VOV4.Xơ Đăng - Hâi lơ 28/2, a Hà Nội hiăng po Leh kĭ tơkêa tơrŭm cheăng tung kơvâ cheăng kơdroh kơtiê pơla Tơdroăng Mơnhông mơdêk Khu lâp kong têa UNDP ƀă Ƀơrô cheăng Tơnêi têa ‘na kơdroh kơtiê, Khu xiâm ngăn cheăng pêi mố đô̆i tro rong ƀă rêh ối pơlê ƀă tơbleăng tối tơdroăng tơkêa “Mơjiâng tơdroăng ƀă tiâ mơnhên troăng hơlâ ‘na kơdroh kơtiê ki hên troăng ƀă krá tơniăn ton, hneăng hơnăm 2021 – 2023”. Tơdroăng pêi pro tung la ngiâ cho tơkŭm ‘no liăn tung kuăn mơngế, tơdrêng cho ‘no liăn, mơdêk ivá mâu kơtiê; mơnhên xiâm kối kơtiê vâ tŏng kum, vâ pôi tá ăm mâu tơdroăng dêi mâu kơtiê, kơpong tíu ki xiâm ‘na kơtiê. Tơpui a rôh leh, Teăng mâ tíu pêi cheăng dêi Tơdroăng Mơnhông Khu lâp kong têa UNDP a Việt Nam jâ Caitlin Wiesen ăm ‘nâi: Ing tơdroăng Hlá mơéa chôu vế kĭ tơkêa hâi kố, UNDP kô pơtối tia mơnhên troăng hơlâ ƀă kum ‘na kih thuât ămKhu xiâm ngăn cheăng pêi mố đô̆i tro rong ƀă rêh ối pơlê pơla vâ po rơdâ mâu túa pơkâ troăng hơlâ rơkê plĕng, hiăng châ mơnúa Kơdroh kơtiê krá tơniăn ton hneăng hơnăm 2021 -2025 ƀă pêi pro mâu tơdroăng pơkâ dêi tơdroăng cho kơdroh kơxô̆ rơpŏng kơtiê ƀă vâ chê kơtiê ối tơdế a hơnăm 2025.

Katarina Nga tơplôu ƀă tơbleăng