Tiô Pơkâ dêi kăn xiâm hnê ngăn tơnêi têa ‘na ăm lo ing hngêi phâk hdrối tâ hâi khế pơkâ hơnăm 2025, mâu ngế ki châ ăm lo hdrối tâ hâi khế pơkâ hơnăm 2025 cho: ngế ki kroăng phâk ai hâi khế, ngế ki pơkâ thế ối tung hngêi phâk troh tá ah hiăng châ kơdroh chiâng ối tung hngêi phâk ai hâi khế pơkâ, ngế ki dế châ thế pơtê pêi pro tơdroăng ki kroăng phâk.

Tơpui a rôh po tơdroăng, pôa Phạm Thanh Hà, Phŏ Kăn hnê ngăn Ƀơrô cheăng Kăn xiâm hnê ngăn tơnêi têa tối rơdêi, sap ing hơnăm 2009 nah troh nôkố, Tơnêi têa hiăng ăm 10 rôh ăm lo hdrối tâ hâi khế pơkâ drêng ai rôh po tơdroăng kal dêi tơnêi têa, ăm lo hdrối tâ hâi khế pơkâ ƀă vâ chê 100 rơpâu ngế ki kroăng phâk xua tung pơla ối phâk, pêi cheăng, hriâm tâp lĕm tro vêh ƀă pơlê pơla.

Tơdroăng ki ăm lo hdrối tâ hâi khế pơkâ hiăng rak tơniăn mâu pơkâ thế kal kí, luât, tơpui kâ, châ kuăn pơlê tung tơnêi têa môi tuăn ƀă kuăn pơlê kong têa ê mơnhên tối khât; pơtối tối rơdêi troăng hơlâ pơkâ lĕm tro dêi Đảng ƀă Tơnêi têa tung mơdêk ƀă rak vế hnoăng kuăn mơngế tiô túa ki tơdâng, ăm tâi tâng rêm ngế kuăn pơlê, tá mâu ngế dế kroăng phâk. Ƀă mâu Pơkâ ăm lo hdrối tâ hâi khế pơkâ dêi Kăn xiâm hnê ngăn tơnêi têa, lối chât rơpâu ngế hiăng châ pơxúa ki ro, vêh dêi ƀă rơpŏng hngêi, hbrâ rơnáu pơxiâm pêi cheăng kâ ăm dêi tơná.