A hneăng hôp, mâu kăn teăng mâ hiăng tơmâng tơbleăng pơkâ mơjiâng khu râ kăn séa ngăn, pơtối mê, pôa Phạm Minh Chính, Kăn pơkuâ hnê ngăn Đảng ủy Chin phuh, Ngế pro xiâm hnê ngăn tơnêi têa pơkuâ djâ séa ngăn kơxô̆ 1908 ƀă Kăn pơkuâ hnê ngăn Đảng ủy Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i pơkuâ djâ séa ngăn 1910.

Tơdroăng xiâm séa ngăn tơkŭm a mâu tơdroăng môi tiah: Tơdroăng mơgêi Pơkâ kơxô̆ 18, hâi lơ 25/10/2017 dêi Khu pơkuâ xiâm Đảng hneăng má XII “Mâu tơdroăng ‘na pơtối pơhlêh nếo, rah xo bro lế lĕm tro khu pêi cheăng kal kí, pêi cheăng xêt khât, châ tơƀrê” ƀă Mơgêi kơxô̆ 121, hâi lơ 24/1/2025 dêi Khu pơkuâ xiâm Đảng ‘na mơgêi Pơkâ 18, ƀă tơdroăng mơjiâng ƀă pêi cheăng dêi mâu Đảng ƀô̆ nếo.

Xông tơpui a Hneăng hôp, pôa Phạm Minh Chính, Ngế pro xiâm hnê ngăn Chin phuh tối ăm ‘nâi, vâ pêi pro hnê mơhno kố, Khu hnê mơhno má môi Đảng ủy Chin phuh xuân hiăng pơkâ séa ngăn hdrối. Ing mê, Đảng ủy mâu kơ koan dêi Chin phuh thâ séa ngăn, tơbleăng tâi tâng mâu pơkâ dêi pơkâ séa ngăn, pơtroh ăm mâu ngế pêi cheăng Khu séa ngăn.

Ngế pro xiâm hnê ngăn tơnêi têa pói vâ, mâu Đảng ƀô̆ ối tung Đảng ủy Kuô̆k hô̆i, Đảng ủy Chin phuh pêi pro rĕng, dâi lĕm, châ tơƀrê, tro pơkâ.