A tíu mơjiâng pro Troăng kân sap ing Troăng kân tơnêi têa 40B cheăm Tu Mrông (hdrối nah ối tung tơring Tu Mrông, kong pơlê Kon Tum ton) lăm a thôn 8, cheăm Đăk Pxi (hdrối nah ối tung tơring Đăk Hà, kong pơlê Kon Tum ton), nôkố cho kong pơlê Quảng Ngãi, tơdroăng mơjiâng pro tơkŭm po thâ. Sap ing kơxo má troh kơxê, kơmăi kơmok pêi đi đo, kŏng nhân pêi cheăng tiô chôu kơhâi, chôu kơmăng, pro tơdroăng ki mơjiâng pro troăng phiu ro a mâu hâi apoăng hơnăm nếo.

Troăng kân kố ai tâi tâng kơlo liăn mơ’no 220 rơtal liăn, xúa kơxô̆ liăn ngân Tơnêi têa tŏng gum ƀă liăn ngân kong pơlê, ƀă xŏn lối 8,3 km. Tung mê kơpong 800 met kơpong troăng kân Tơnêi têa 40B châ pro kân, ƀă kơpong troăng ki ê pro nếo tâi tâng. Drêng kêi đeăng, troăng kân kô tơdjêp cheăm Tu Mrông ƀă cheăm Đăk Pxi, gum mơdêk mơnhông cheăng kâ - rêh ối pơlê pơla, tơniăn gâk kring tơnêi têa, kring tơniăn, tơdrêng amê xúa châ tơƀrê tơnêi ƀă mơjiâng mâu kơpong kuăn pơlê rêh ối drô troăng kân.

Troh nôkố, kơxô̆ ki mơjiâng trêi troăng châ dâng 45%; hiăng kêi đeăng ok hmố kŭn lối tơdế troăng dêi Troăng kân tơnêi têa 40B. Khu ki mơjiâng pro mơhnhôk vâ châ 60 kơmăi kơmok rơxế rơtế dâng 80 kŏng nhân, tơkŭm po hên tíu pro tơdrêng môi xôh, pêi pro rơtế mâu tơmeăm chiâng trá troăng, mơjiâng pro klôh mơ’no têa hbrông, pro túa hdrối, pro kế ki tât ƀă mơnât tât.

Pôa Phan Ngọc Duy, Kăn pơkuâ công trương troăng kân Tơnêi têa 40B cheăm Tu Mrông lăm thôn 8, cheăm Đăk Pxi, kong pơlê Quảng Ngãi tối ăm ‘nâi, tíu pêi cheăng dế pro dâng 10 tíu pro, kơjo mâu troăng tơkoh ƀă troăng ki xiâm Troăng kân Tơnêi têa 40B vâ tơniăn tơdroăng prôk lăm dêi kuăn pơlê.

‘’Tiô hơp đong hiăng kĭ, hâi khế pêi pro troăng kân cho 900 hâi. Laga, khu ki mơjiâng pro mơdêk pro rĕng, mơ-eăm kêi đeăng troăng hdrối tâ tâng pơchông ƀă pơkâ. Tíu ki pro ôh tá trâm pá puât, ki hên cho tơdroăng hnê prôk troăng thế tơniăn prôk lăm lĕm vâ kuăn pơlê chiâng vâ prôk tơkâ hluâ tíu ki dế pro, xua troăng kân ki nếo ki hên cho pro tiô troăng ki ton dế xúa’’.

Ƀă a cheăm Đăk Pék, kong pơlê Quảng Ngãi (ối tung tơring Đăk Glei, kong pơlê Kon Tum ton), péa tơdroăng tơkêa bro troăng klông ki xiâm dế châ pêi pro cho Tơdroăng tơkêa bro Troăng kân ing Tíu xiâm pơlê kân Đăk Glei ton troh tíu xiâm cheăm Xốp, tơring Đăk Glei ton (nôkố cho cheăm Xốp, kong pơlê Quảng Ngãi) ƀă Kông 16/5.

