Ƀơrô xiâm Đảng nếo pơkâ tơbleăng mơgêi rơkong dêi pôa Tô Lâm - Kăn xiâm pơkuâ hnê ngăn Đảng a rôh pêi cheăng ƀă Khu xiâm ngăn tơdroăng cheăng ‘na mâu tíu pêi cheăng tơnêi têa pêi pro tơdroăng hnê mơhnhôk pêi chiâk a kong pơlê dế pơkuâ túa pêi cheăng mâu kăn kong pơlê 2 râ.

Ing mê, Kăn xiâm pơkuâ hnê ngăn Đảng thế hnê tối ƀă hlê tŭm tơdroăng hnoăng cheăng, ki kal dêi pêi chiâk ƀă hnoăng mơnhông pêi chiâk tung mơnhông cheăng kâ, rêh ối, mơjiâng thôn pơlê nếo, mơnhông tơdroăng rêh ối dêi thôn pơlê  tro tiô troăng “pêi chiâk cho ki pơxúa dêi tơnêi têa, cho xiâm ki veăng kơjo gum dêi mơnhông cheăng kâ”; ‘nâi nhên tơdroăng hnê mơhnhôk pêi chiâk cho hnoăng cheăng ki kal dêi mâu kăn râ cheăm.

‘Na túa tơrŭm cheăng, a râ kong pơlê, pơlê kong kơdrâm pơtối râk mâu Tíu xiâm hnê mơhnhôk pêi chiâk, ki hên cho pêi tơdroăng cheăng hnê mơhno, xing xoăng, tơbâ thế, séa ngăn ƀă kơjo kum râ cheăm. Ôh tơkŭm mâu Tíu mơhnhôk pêi chiâk kơpong, pơla mâu cheăm. Râ cheăm mơjiâng tíu pêi cheăng tơnêi têa pêi tơdroăng cheăng ki pro pơxúa hên kơvâ cheăng.

Ing tơdroăng kăn ƀô̆ ngăn ‘na mơhnhôk pêi chiâk rêm râ nôkố, kô xoăng lăm pêi cheăm a mâu cheăm vâ tơniăn ki iâ ai rêm cheăm 5-6 kăn ƀô̆ hnê mơhnhôk pêi chiâk, ôh tá tâk kơxô̆ biên chê̆ kăn ƀô̆ ngăn ‘na mơhnhôk pêi chiâk. Pơtối mơnhông, mơdêk ki pơxúa tơƀrê  d tơdroăng cheăng dêi mâu Tôh mơhnhôk pêi chiâk  tung kuăn pơlê, mơdêk hnê túa pêi chiâk deăng, veăng kơjo kum, hnê kuăn pơlê tơrŭm mơnhông pêi lo kế tơmeăm ing chiâk deăng. Mâu kong pơlê tơbleăng xing xoăng pro rế lĕm tíu pêi cheăng râ cheăm  thế klêi hdrối hâi lơ 30/10/2025.