Hdrối mê, hâi hnah, lơ 22/1, Hneăng hôp kân rôh má 14 dêi Đảng hiăng tối pơtâng klêi kơ’nâi roh tâ phĭu ƀă hiăng rah xo mâu kăn ki châ mot tung Khu xiâm pơkuâ hnê ngăn Đảng hneăng 14.

Tiô tối tơbleăng dêi hlá tơbeăng, tung hâi pêi cheăng roh má 4, Hneăng hôp hiăng pêi cheăng plâ hâi vâ tơpui tơno ƀă pêi pro mâu tơdroăng cheăng ki tăng rah mơngế mot tung Khu xiâm pơkuâ hnê ngăn Đảng hneăng 14. Pôa Tô Lâm, teăng mâ Khu xiâm Kăn hnê ngăn hiăng pơkuâ ngăn roh hôp mê. Pôa Lê Minh Hưng, Ngế cheăng tung Khu xiâm kal kí, Khu xiâm pơkuâ hnê ngăn Đảng, Kăn hnê ngăn tíu xiâm Đảng teăng mâ Khu kăn xiâm hnê ngăn hiăng tối Tơbleăng ki kal dêi Khu xiâm pơkuâ hnê ngăn Đảng hneăng 13 ‘na cheăng rah pôk mơngế cheăng tung Khu xiâm pơkuâ hnê ngăn Đảng hneăng 14.

Hneăng hôp kân hiăng tơpui tơno ƀă têk kŏng tối tơbleăng kơxô̆ ngế ki cheăng tung Khu xiâm pơkuâ hnê ngăn Đảng hneăng 14 ai 200 ngế, tung mê, ai 180 ngế ki păng ‘nâng tung Khu xiâm ƀă ai 20 ngế ki cheăng hbrâ. Mâu kăn hiăng hriăn plěng, tơpui tơno Tối tơbleăng ‘na hnoăng cheăng tăng rah mơngế cheăng tung Khu xuâm pơkuâ hnê ngăn Đảng hneăng 14, tung mê ai mơngế ki rah xo dêi tơná, ai mơngế cho xua ing vâi ê rah xo ƀă hiăng séa ngăn mâu hlá mơ-éa, hô sơ dêi mâu ngế ki châ rah xo.

Khu kăn hnê ngăn hiăng tơmâng mâu kăn ki pơkuâ khu tối tơbleăng ‘na tơdroăng ki tơpui tơno dêi mâu khu kăn teăng mâ, ƀă hnối Tối tơbleăng inâi mâu ngế ki mot cheăng tung Khu xiâm pơkuâ hnê ngăn Đảng hneăng 14; tơdroăng ki rah xo dêi tơná, lơ châ vâi ê rah xo, mâu ngế ki pâ lo ing hlá mơ-éa ki rah xo dêi tơná, mơngế ki xua vâi ê rah xo, xuân hiăng chêh tối rơhí rơhó, tơbleăng mơnhên tâi tâng tung hlá mơ-éa rah pôk. Khu kăn hnê ngăn tối tơbleăng a Hneăng hôp ƀă hnối têk kŏng tối tơbleăng inâi mâu ngế ki rah xo tung Khu xiâm pơkuâ hnê ngăn Đảng hneăng 14, pôk Khu ki riân ngăn kơxô̆ phĭu; Khu ki mơnhên ngăn kơxô̆ phĭu hnê tối ‘na tơdroăng rah pôk.

Hneăng hôp kân hiăng chêh tối tung phĭu, tâ phĭu, tối tơbleăng ‘na inâi mâu ngế ki châ rah xo mot cheăng tung Khu xiâm pơkuâ hnê ngăn Đảng hneăng 14.