Leh tơbleăng drôu xiâm dêi mơngế M'Nông a long Lăk po tung péa hâi lơ 29 ƀă 30/8. Tơdroăng po leh kố xua cheăm Liên Sơn Lăk tơkŭm po, ai 10 tơdroăng po ƀă dó inâi "Pló pôu kơpong kân rơdâ  -  Mơhúa M’Nông a kĭng long Lak". Ki má môi cho Rôh tơ'noăng Pơtáu drôu xiâm; mơđah tơbleăng tơdroăng pro tơmeăm meăn ƀă tơnêi hneăn dêi mơngế M’Nông; troăng pro pló ƀă mơduôm drô xiâm; mâu tơdroăng xah hêi tiô khôi vâi krâ nah; ăm rui prôk lăm, vo plong loăng ƀă tíu mơđah tơbleăng, tơbleăng mâu tơmeăm, khôi túa lĕm tro dêi pơlê ƀă hía hé...

Tơdroăng tơkŭm po vâ pơ-ôu pơ-eăng, rak vế ƀă mơnhông mâu ki kơnâ khôi túa lĕm tro dêi kuăn pơlê mơngế M’Nông, tơdrêng amê tơbleăng um méa, kuăn mơngế, khôi túa lĕm tro, tơmeăm ki phá tơ-ê má môi ƀă tơmeăm ôm hyô dêi cheăm. Pôa Nguyễn Anh Tú, Kăn hnê ngăn Vi ƀan kuăn pơlê cheăm Liên Sơn Lắk, tối ăm ‘nâi, cheăm pói tơngah leh tơbleăng kô gum djâ um méa kơpong tơnêi, kuăn mơngế M’Nông a kĭng long Lăk troh achê tâ ƀă tơmối ôm hyô tung tơnêi têa ƀă lâp plâi tơnêi.

“Troh lâp lu tơdroăng ‘na leh tơbleăng troh kuăn pơlê tung kong pơlê, lâp tơnêi ƀă lâp plâi tơnêi. Ing mê, gum mơđah tơbleăng um méa cheăm Liên Sơn Lắk - cheăm ối tung pơkâ pêi mơnhông ôm hyô dêi kong pơlê Dak Lak ƀă tơnêi têa; tơdrêng amê kơbông krếo khu tê mơdró tơmâng, rơtế prôk, mơ’no liăn cheăng, gum mơdêk ôm hyô pơlê mơnhông mơdêk’’.

Ƀă a tíu xiâm cheăm Ea Knuếc, idrâp chêng koăng, rơkong tơpui sôk ro pơla mâu tíu chôu ‘măn tơbleăng plâi sầu riêng, tơmeăm OCOP ƀă mâu tơdroăng mơhno rơhdruê xuăng, kế kâ. Hâi xah hêi ro hiăng djâ tơmeăm troh achê tâ ƀă tơmối ôm hyô, po troăng vâ pơlê pơla hơ’muăn ‘na kơpong pêt, ‘na tăng cheăng pêi ƀă khôi túa lĕm tro dêi tơná.

Tíu ki má môi dêi tơdroăng cho tơdroăng po mơdĭng tơdah “Ngế droh kăn sầu riêng’’ ing xiâm loăng ki hiăng ton hơnăm troh a kơpong leh. Tung idrâp chêng koăng, mâu vâi droh pôu pong rơtế péa to rui chiâng khu ki tơdah pêng păm mơngiơk Tây Nguyên. Tơdroăng po mơdĭng pâ rơnó châ phâi hơtô ai tŭm tơmeăm dêi kuăn pơlê mơngế Rơđế xuân châ vêh po, pơtroh tơdroăng pói vâ rơnó pêi lo châ tơ’lêi, plâi sầu riêng châ hên, châ yă, pơlê châ phâi hơtô. Pôa Y Feel Knul, kuăn pơlê ƀuôn Tara, cheăm Ea Knuếc tối ăm ‘nâi, leh tơbleăng djâ troh tơdroăng phiu ro ƀă pói vâ ăm mơngế pêt plâi sầu riêng.

“Kố xuân cho rôh mơđah tơbleăng khôi túa lĕm tro mâu hdrông kuăn ngo kơpong tơnêi kố troh pú hmâ, tơmối. Cho môi ngế kuăn pơlê pêt plâi sầu riêng, á pói vâ tơmeăm pêi lo ing chiâk deăng rế ai yă tơniăn tâ vâ kuăn pơlê kơdroh tơbrêi tơbrêh’’.

Tung tơdroăng po pêi cheăng “Ea Knuếc mot tung rơnó” ối ai rôh tơ’lêi kơchơ mơdró, mơđah tơbleăng OCOP, tơmeăm pêi lo ing chiâk deăng, kơchâi kâ, lăm ngăn kơdrum ƀă livestream mơđah tơbleăng sầu riêng tung mâu trang măng pơlê pơla. Ing mê, tơdroăng po Leh tơbleăng sầu riêng Dak Lak châ troh lâp lu troh kơpong pêt mơjiâng, djâ tơmối ƀă kơchơ mơdró troh achê tâ ƀă mơngế pêt.

A leh pơxiâm po, cheăm Ea Knuếc xuân hiăng tơbleăng inâi khu pú hên “Sầu riêng Ea Knuếc”. Jâ Trần Thị Vân, Phŏ Kăn hnê ngăn Vi ƀan kuăn pơlê cheăm tối ăm ‘nâi, kố cho tơdroăng hâk tơngăm dêi cheăm, tơdrêng amê pro xiâm kối mơnhên inâi, mơdêk ki kơnâ tơmeăm, po rơdâ kơchơ ƀă la ngiâ mơnhông mơdêk krá tơniăn.

“Klêi leh tơbleăng kố, cheăm kô pơtối mơdêk pêi pro pơhlêh pêi cheăng xúa kŏng ngê̆ kơxô̆, mơđah tơbleăng tơmeăm sầu riêng tung mâu tíu tê mơdró điê̆n tưh. Ing kố inâi tơmeăm dêi cheăm châ mơnhên ƀă kuăn pơlê pêi chiâk deăng sôk ro pêt mơjiâng tơniăn dâi lĕm, mơnhông pêt sầu riêng tiô troăng krá tơniăn’’.

Cheăm Ea Knuếc nôkố cho môi tung mâu kơpong pêt kân má môi kong pơlê Dak Lak ƀă vâ chê 6.000 ha; tung mê lối 2.800 ha dế châ krí plâi, pêi lo châ lối 70.000 tâ̆n, tâi tâng ki kơnâ dâng 4.000 rơtal liăn. Mơnhên sầu riêng cho loăng plâi ki xiâm, cheăm tơkŭm mơjiâng mah kơxô̆ kơpong pêt, tíu tâ tung kơthung, ti tăng xiâm kối, mơnhông khu tơrŭm cheăng ƀă tơdjêp pêt mơjiâng rak ngăn, tê plâi.