VOV4.Xơ Đăng - Mơ’nui chôu kơxê lơ 17/1, pôa Bùi Văn Cường, kăn xiâm chêh tôm xo rơkong Kuô̆k hô̆i pơkuâ po rôh hôp tơbleăng 4 tơdroăng pơkâ ki châ Kuô̆k hô̆i tơbleăng a hneăng hôp ki ôh tá tiah hmâ rôh má môi, Kuô̆k hô̆i hneăng má 15. Mê cho Tơdroăng pơkâ kơxô̆ 43 ‘na troăng hơlâ liăn ngân tŏng kum Tơdroăng ‘mâi mơnhông ƀă mơdêk cheăng kâ rêh ối pơlê pơla mơ’no tối mâu troăng hơlâ tŏng kum vâ mơdêk ivá hbrâ mơdât pơreăng COVID-19, ‘mâi mơnhông ƀă mơdêk cheăng kâ rêh ối pơlê pơla.

Tơdroăng pơkâ kơxô̆ 44, ‘na troăng hơlâ ‘no liăn Tơdroăng tơkêa mơjiâng pro troăng prôk tơdrăng sap ing peăng kơnhŏng troh peăng hdroh peăng mâ hâi lo hneăng hơnăm 2021 – 2025; Tơdroăng pơkâ kơxô̆ 45 ‘na pơkâ tíu mâu troăng hơlâ, tơdroăng ki kal mơnhông pơlê kong kân Cần Thơ ƀă Tơdroăng pơkâ kơxô̆ 46 ‘na hneăng hôp ôh tá tiah hmâ rôh má môi, Kuô̆k hô̆i hneăng má 15 châ pơkâ pêi pro tơdrêng, hbrâ rơnáu hnê mơhno kơhnâ tơkŭm pêi pro châ tơƀrê Tơdroăng hbrâ mơdât pơreăng COVID-19 (hơnăm 2022 – 2023).

Katarina Nga tơplôu ƀă tơbleăng