Hbrâ mot hơnăm hriâm nếo, 25 ngế hok tro lâm 1A, Hngêi trung râ má môi ƀă má péa Nguyễn Văn Trỗi, cheăm Ia Mơ, kong pơlê Gia Lai xâp dêi hmân ếo nếo. Oh tá kơdrâ môi tiah hâi apoăng hơnăm hriâm, xua sap ing mơ’nui khế 8, mâu vâi o hiăng châ cô yăo Hà Thị Hậu tơdah djâ lăm troh a hngêi trung vâ hmâ ƀă tơdroăng hriâm a hngêi trung. Sap ing tơdroăng mơhno ăm tơniăn tíu ‘nân, ngăn hlá mơ-éa hriâm, hlá mơ-éa chêh, tơmeăm xúa tung hriâm troh hmân ếo xâp bô bối ếo bông hmân drêh, mâu vâi o chôa hmâ ƀă tơdroăng hriâm a hngêi trung nếo. Ƀă mâu hok tro ki ối hơngế, cô Hậu ối mơ-eăm lăm troh a hngêi vâ mơhnhôk thế vâi o lăm hriâm.  Cô yăo Hà Thị Hậu ăm ‘nâi:

“A kố, cô pơtâp ăm vâi muăn ‘nâi koh hmât, prôk tâng ti lâi, rak vế luât pơkâ dêi lâm, mâu tơdroăng ki topwui ƀă kŏng cho vâ pro hdró, tơdroăng pơkâ. Pơtih, cô bú mơhno um tơvó mâu vâi muăn hiăng chiâng kuâ kŏng a kơƀăng; klêi mê tối pơchân ăm nôu pâ mâu vâi muăn rôe hlá mơ-éa hriâm, hbrâ rơnáu hmân ếo xâp... Nếo pơxiâm mot hriâm lâm 1 mâu vâi muăn ối kơdrâ hâi ‘nâi hlê ki klâi hên”.

Tung pơla hok tro apoăng râ dế hâk ro lăm troh hngêi trung, mâu thái cô ƀă nôu pâ a Hngêi trung má pái ƀă râ má péa Nguyễn Văn Trỗi hiăng hbrâ ăm vâi o mot hơnăm hriâm nếo tơniăn tro má môi. Nâ Phạm Thị Hương, ngế nôu dêi hok tro ối a pơlê Klăh, cheăm Ia Mơ, kong pơlê Gia Lai tối:

“A hbrâ hlá mơ-éa hriâm, hlá mơ-éa chêh, loăng chêh, hmân ếo đồng phục cho hmân drêh ếo bông; tơniăn tuăn tơmiât klêi pơtê hriâm, ngăn dêi chôu pơtê, tơdroăng hriâm vâ ăm dêi mâu kuăn vêh lăm hriâm a hngêi trung‘nâi hlê tâ; pâk pơkeăng mơdât pơreăng”.

A rơlố Nhơn Châu, Hngêi trung râ mâ má môi ƀă Hngêi trung râ má péa Nhơn Châu hơnăm hriâm kố tơdah 207 ngế hok tro, mê ai 9 to lâm hriâm. Cô Hồ Thị Lại - Phŏ Pơkuâ hngêi trung ăm ‘nâi, hngêi trung ai 19 ngế kăn ƀô̆, thái cô, mâu ngế pêi cheăng tung mê. Hngêi trung  mơjiâng pro, ai tơmeăm tro tiô pơkâ hnê, la tơdroăng rêh ối dêi thái cô a chuăn hơngế hngo kố ối xơpá hên, troăng prôk pá puât, malối a rơnó mêi khía. Vâ mơhnhôk, Hngêi trung hiăng pro hngêi ăm thái cô kâ ối pơtân, kum thái cô hmiân tuăn hnê khât ƀă hnoăng cheăng pro thái cô.

Hdrối mê, hngêi trung ối tơrŭm ƀă mâu khu tơrŭm cheăng pơlê pơla, veăng kum iâ hlá mơ-éa hriâm ƀă hlá mơ-éa chêh ăm hok tro, veăng ‘no hnoăng kơdroh pá puât ăm nôu pâ ki ối a chuăn hơngế hơngo.

