Khu râ kăn pơkuâ hnê ngăn cheăng Đảng kal tơkŭm pơkuâ, hnê mơhno khoa hok tơtro ƀă kơtăng khât. Rơ’jíu Việt Nam ai tơbleăng ƀai chêh dêi pôa Tô Lâm, Kăn xiâm pơkuâ hnê ngăn Đảng, dó inâi ‘’Tơkŭm po lĕm tro Hneăng hôp Đảng ƀô̆ rêm râ hneăng hơnăm 2025 – 2030’’, pó vâi krâ nhŏng o ƀă pú hmâ kô tơmâng.

Hneăng hôp Đảng ƀô̆ rêm râ hneăng hơnăm 2025-2030 ai pơxúa khât. Kố ôh tá xê to cho rôh hôp kal kân, trâu rơdâ tung tâi tâng Đảng, tâi tâng kuăn pơlê mê ối cho xiâm vâ khu tơrŭm pê klêi hnoăng cheăng dêi Hneăng hôp mâu kăn tung lâp tơnêi têa rôh má 14 dêi Đảng. Kân tâ, rêm tơdroăng po leh mê cho môi tung mâu tơdroăng ki xiâm kal kí krá  kak, chông djâ tơnêi têa xông prôk mot tung kal nếo, chal ki mơnhông tơƀrê, rơdêi, kro mơdrŏng, rơtế ƀă mâu kong têa ki rơdêi tung lâp plâi tơnêi môi tiah tơdroăng púi vâ dêi Pôa Hồ Chí Minh, Kăn xiâm hnê ngăn tơnêi têa ki apoăng hên ngế pâ mơjo ƀă cho tơdroăng púi vâ dêi tâi tâng hdroâng mơngế.

Ki khât dêi hnoăng cheăng kăch măng Việt Nam ăm hlo, Hneăng hôp Đảng ƀô̆ rêm râ ai hnoăng hnê djâ, mơhno troăng, cho xiâm, hên ngế pơ-eăng ‘nâi troh lâp lu tung tâi tâng Đảng ƀă pơlê pơla. Hneăng hôp Đảng ƀô̆ rêm râ hneăng ki kố ai 3 tơdroăng cheăng pêi ki kal, mê cho: Tơpui tơno, tơbleăng Tơdroăng chêh hneăng hôp râ tơná ƀă veăng hnê tối mâu tơdroăng tung Hlá mơ-éa chêh dêi hneăng hôp kân râ kơpêng, Tơdroăng chêh Hneăng hôp má 14 dêi Đảng; rah xo mơngế ki veăng cheăng tung râ ủy rêm râ; pê klêi tơdroăng rah xo mơngế cheăng tung kơ koan pơkuâ dêi Đảng sap râ cheăm troh râ xiâm tơnêi têa. 

Mâu tơdroăng kal mê xuân cho tơdroăng “ki xiâm”, nhoăm, tơdjâk troh hnoăng pơkuâ hnê mơhno, pơkâ, ivá tơplâ dêi Đảng; troh pơkâ troăng hơlâ pêi pro, troăng prôk, luât pơkâ tŏng kum, tơdroăng pơkuâ hnê; pơkâ rơdêi tung mâu kăn Đảng ƀă khu cheăng kal kí; troh tâi tâng tơdroăng cheăng pơkuâ hnê mơhno dêi khu tơrŭm cheăng Đảng rêm râ tung hneăng la ngiâ xuân môi tiah ivá rơdêi dêi tâi tâng hdroâng mơngế tung la ngiâ.

Đảng pin cho Đảng pơkuâ, Đảng pơkuâ hnê ƀă troăng hơlâ. Tơdroăng chêh a Hneăng hôp kân rêm râ cho mơhno i nhên tơdroăng vâ pêi, troăng hơlâ hnê mơhno pêi pro dêi Đảng chiâng mâu troăng hơlâ pêi pro ki ai khât dêi kơvâ cheăng, cheăm, tơring, kong pơlê, kơ koan tíu pêi cheăng, kong pơlê, mâu kơvâ cheăng ki châ xing xoăng pêi; ai pơxúa tiô troăng hơlâ pơkuâ hnê mơhno, djâ troăng, pêi kơtăng tơdroăng tơvâ tơvân ki u ối, mơdoh hên rôh, drêng tơ’lêi hlâu, tah tíu  ki xơpá, tơvâ tơvân, mơhnhôk hên ngế veăng pêi dêi kăn ƀô̆ đảng viên ƀă kuăn pơlê, pro xiâm rơdêi kân vâ kâi tơkâ luâ tơdroăng hiăng pơcháu pêi, veăng ‘no hnoăng pêi klêi mâu tơdroăng pơkâ, pơcháu ki Tíu xiâm tơnêi têa lơ Đảng ƀô̆ rêm râ kơpêng hiăng pơcháu.

