Tơbleăng tơdroăng xiâm dêi tơdroăng tơkêa bro Luât, pôa Nguyễn Văn Hùng, Ngế xiâm Khu xiâm pơkuâ khôi túa lĕm tro – Tơ’noăng ivá – Ôm hyô tối ăm ‘nâi, tâng pơchông ƀă luât Hlá tơbeăng nôkố ai 6 chương 61 troăng mê mơ-éa chêh hdrối Luât Hlá tơbeăng (‘mâi rơnêu) tối hdrối ai 4 chương, 50 troăng (kơdroh 2 chương, 11 troăng), tung mê: Rak tơdroăng xiâm 9 troăng, ‘mâi rơnêu tơ’nôm tơdroăng xiâm dêi 38 troăng, tơ’nôm nếo 3 troăng, tah 6 troăng.

‘Na mâu pơkâ vâ pơkuâ krá tơdroăng cheăng hlá tơbeăng, tơniăn châ tơƀrê tung pơkuâ, mơ-éa chêh hdrối Luât tiô tối hdrối châ tơbleăng ăm pêi pro kô ai 7 tơdroăng mê cho po rơdâ tíu pêi cheăng dêi hlá tơbeăng a tung măng vâ mơnhên troăng pêi la ngiâ, djâ tơdroăng; mơjiâng mâu kơ koan ki xiâm kân, rơdêi; mơdêk mâu ngế pêi cheăng pơlê pơla ăm mơnhông hlá tơbeăng; tah lôi mâu tơdroăng pá puât, tơvâ tơvân dêi Luât Hlá tơbeăng hơnăm 2016, mơdêk ki dâi lĕm khu mơngế pêi cheăng chêh hlá tơbeăng.

Tiô tối hdrối mơ-éa chêh hdrối Luât Hlá tơbeăng (‘mâi rơnêu) kô châ Kuô̆k hô̆i séa ngăn, tơbleăng ăm pêi pro a hneăng hôp má 10, Kuô̆k hô̆i hneăng má XV.