VOV4.Xơ Đăng - Kơxê lơ 30/3, a Hà Nội tơkŭm po roh hôp má môi Hneăng hôp Khu ngế tê mơdró hơnăm ối nếo Việt Nam roh má 7, hneăng hơnăm 2022 – 2025. Veăng hneăng hôp ai 800 ngế tê mơdró hơnăm ối nếo ki má môi teăng mâ ăm lối 11 rơpâu ngế tê mơdró, ngế tơrŭm tung lâp tơnêi têa. Hneăng hôp kheăn kơdeăn tơdroăng pêi dêi mâu ngế tê mơdró hơnăm ối nếo tung mơnhông mơdêk cheăng kâ, tơdroăng pêi cheăng pơlê pơla ƀă tơdroăng dêi Khu ngế tê mơdró hơnăm ối nếo Việt Nam hneăng hơnăm 2018 – 2021; tơpui troăng pêi la ngiâ hnoăng cheăng tung hneăng hơnăm 2022 – 2025 ƀă rah xo Khu pơkuâ Khu ngế tê mơdró hơnăm ối nếo Việt Nam hneăng 7.

Pôa Trần Anh Vương, Phŏ hnê ngăn Khu ngế tê mơdró hơnăm ối nếo Việt Nam tối ăm ‘nâi: Tơdroăng ki nếo dêi hneăng cheăng la ngiâ cho rah xo mâu khu ngế ki hơnăm ối nếo pơkuâ Khu; mâu tơdroăng pêi cheăng tơmiat troh mơngế hơnăm ối nếo ƀă tơmiât pêi rơkê, mot tơrŭm lâp plâi tơnêi; rơtế mâu kong pơlê po rơdâ tơ’nôm kâu lăk ƀô̆ pơxiâm tăng cheăng pêi rơkê.

Tung tơkŭm po Hneăng hôp, kơmăng lơ 30/3, Khu ngế tê mơdró hơnăm ối nếo Việt Nam tơkŭm po Leh diâp pri Hơlŏng trĭng tơnêi Việt 2021, pơ-ô pơ-eăng  Top 10, Top 100 ƀă Top 200 – Inâi ki má môi Việt Nam.

A Sa Ly tơplôu ƀă tơbleăng