Tơniăn pêi tơƀrê veăng hnê tối mâu tơdroăng tung Hlá mơ-éa chêh dêi hneăng hôp dêi râ tơná, tơdroăng chêh dêi râ kơpêng ki tơbleăng tơdrêng, dêi rêm râ kơpong xuân môi tiah tơdroăng chêh tung hlá mơ-éa hneăng hôp kân má 14 dêi Đảng, malối cho pơkâ mâu tơdroăng pơxiâm ing tơdroăng rêh ối a pơlê cheăm, ing tơdroăng rêh ối pơlê pơla dêi tơrêm pơlê cheăm, kong pơlê, thăm nếo ing pơlê cheăm bêng ƀă mơngế ki pro xiâm, ki mơ-eăm rơdêi, tơbleăng rơdêi troh tung lâp tơnêi cho pơkâ ki rêm râ ủy kăn pêi châ tơƀrê.

Mâu ngế cheăng tung râ ủy xuân cho mâu kăn ƀô̆ xiâm, rak ngăn, pơkuâ mâu tơdroăng cheăng tơrêm khu xiâm, kơvâ cheăng, kong pơlê, a kơ koan, tíu pêi cheăng cho kông ki “tơdjêp” pơla Đảng, Tơnêi têa ƀă kuăn pơlê, mâu lêng ƀă mâu kăn, hnê mơhno, tơkŭm pêi pro pơkâ djâ troăng hơlâ dêi Đảng, luât pơkâ tŏng gum dêi tơnêi têa xúa tung rêh ối; hlối tăng ‘nâi plĕng mâu tơdroăng tối ăm Đảng, Tơnêi têa, luât tŏng gum tơtro ƀă tơdroăng púi vâ, ki pơxúa tơxâng dêi kuăn pơlê.

Kăn pơkuâ hnê cheăng Đảng, Phŏ kăn pơkuâ hnê cheăng Đảng, râ ủy đi đo cho mơngế ki kal, pơkâ mâu tơdroăng cheăng kal kí, toniăn, mơnhông rơdêi dêi kong pơlê, kơ koan, tíu pêi cheăng lâp tơnêi têa ki hdrối ƀă ton ta ah.

Vâ tơkŭm po klêi tơniăn hneăng Hôp Đảng ƀô̆ rêm râ hneăng 2025 - 2030, râ ủy rêm râ kal tơmâng pêi tro tơdroăng chêh hnê mơhno kơxô̆ 35 hâi lơ 14/6/2024 dêi khu xiâm kal kí “ ‘na tơkŭm po Hôp kân Đảng ƀô̆ rêm râ troh hneăng Hôp kân tung lâp tơnêi têa rôh má 14 dêi Đảng”  Mơgêi kơxô̆ 118 hâi lơ 18/4/2025 dêi khu xiâm kal kí ‘na ‘mâi hơ’lêh, tơ’nôm tơdroă Pơkâ 35 nếo tối mê.

Tung pơla pin tơbleăng pêi Pơkâ kơxô̆ 18 dêi Khu xiâm kal kí xing xoăng pro rế lĕm, rah iâ mâu ngế pêi cheăng ăm tơnêi têa mâu kơ koan, tíu pêi cheăng ‘na tơdroăng kal kí, rêm râ ủy kal rĕng ‘mâi pro rế lĕm mau tíu pêi cheăng, vâ mâu ki mê pêi cheăng pơtối rah iâ pro rế lĕm mâu ngế cheăng tung tơrêm kơ koan, tíu pêi cheăng, akong pơlê. Pŭn Đảng kơxô̆ ki nếo châ mơjiâng cho Đảng ƀô̆ rêm râ  kơ koan Đảng xiâm, Đảng ƀô̆ Chin phuh, Đảng ƀô̆ Kuô̆k hô̆i, Đảng ƀô̆ Măt trâ̆n Tơnêi têa; Mâu khu cheăng tung tơdroăng xiâm ki nếo dêi tơnêi têa châ ‘mâi pro rế lĕm; mâu đảng ƀô̆ chi ƀô̆ nếo dêi mâu Khu xiâm, mâu kong pơlê, pơlê kong kân, kong kơdrâm… ngăn a hnoăng cheăng pêi, tơdroăng tơkŭm rah mơngế cheăng tiô pơkâ rĕng tơniăn khu ki pêi cheăng ƀă pơtối pêi cheăng tro tiô luât Đảng ƀă mâu pơkâ ki nếo dêi Khu kăn xiâm tung tơdroăng pơkuâ cheăng xuân môi tiah tung tơdroăng tơkŭm po hneăng Hôp Đảng ƀô̆ chi ƀô̆.

