A hên tíu tê hlá mơ-éa ki ai tê hên mê cho: Hngêi tê mâu hlá mơ-éa Giáo dục, troăng Lý thường Kiệt, Hai Bà Trưng… dêi kong pơlê Dak Lak. Kơxô̆ mâ nôu pâ ƀă hok tro troh lăm rôe tâk hên, malối a peăng kơxêi măng a hâi mơ‘nui măng tĭng. Mâu khu hlá mơ-éa hriâm apoăng vâ mot lâm 1, lâm 6 ƀă lâm 10 cho tung khu hlá mơ-éa ki tê ai hên ngế vâ rôe. Môi ngế nôu dêi hok tro ối a bêng Tân Lập tối:

“Mâu túa hlá mơ-éa a kố ai hên túa, hên hlá mâu mơ-éa, ing hlá mơ-éa vâ hriâm, hlá mơ-éa vâ po ngăn tăng ‘nâi mâu tơdroăng kal hriâm tơ’nôm. Yă tê xuân oh tá kơnâ. A bú mơhno khu hlá mơ-éa ki a kal hngêi trung chêh ăm thế rôe mơhno amê mâu ki tê xo ăm tŭm rěng tê, hlâu há”.

Vâ tơniăn ai hlá mơ-éa ăm kơchơ vâ tê, Kŏng ti veăng tơlo liăn tê rôe hlá mơ-éa ƀă mâu tơmeăm hriâm tung hngêi trung Dak Lak hiăng rôe ‘măn lối 4 rơtuh kơxop (tơ’mô ƀă 45 rơtal liăn), lối 1 rơtuh kơxop hlá mơ-éa (tơ’mô 4 rơtal liăn) ƀă dâng 25 rơtal liăn ăm ‘na hlá mơ-éa hriâm ƀă mâu tơmeăm xúa tung hriâm. Pôa Trương Văn Băng - Ngế pơkuâ Kŏng ti tối:

“Kŏng ti tê tŭm ăm tâi tâng mâu hok tro, ngin tối vâ tơniăn tá ăm ai tơdroăng ôh tá bê mâu hlá mơ-éa hriâm, tơmeăm xúa tung hriâm ƀă mâu tơmeăm xua tung rôh mot hơnăm hriâm nếo’’.

Tơdrêng ƀă kơchơ tê hlá mơ-éa hriâm, hmân ếo ki bô bối ăm hok tro xuân dế hên ngế tăng rôe. Mâu tíu tê hmâ ếo bô bối a bêng Buôn Ma Thuột, ƀă hên bêng, cheăm hbrâ rôe tơmeăm ing apoăng, túa rah vâ rôe hên tơtro tơrêm hngêi trung. Nâ Nguyễn Thị Mỹ Trang, môi ngế nôu ối a bêng Thành Nhất ăm ‘nâi: Yă tê hmân ếo bô bối hơnăm kố tơniăn ôh tá kơnâ, dâng  sap 180 - 350.000 liăn/plâ; sap hmân ếo pơtâp ivá dâng 80.000 – 200.000 đồng/môi plâ. Nâ hmâ rôe hơmân ếo ki hiăng chêp pơchoh lôi, teăng rôe ché ăm pơchoh môi tiah hdrối nah, hlối kơdĭng liăn ‘no hrê, hlối ai hên túa ếo ki vâ râh rôe.

“Á djâ dêi 2 ngế kuăn lăm rôe, a Tíu tê mơdró tơmeăm dêi hngêi trung mê hiâng tơ’lêi hlâu. Ai hên túa, sap ing ếo  hmân troh pơtâk,  chế pơchoh lěm, yă tê tơtro ôh tá kơnâ, krâ kơvâ’’.

Mâu tơmeăm ai inâi Việt Nam pro hiăng pơ’lêh hên túa, ki krá kak lơ ôh, yă tơtro, châ mâu nôu pâ loi khât vâ rah rôe. Kố xuân cho vâ mơhno ăm hlo nhên ki tơƀrê dêi tơdroăng mơhnhôk “Mơngế Việt Nam rôe tơmeăm dêi Viêt Nam”. Jâ Phạm Thị Kim Anh - Ngế tê tơmeăm a tíu mơdró hmân ếo bô bối Bi Phạm, bêng Buôn Ma Thuột, kong pơlê Dak Lak ai tối tiah kố:

“Tung rơnó mot hơnăm hriâm nếo, tíu tê mơdró lôu péa sap ing 6 chôu kơxo vâ tơ’lêi ăm mâu nôu pâ vâ rôe tơmeăm ăm dêi kuăn. Tơmeăm tê hên a mâu tíu hngêi ki kân tung tơnêi têa, tơniăn hlâu hên hĭn tơmeăm tê, hlối lěm krá. Ngin tơmâng khât tá tơdroăng ki chêp krá kak, ché lěm há vâ hok tro xâp ôh tá tâ tơvâ kơxôu vâ xâp plâ hâi”.

Ƀă tơdroăng hbrâ nhên dêi mâu tíu mơjiâng pro tê hlá mơ-éa, tíu tê mơdró hmân ếo ƀă khu mơjiâng pro tê tơmeăm lâp luô, vâ nôu pâ ƀă hok tro a Dak Lak kô hmiân tuăn hdrối vâ mot hơnăm hriâm nếo.