Nôkố a hên tíu a troăng kân 28B tíu ki prôk luâ mâu cheăm Phan Sơn, Tà Hine ƀă Ninh Gia (kong pơlê Lâm Đồng) hiăng klêi tơdroăng ki po rơdâ ngâ troăng, ai mâu tíu ki ‘nâ dế pơxiâm châ ok chhá kơxu. Tiô kih sư Nguyễn Văn Thuận, ngế ki ngăn tơdroăng pro troăng kơxô̆ 2, vâ pro klêi tiô pơkâ, tíu cheăng kố athế pơtroh hên mâu rơxế, kơmăi kơmok ƀă ngế pêi cheăng pro, xua dế pơla kố kong dế tô lĕm:

“Tíu pêi cheăng nôkố dế mơdêk rĕng 4 trŭm pro ngâ troăng ƀă 2 trŭm pro ok chhá kơxu. Athế mơ-eăm pêi tung mâu hâi kong tô lĕm vâ rĕng pro klêi”.

Tơdroăng tơkêa bro, ‘mêng troăng kân 28B xŏn lối 68km, tâi tâng kơxô̆ liăn ‘no lối 1.400 rơtal liăn, xua Khu xiâm ngăn Troăng prôk Việt Nam cho ngế ki ‘no liăn pro. Kố cho troăng prôk ki kal, vâ tơdjêp péa kơpong cheăng kâ kâ Đà Lạt - Phan Thiết (kong lo a têa kơxĭ), thăm mơnhông tơrŭm kơpong ƀă pro kơtăn ‘na troăng kĭng peăng mâ hâi Lo - mâ hâi Lâ. Pơxiâm pro a khế 4/2024, troh nôkố tơdroăng tơkêa kố hiăng pro klêi lối 40% tơdroăng cheăng pơcháu: lối 30km troăng châ ok chhá kơxu, 40km a ngâ troăng ƀă vâ chê 58km troăng châ ok hmốu tơnêi li.

A văng Đại Ninh - kơpong troăng ki tơ’nhiê má môi, 6 to kông dế châ pro. Pôa Trần Trung Hiếu, ngế pơkuâ pro kông kơxô̆ 3 (Kŏng ti Tơlo liăn 134 Việt Nam) ăm ‘nâi, tơnêi tơníu gá xơpá mê pro tơdroăng ki pong tơnêi tâp trăng gá chiâng mơdoh hên hâi khế, la tíu pêi cheăng dế pro plâ hâi plâ măng vâ pro klêi tiô pơkâ:

“Tung kơdâm tơnêi ôh tá tơniăn, pá chiâng tơdjâk troh tơdroăng ki pong tâp tơneăn, pong tơnêi chiâng mơdoh hên hâi khế. Troh tơdế khế pơla hdrối kố nah nếo klêi, la bu klêi tíu ki pong tơnêi tâp tơneăn tê. Peăng châ mê ngin dế pêi tơ’nôm chôu, tơ’nôm mơngế pêi mê kô mơdêk rĕng ƀă kô klêi tro tiô tơdroăng ki châ pơcháu. Ngin pro plâ hâi plâ măng, mơhnhôk tơ’nôm chôu pro, pơtroh tơ’nôm ngế pro vâ teăm pro klêi pơcháu tro hâi lơ 15/12 la ngiâ”.

Tiô pơkâ, tơdroăng tơkêa bro kô pro klêi a khế 12/2025. Laga, kong mêi hên tiah kố ƀă tơvâ ‘na troăng ki xo tơnêi a mâu tíu xuân ối cho mâu tơdroăng ki pá kân, mơni kô tơdjâk troh tơdroăng pơkâ pro tơdjuôm.