Mâu hâi apoăng rơnó hơngui Ất Tỵ, hngêi kơmăi dêi Kŏng ti pêi cheăng tiô rơnó Pơchoh chêp ếo pơtâk Able Joy ƀă 4.500 kŏng nhân a kơpong hngêi kơmăi Hòa Phú (Dak Lak) hiăng pêi cheăng tâi ivá. Pôa Trần Trí Vĩ, Kăn pơkuâ Kŏng ti, tối ăm ‘nâi, khu tê mơdró tối hdrối rah xo tơ’nôm 1.000 kŏng nhân vâ tơniăn pêi cheăng tŭm 7 rơtuh tơmeăm hiăng kĭ tiô mâu tơkêa:

‘’Troh nôkố mê tơmeăm kŏng ti 2025 hiăng pêng tâi tâng. Xuân pói vâ Dak Lak ối tíu nếo vâ po rơdâ tơ’nôm nếo vâ mơnhông. Mơnhên tơdroăng kố Dak Lak ‘na ki dâi lĕm ƀă kuăn mơngế hên’’.

Môi tơdroăng ăm hlo châ tơƀrê ki ê cho kong pơlê Dak Lak hiăng tê há yă châ tơƀrê kơpong hngêi pơkeăng ton (kơxô̆ 2 Mai Hắc Đế) châ xo 568 rơtal liăn. Kơpong tơnêi kố kô châ mơjiâng pro môi tíu xiâm tê mơdró ƀă kơpong hngêi ối ki lĕm má môi, ƀă kơxô̆ liăn mơ’no tung hơnăm 2025 tiô tối hdrối 1.300 rơtal liăn. Kố ôh tá xê to cho roh tơ’lêi mơdêk tơtêk liăn ngân mê ối kum mơdêk hngêi trăng ƀă ki dâi lĕm tơdroăng rêh ối a pơlê kong kơdrâm Ƀuôn Ma Thuột. Pôa Bùi Văn Yên, Kăn pơkuâ Khu pơkuâ liăn ngân kong pơlê Dak Lak, mơnhên:

‘’Pơxiâm ai kơxô̆ liăn châ xo kố cho sôk ro ‘nâng, mơjiâng ăm pin pêi pro xo hnoăng liăn ngân, ki rơhêng vâ tối xo liăn tơnêi dêi hơnăm 2025 kố. Ki kal khu mơ’no liăn cheăng cho môi khu tê mơdró ai ivá rơkê vâi dế thâ pêi pro tơdroăng tơkêa bro kố. Tiô tối hdrối tung pơla 3 hơnăm Tơdroăng tơkêa bro kố kô kêi đeăng, ki rơhêng vâ tối tung hơnăm kố kơxô̆ liăn mơ’no cho kân, gá kum mơdêk tơtêk cheăng kâ dêi kong pơlê’’.

Mơhé ai mâu tơdroăng châ tơƀrê lĕm, laga vâ châ pơkâ tơtêk 8%, kong pơlê Dak Lak thế rĕng tah lôi mâu ‘’tíu kât krá’’ tung tơdroăng pơkuâ. Apoăng cho pơhlêh pơkâ pêi, pơkâ xúa tơnêi, thâ pêi pro pơkâ kong pơlê hiăng châ kĭ; tơleăng mâu tơdroăng ối tơvâ tơdjâk troh tơdroăng pơkuâ, xúa tơnêi ai xiâm kối dêi mâu tơdroăng pêi chiâk deăng gâk ngăn kong. Rơtế amê cho mơdêk tơdroăng mơ’no liăn ngân tơnêi têa.

Tiô pôa Nguyễn Hoài Dương, Kăn pơkuâ Khu pơkuâ ‘na Chiâk deăng ƀă Mơnhông thôn pơlê, kong pơlê kal rĕng pơhlêh pro mâu mơ-éa:

‘’Tơdroăng mơhnhôk mơ’no liăn cheăng, á hlo cho kal, nôkố pin thế pêi pro inhên, tá tung kơpong pêi chiâk deăng, kơvâ uâ mơdiê mê pin lôi cho hên roh tơ’lêi hlâu dêi mâu khu mơ’no liăn cheăng hiăng troh a kố. Vâi pơrá tối tơdroăng pro mơ-éa dêi Dak Lak cho pá puât ‘nâng. Pin thế vêh séa ngăn ƀă thế mơnhên ôh tá xê to Khu pơkuâ Pơkâ pêi mê hnoăng cheăng dêi mâu khu, kơvâ cheăng mâu tơring ki ê thế pêi ki klâi vâ mơhnhôk mơ’no liăn cheăng’’.

Pôa Phạm Ngọc Nghị, Kăn hnê ngăn Vi ƀan kong pơlê Dak Lak tối ăm ‘nâi, vâ châ pơkâ tơtêk 8%, kong pơlê kal pêi pro mâu troăng tơdâng tơ’mô ƀă kơtăng. Ahdrối, pơhlêh pro mơ-éa cho kơjo apoăng. Mơjiâng hngêi trăng cho ki xiâm. Pakĭng mê, mơdêk mơ’no liăn cheăng tiô troăng khu tơrŭm tơnêi têa ngế krê (PPP) cho môi troăng ki kal, mơhnhôk khu râ ing kơpong krê, kơdroh hngăm ăm liăn ngân tơnêi têa, tơdrêng amê mơjiâng hên roh tơ’lêi ƀă cheăng pêi ƀă mơjiâng hngêi trăng.

Rơtế amê, kong pơlê kô mơdêk mơnhông kơvâ uâ mơdiê tơmeăm pêi lo ing chiâk deăng , kơmăi kơmok ki kum, vâ mơdêk ki kơnâ ăm kơvâ pêi chiâk deăng, mơjiâng tơdroăng ki tơtêk krá tơniăn. Tơdrêng amê, mơnhông mâu kơvâ mơdró môi tiah ôm hyô, liăn ngân ƀă hía hé vâ ai hên tơdroăng cheăng kâ. Pôa Phạm Ngọc Nghị tối:

‘’Tơkŭm pơkuâ tơdâng tơ’mô xo hnoăng liăn mơ’no liăn ngân, hbrâ, ƀeăn ƀĕng teăm tơdrêng châ tơƀrê tơniăn mâu tơdâng kân dêi tơdroăng cheăng kâ. Mơdêk tơdroăng ki mơ’no liăn ngân tơnêi têa ƀă pêi pro châ tơƀrê 3 tơdroăng xiâm tơnêi têa; khŏm tơleăng mâu tơdroăng ki ôh tá lĕm tro tung mơ’no liăn cheăng tơnêi têa. Teăm tơdrêng tah lôi pá puât ăm khu tê mơdró mơ’no liăn cheăng; tơkŭm mơ’no liăn pro hngêi trăng kơpong hngêi kơmăi kơmok dêi kong pơlê vâ mơhnhôk mâu khu mơ’no liăn cheăng tung tơnêi têa ƀă kong têa ê’’.

Ƀă khŏm mơ-eăm rơdêi ƀă tơdroăng môi tuăn dêi khu râ kăn pơkuâ ƀă pơlê pơla khu tê mơdró, Dak Lak kô chiâng châ mâu pơkâ tơtêk 8% a hơnăm 2025. Ki kal tâ nếo cho tơdroăng kố kô mơjiâng ăm tơdroăng mơnhông ó rơdêi tung hneăng la ngiâ, vâ Dak Lak châ khât cho tơxâng tíu xiâm cheăng kâ ƀeăn ƀĕng dêi kơpong Tây Nguyên.