Hôp mê veăng ai mâ lối 100 khu mơdró Việt Nam ƀă Rusi ki pêi cheăng ‘na kơvâ on tơhrik, tê mơdró, ‘no liăn cheăng, ôm hyô, ‘na tơƀai ƀă ‘na kŏng ngê̆. Môi tung mâu tíu vâ tối ki kal dêi tơdroăng Leh pơcháu mâu hlá mơ-éa tơrŭm cheăng pơla khu mơdró péa  tơnêi têa ai hlo ƀă mâ dêi pôa Lê Minh Hưng ƀă mâu kăn xiâm dêi péa pâ.

Ki vâ tối cho mâu hlá mơ-éa pơkâ dêi khu pơkuâ tơrŭm cheăng tung tơdroăng têa châu pơla PetroVietnam ƀă Zarubezhneft, hlối tơbleăng hên hlá mơ-éa chôu pâ tơrŭm pêi cheăng tung mâu tơdroăng tê rôe têa châu, ‘na on tơhrik, khoa hok kong ngê̆, pro tơmeăm khoăng, pơ’lêh pêi cheăng chêh ngăn tung măng, ‘na khăm pơlât, ôm hyô ƀă ‘no liăn pêi cheăng pro tơmeăm khoăng.

Mâu tơdroăng tơhrâ châ tơpui a rôh hôp peăng ki po rơdâ tơrŭm pêi cheăng kâ pơla Việt Nam ƀă Rusi; pro xiâm vâ po rơdâ mâu tơdroăng tơkêa pro nhên, ai pơxúa khât ăm khu mơdró ƀă tơdroăng cheăng kâ dêi péa tơnêi têa tung la ngiâ.