“Ƀă tơdroăng rêh ối a chuăn trâm hên xơpá, kơxop hlá mơ-éa hriâm tiô tơdroăng hnê ki nếo kơnâ liăn rôe. Nôu pâ trâm hên pá puât xuân rơbok. ‘Nâi tơdroăng mê, hngêi trung xuân mơhnhôk pơlê pơla veăng tơlo. Nôkố hiăng mơhnhôk rôe hlá mơ-éa hriâm ki nếo vâ ăm mâu vâi o, vâi muăn hriâm lâm 6  troh lâm 9 ăm vâi ai tŭm hlá mơ-éa hriâm tung hơnăm nếo”.

Pôa Phạm Văn Nam - Ngế pơkuâ ngăn hnê hriâm ƀă hnê mơjiâng tuăn ngôa rơkê kong pơlê Gia Lai ăm ‘nâi, klêi tơ’mot, lâp tung kong pơlê nôkố ai 1.396 hngêi trung hnê lối 33.000 ngế thái cô. Mơhé, mot hơnăm hriâm 2025-2026, kơvâ hnê hriâm xuân ối kal ai 3.532 ngế thái cô ƀă mơngế pêi cheăng tung hngêi trung tâng vâ pơchông ƀă kơxô̆ ki pơkâ, kơlo ki ăm. Ôh tá xê to ôh tá ai tŭm ‘na mơngế hnê, hngêi trung hriâm a hên tíu, malối a kơpong tơkăng kong ƀă chuăn, xuân hâi ai tiô pơkâ hnê ƀă hriâm. Nếo achê kố, Khu xiâm ngăn hnê hriâm ƀă hnê mơjiâng tuăn ngôa rơkê hiăng séa ngăn a 7 to cheăm tơkăng kong peăng mâ hâi Lu ƀă pâ thế mơjiâng pro Hngêi trung phôh thong hnê ai tíu kâ koi ối pơtê troh râ kơpêng tâi tâng kơxô̆ liăn ‘no mơjiâng pro lối 1.200 rơtal liăn.

Mâu tơmeăm khoăng pro kô hbrâ tơdâng ing lâm hriâm, tíu ăm ối, hngêi pêi pơchên kế kâ, plông xah hêi a troh hngêi pơkeăng a hngêi trung, vâ ai tíu ối, tíu xah hêi tíu pơlât ăm lối 9.400 ngế hok tro, tơdế cho mâu kuăn ngo. Tiô tối hdrối, mâu tơdroăng tơkêa bro kô pơxiâm pro tung hơnăm 2025 ƀă kô xúa sap hơnăm 2026-2027. Kố cho tơdroăng ki kal kum mơdêk hnê hriâm a mâu kơpong xơpá.

Vâ teăm ai tiô tơdroăng kal vâ tung hơnăm hriâm nếo, Khu Tí tăng nâi plĕng dêi Vi ƀan kuăn pơlê dêi kong pơlê Gia Lai mơjiâng pơkâ rah xo, tơ’nôm tŭm kơxô̆ thái cô hnê a mâu môn ki hâi tŭm, malối a mâu môn hriâm ki nếo tiô Tơdroăng hnê hriâm phôh thong hơnăm 2018.

"Khu ngăn hnê hriăm tăng nâi plěng ăm kong pơlê mơjiâng pơkâ rah xo tŭm 1.428 ngế thái cô; tơmâng khât ‘na thái cô nếo hnê môn ki nếo dêi Tơdroăng pơkâ hnê hriâm râ má pái phôh thong hơnăm 2018, Tơdroăng hnê mê ai hnê 2 rôh tung môi hâi, Tơdroăng hnê tơ’nôm mầm non ăm vâi hdrêng 3-5 hơnăm, mơjiâng pơkâ pơ’lêh, xing xoăng ăm mâu thái cô hnê a tíu rơlối lăm hnê a tíu ki ôh tá tŭm, vâ kơdroh tơdroăng tíu ki 'nâ rơlối- tíu 'nâ ôh tá tŭm a tơrêm  kơpong, cheăm, kong pơlê’’.

Ƀă tơdroăng veăng ‘no hnoăng dêi hngêi trung, mâu kăn ƀă mâu nôu pâ, hok tro a kơpong tíu tơkăng kong, a chuăn dêi kong pơlê Gia Lai xuân ối hên xơpá la xuân tơnôu mot tung hơnăm hriâm nếo phiu ro. sôk suâ.