VOV4.Xơ Đăng - Khu xiâm ngăn pơkeăng ƀă khăm pơlât tiô tối hdrối kô hbru ‘’Hlá mơ-éa vaccine’’ pơxiâm sap ing hâi lơ 15/4 la ngiâ vâ kuăn pơlê tơ’lêi hlâu drêng lăm ngi kong têa ê. Mê cho tơdroăng ăm ‘nâi châ mơ’no tối a Rôh hôp ‘no tơdrêng ing troăng hyôh Internet xua Khu xiâm ngăn pơkeăng ƀă khăm pơlât ‘na hnê mơhno tơbleăng hbru Hlá mơ-éa vaccine ƀă séa ngăn tơdroăng ki ‘mot tơ’nôm, mơnhên tơdroăng ki pâk vaccine COVID-19.

Riân troh hâi lơ 1/4 lâp tơnêi têa hiăng pâk châ lối 200 rơtuh klŏng vaccine hbrâ mơdât COVID-19. Kơxô̆ châ pâk vaccine ăm ngế sap ing 18 hơnăm tơngi klêng trum má 1 hiăng tâi tâng, trum má 2 ai 99%, ƀă kơxô̆ ngế hiăng pâk trum má 3 châ dâng 50%. Ƀă mâu ngế sap ing 12 troh 17 hơnăm, kơxô̆ ngế pâk trum má 1 ai 99% ƀă trum má 2 ai 94%.

Khu xiâm ngăn pơkeăng ƀă khăm pơlât ƀă mâu kong pơlê xuân dế hbrâ vâ pâk vaccine hbrâ mơdât COVID-19 ăm vâi hdrêng sap ing 5 troh 12 hơnăm. Dế nôkố, mâu tíu khăm pơlât ki pâk vaccine tung lâp tơnêi dế hbrâ mâu tơdroăng ki kal vâ Khu xiâm ngăn pơkeăng ƀă khăm pơlât hbru ‘’Hlá mơ-éa hiăng pâk vaccine’’ ăm kuăn pơlê tiô tối hdrối pơxiâm sap ing hâi lơ 15/4 la ngiâ.

Hlá mơ-eá hiăng pâk vaccine kô châ mơ’no a ứng dụng Sổ Sức khỏe điê̆n tưh, PC-COVID lơ tí tăng a Cổng thông tin điê̆n tưh dêi Khu xiâm ngăn pơkeăng ƀă khăm pơlât.