Châ pêi pro sap ing hâi lơ 10/7 troh nôkố, Tơdroăng Droh rơtăm pleăng hnoăng cheăng rơnó pơtê hriâm pêi tơdroăng lĕm kong pơlê Dak Lak hơnăm kố tơkŭm po 9 cheăm, pơlê krâm ối tung 7 tơring tung kong pơlê Dak Lak. Tung 15 hâi hiăng hluâ, khu droh rơtăm pleăng hnoăng cheăng râ kong pơlê hiăng po 28 lâm pơtâp rơnó pơtê hriâm ăm 700 ngế hok tro râ má môi ƀă râ má péa; 1 lâm hnê mâu ngế ôh tá ‘nâi chư ăm kuăn pơlê a cheăm Ea Hiu, tơring Krông Păč.

Tơkŭm po 93 roh tơkŭm xah droh rơtăm, trâm mâ mơhno khôi túa lĕm tro hơdruê xoâng a mâu pơlê; pêi pro tơdrêng ƀă pơtâng tối ‘na mâu troăng pơkâ pêi, Pơkâ dêi Đảng, troăng hơlâ, luât dêi Tơnêi têa, mơgrúa kong prâi; pơtâng tối tơdroăng ‘na ivá mơhum kuăn ngá ăm droh rơtăm, hnê ai kuăn preăng kuăn iâ, hbrâ mơdât tơdroăng pro xôi tung pơlê pơla. Pêi pro 17 tơmeăm, tơdroăng cheăng droh rơtăm môi tiah: Pul on tơhrik bâ eăng troăng pơlê, rơnêu pik mơngiơk hngêi hôp tơdjuôm; kui tah trâp hno têa, pêt reăng troăng droh rơtăm, kơdrum reăng droh rơtăm.