Prôk to plong vo ƀă kŏng a rơgâ têa Bàu Đá, kô châ hlo nhâ tung kơdâm têa rơngiâp. Mâu nhâ, ngo loăng, hmốu lo a ngâ, ƀă mâu nhâ huăn  tung têa xú lĕm plâ hâi rơnó mơdrăng, thăm pro kong kế Bàu Đá thăm  pro vâi hâk vâ. Hiăng luâ 70 hơnăm pôa Đào Kim Thông ối a thôn Mỹ Điền, cheăm Hòa Thịnh hiăng hmâ ƀă kơpong kong lân têa sap ing ối kŭn ƀă xuân hiăng tơkâ hluâ mâu hơnăm khế tơplâ xâ râ ó. Cho kơpong kong têa lân Bàu Đá kô hiăng tât ăm kuăn pơlê ƀă păn rêh Kăch măng vâ pro chiâng tơdroăng xông tơplâ xâ Hòa Thịnh hơnăm 1960.

‘’Kăch măng ƀă kuăn pơlê akố cho rơxông kơtâu xua tơplâ... to plong pro mâu rơpăm a mâu xiâm loăng ki kân mê, ối pơtê amê. Hlo tơƀai cho mot tung xiâm loăng hmuâ. Rơtế dêi pó xông tơplâ troh hơnăm 63, 64 pơtối tơplâ lêng kong têa ê, á kơtâu mot akố, mot a ngo hmuâ tung klôh mê’’.

Khế 7 ƀă Khế 8, reăng sen, reăng súng a Bàu Đá Hòa Thịnh xuân ối rơdêi. Mơngiơk khêi, mơngiơk rơbông, mơngiơk prâp dêi mâu reăng a rơgâ têa rơtế mơhno dêi ki lĕm ƀă reăng loăng tơmong, reăng loă trốu ing a ‘ngêi... rế pik tơ’nôm ăm um méa kong ki têa lân Bàu Đá rế lĕm, pro vâi hâk vâ. Ƀă kuăn pơlê a pơlê, Bàu Đá rế cho kong kế ki lĕm má môi, rế cho kơpong tơnêi rôh mê nah, xuân cho tíu hên tơmeăm plâi kâ:

‘’Á hlo ki lĕm a tuâm Bàu Đá kô cho ai to, klêi mê ká, chêm, ká, klêi mê loăng bần, klêi mê reăng sen, súng...Ai tŭm tâi tâng. Tung kố ôm hyô cho lĕm, sap ing khế 12 troh khế 9, khế 10 yương lĭch cho lĕm má môi’’.

Plâ hên hơnăm hdrối mê hía nah, kuăn pơlê Thôn Mỹ Điền, tối krê ƀă mâu thôn, mâu cheăm ki achê kơnôm ai hên ká xi xŏng dêi kơpong kong têa lân kố. Ôh tá xê to tiah mê, ƀă kong kế lĕm, rơtế ƀă hên nhâ loăng, kong kế, kơpong kong têa lân Bàu Đá Hòa Thịnh dế trâm rôh tơ’lêi mơnhông ôm hyô kong kế, nhâ loăng. Pôa Phương Văn Lành, Kăn pơkuâ Đảng ủi cheăm Hòa Thịnh tối ăm ‘nâi, thôn mơnhên la ngiâ mơnhông kong têa lân Bàu Đá chiâng tíu ôm hyô pơlê pơla ƀă rak vế loăng pơlái kong kế:

‘’Cheăm hiăng tơkŭm po mơnúa tour châ tâ ôm hyô Bàu Đá. La ngiâ kô mơjiâng tơdroăng tơkêa bro mơnhông ôm hyô pơlê pơla tiô troăng mơjiâng khu tơrŭm cheăng pơlê pơla, ƀă mâu kuăn pơlê a pơlê Mỹ Điền kố cho mâu ngế tơdrêng veăng pêi ôm hyô. Vâi kô vo plong djâ tơmối lăm ngăn kong ki lân têa Bàu Đá, ƀă kô cho mâu ngế ki hnê mơhno tơbleăng kong kế, tơdroăng ki mơnhông rơtế kong kế lĕm dêi tuân têa lân Bàu Đá kố’’.

Hòa Thịnh - tíu nah cho kơpong ‘’hmâ tro têa lân lu’’ pá puât kố dế mơ-eăm vâ pơhlêh rơdêi păng ‘nâng. Tơdroăng mơdriu tơmeăm ki ai vâ mơnhông ôm hyô a tuâm Bàu Đá ôh tá xê to po troăng pêi cheăng nếo, mơdêk tơdroăng rêh ối ăm kuăn pơlê, mê ối cho khoă mêa rak vế tâi tâng ki lĕm tiah apoăng dêi kong kế.