơkâ thế tung la ngiâ, Khu pơkuâ ngăn lêng kong pơlê Dak Lak kal pơtối hbrâ tăng ‘nâi plĕng mâu tơdroăng tung kong pơlê, tơbleăng pêi tơdâng mâu troăng hơlâ tơdroăng cheăng ‘na tíu tơkăng kong; mơdêk tơplâ hbrâ mơdât mâu ki ai xôi a kơpong tơkăng kăng; tơrŭm krá ƀă mâu lêng ki tơdjâk troh ƀă mâu ngế kring vế tíu tơkăng kong dêi Kul tung rak ngăn, kring vế tíu tơkăng kong tơnêi têa.  

Thươ̆ng tươ̆ng Đỗ Xuân Tụng xuân tối pơchân tíu pêi cheăng  tơmâng pro tơniăn  tung pơla ai tơdroăng kal, malối cho rôh tâ phĭu rah xo kăn Kuô̆k hô̆i hneăng 16 ƀă mâu kăn Hô̆i đong kuăn pơlê péa râ hneăng 2026–2031; pơtối tơbleăng mâu tơdroăng pêi pro, túa pêi cheăng gum kuăn pơlê mơnhông cheăng kâ - rêh ối; pro tro tơdroăng  hbrâ tơplâ, tơkŭm po ăm mố đô̆i ƀă kuăn pơlê tơdah Têt lo hơnăm nếo tơniăn, ‘nâi kơdĭng, môi tuăn, ‘nâi hơ-ui pâ dêi rơpó.