VOV4.Xơ Đăng - Kơxo lơ 4/4, a Hà Nội, Đảng ƀô̆ Khô̆i mâu Kơ koan Tơnêi têa po kân krip leh Tơbâ 15 hơnăm Hâi mơjiâng. Hâi lơ 11/4/2007, Khu xiâm pơkuâ tơdroăng kal kí (hneăng 10) hiăng pơkâ mơ’no pơkâ kơxô̆ 47 mơjiâng Đảng ƀô̆ Khô̆i mâu kơ koan Tơnêi têa tung tơdroăng ki tơkŭm 7 đảng ƀô̆ khô̆i mâu kơ koan Tơnêi têa. Sap ing Đảng ƀô̆ châ mơjiâng tung rôh tơplâ dêi rôh tơplâ xâ Pơhlăng pơla tơplâ Việt Bắc ƀă 6 chi ƀô̆ tung mê ai hrĭng ngế đảng viên, troh nôkố, Đảng ƀô̆ Khô̆i hiăng ai 61 đảng ƀô̆ tung tơnêi têa ƀă lối 7,7 rơtuh ngế đảng viên, pêi cheăng a 5.735 cho ƀô̆ tung tơnêi têa ƀă a kong têa ê.

15 hơnăm hdrối nah, Đảng ƀô̆ Khô̆i hiăng mơ-eăm tơkâ luâ hên tơdroăng xơpá, pơloăng mơnúa, pro hơ’lêh tơdroăng ki kal ƀă tơniăn tung tâi tâng mâu hnoăng cheăng. Ƀă túa pơkâ ‘’Tơrŭm – Tơniăn - Tuăn ngoâ rơkê - Kơtăng - Djâ troăng ahdrối’’, tung la ngiâ Đảng ƀô̆ Khô̆i mơnhên khŏm mơ-eăm tơdroăng kal kí mơdêk vâ mơjiâng, mơnhông tung hneăng hơnăm 2020 -2025 cho: Mơjiâng, ‘mâi rơnêu Đảng krúa, rơdêi; mơdêk hiâm mơno tơrŭm, tơniăn, kơtăng, hơ’lêh nếo ƀă mơdêk khât hiâm mơno kăch măng, pôu râng hnoăng cheăng djâ troăng ahdrối dêi kăn ƀô̆, đảng viên.

Katarina Nga tơplôu ƀă tơbleăng