Troăng kân ing tíu xiâm pơlê kân Đăk Glei ton troh tíu xiâm cheăm Xốp ai ki xŏn lối 17 km, mơjiâng pro tiô pơkâ troăng klông thôn pơlê râ A, ngiâ troăng kân rơdâ 6,5 met. Troăng kân châ pro ing khế 12/2024 troh khế 12/2026, nôkố châ dâng 10% ki kơnâ hơp đong, nôkố mơ’no liăn lối 86 rơtal liăn, mê cho kông ƀă troăng péa pâ ko kông ƀă tâi tâng xŏn 648 met. Troh nôkố, kơxô̆ troăng ki pro châ lối 75% ki kơnâ hơp đong. Khu ki pro hiăng pơtroh 3 toăng rơxế chiâ, 2 toăng rơxế kơtâk troăng rơtế dâng 20 ngế kŏng nhân tơkŭm pro đi đo.

Mâu tơmeăm ki xiâm dêi kông mê hiăng klêi, nôkố tơkŭm mơjiâng pro troăng djâ ƀă kêi đeăng tơmeăm ki tơ’nôm, mơ-eăm tôh ƀê tong chhá kơxu, krâ on bâ eăng vâ ăm rơxế prôk lăm hdrối Têt Lo hơnăm nếo. Jâ Nguyễn Thị Thương, Kăn hnê ngăn Vi ƀan cheăm Đăk Pék, kong pơlê Quảng Ngãi tối ăm ‘nâi:

‘’Ƀă tơdroăng pro kông 16/5, kơxô̆ pro troăng châ dâng 80% ki kơnâ mơjiâng pro krâ. Cheăm séa ngăn tíu mơjiâng pro vâ mơhnhôk, hnê mơhno, pơtroh mơngế pêi cheăng, tơmeăm, rơxế, tơdrêng amê mơdêk tăng tơnêi vâ pro tơ’lêi hlâu mơjiâng pro troăng kân’’.

Hơnăm 2026 ai kơnâ ki kal khât, hơnăm tơkŭm po Hneăng hôp kăn teăng mâ lâp tơnêi têa roh má XIV dêi Đảng, tâ phĭu rah xo Kuô̆k hô̆i hneăng má XVI ƀă hô̆i đong kuăn pơlê mâu râ. Kố xuân cho hơnăm po apoăng hneăng mơnhông nếo ƀă hên roh tơ’lêi hlâu ƀă pơloăng mơnúa tơvâ dêi pó. Tơdroăng po rơdâ pêi pro pơkâ mơnhông cheăng kâ - rêh ối pơlê pơla hơnăm 2026 dêi kong pơlê Quảng Ngãi, tung mê ai tơdroăng kêi đeăng troăng klông kô ai mâu tơdroăng ki tơ’lêi hlâu vâ tơtêk.

Tơdroăng pơkâ Hneăng hôp Kăn teăng mâ Đảng ƀô̆ kong pơlê Quảng Ngai roh má môi, hneăng hơnăm 2025 – 2030 mơnhên tơkŭm mơ’no liăn cheăng, mơhnhôk ƀă xúa châ tơƀrê mâu kơxô̆ liăn, mơngế pêi cheăng vâ mơjiâng pro troăng kân tơdâng tơ’mô, tiô rơxông nếo; kơjo pro tíu ki kal hdrối ăm mâu cheăm kơpong hơngế, hơngo, kơpong kuăn pơlê hdroâng kuăn ngo. Tơdroăng mơjiâng pro kơdrâm phiu ro a mâu tíu pro troăng klông kơpong kong ngo mâu hâi apoăng hơnăm cho tơdroăng mơnhên inhên ăm tơdroăng khŏm mơ-eăm mê, mơjiâng xiâm kối ki kal vâ mâu cheăm, bêng châ tơƀrê tung hneăng nếo. Pôa Nguyễn Hoàng Giang, Kăn hnê ngăn Vi ƀan kong pơlê Quảng Ngãi tối ăm ‘nâi:

‘’Tơdroăng pro troăng kân ƀă tơdroăng mơ’no liăn cheăng hơnăm 2026 thế rak tơniăn tro tiô pơkâ mơ’no, kố cho hnoăng ki kal dêi rêm kơ koan, tíu cheăng, khu mơ’no liăn pro troăng kân. Thế tơkŭm tah lôi mâu tơdroăng pá puât, tơleăng tâi mâu tơdroăng tơkêa bro ki tá hâi kêi đeăng, pơtê pro; tah lôi mâu tíu ki kreăng ‘na hngêi trăng, troăng klông, tơnêi tơníu, pro mơ-éa; mơdêk tơdroăng tăng tơnêi vâ mơdêk tơdroăng mơjiâng pro mơ’no liăn pro mâu troăng klông ki kal tung kong pơlê’’.