Vâ pêi tro hneăng Hôp kân Đảng ƀô̆ rêm râ, mâu râ ủi kal tơmânng khât a 3 tơdroăng ki kal kơ’nâi kố:

Má môi, thế môi tuăn dêi rơpó hlê plĕng, mâu tơdroăng hiăng kâi pêi tơƀrê dêi tơnêi têa kơ’nâi 95 hơnăm ing hnoăng pơkuâ hnê djâ dêi Đảng, malối kơ’nâi 40 hơnăm pơ’lêh nếo ki rơdêi, tơxâng thế nhoăm pâ, hâk tơngăm khât. La Tơnêi têa pin xuân ối trâm hên tơdroăng pá, pơloăng mơnúa ki, la kal tâi tâng Đảng, tâi tâk kuăn pơlê tâi tâng mâu lêng pin thế mơ-eăm môi tuăn, mơ-eăm khât tâ nếo vâ kâi tơkâ luâ tơdroăng pá, tung mê, Hneăng hôp Đảng ƀô̆ rêm râ hneăng 2025-2030 ai hnoăng thế veăng pêi ƀă mâu lêng ki xiâm rơdêi vâ kâi pêi tơƀrê mâu tơdroăng pá pơloăng mơnúa mê.

Hên tíu ki pá, tơvâ tơvân, tíu ki pá vâ tơleăng mơnhên pêi pro tơƀrê ‘na luât ki u ối rak ton hơnăm tro nôkố xuân hâi kâi tah lôi. Kô tơ’lêi “tot môi tíu’’ tơ’lêi ton tơrŏng, malối kô tơ’lêi oh tá rơhéa ‘na cheăng kâ, ‘na khoa hok, kŏng ngê̆ ƀă kô tơ’lêi tro ‘’lŭp ‘na pêi lo liăn’’ ôh tá châ hên.

Má Péa, ‘na chêh tung hlá mơ-éa mâu tơdroăng veăng hnê tối a tơdroăng chêh tung hlá mơ-éa hneăng hôp râ kơ pêng, Tơdroăng chêh tung hlá mơ-éa hneăng hôp Kân má 14 dêi Đảng, tơbleăng tơdroăng kal kí Hneăng hôp Kân Đảng rêm râ kal tơmâng khât vâ ‘nâi mâu tơdroăng chêh tung hlá mơ-éa ki pơtroh ăm hneăng Hôp má 14; tơmâng tối nhên, tối tro tơdroăng pơkâ hneăng hôp kố nah; tối tŭm tro tiô tơdroăng ƀă ki ai khât tung mơnhông dêi kong pơlê, kơvâ cheăng, tơdroăng ch     eăng, kơ koan, tíu cheăng lêng.

Mơnhên mâu hnoăng hiăng châ pêi pro, ki pơ’lêh nếo, ki tơƀrê tung pơkuâ hnê mơhno dêi khu tơrŭm cheăng Đảng; ing tơdroăng tơdrăng khât mơhno mâu tơdroăng ki tơvâ tơvân, ki ‘ro, ki hâi tro, ki hâi pêi pro, malối cho mâu tơdroăng ối pá ƀă tơdroăng vâ mơnhông tơƀrê ki hâi kâi châ tah, hâi kâi tơkâ luâ xơpá mê.  

 Má pái, Malối tơmâng hbrâ mơngế vâ Hôp. Kal thế hlê trâu, hbrâ mơngế  ôh tá xê to môi hneăng hôp kân; hơngế tâ, mê cho hbrâ mơngế ki hôp vâ pêi cheăng tung la ngiâ mơnhông khu tơrŭm cheăng Đảng, mơngế ki vâ mơnhông kơvâ cheăng, tơdroăng cheăng, kong pơlê, kơ koan, tíu cheăng lêng; rơdâ tâ mê cho tơdroăng thế pêi dêi Đảng, ki u ối lơ dêi rơxong ƀă ki mơnhông dêi tơnêi têa, dêi hdroâng mơngế. Kố cho tơdroăng cheăng ki kăn ƀô̆, đảng viên ƀă kuăn pơlê tơmâng ngăn vâ ‘nâi; kố xuân cho tơdroăng mâu khu ki ‘mêi, hriăn tăng rôh ki pơhôi ‘na kal kí va tăng troăng tơdjâk, tối mâu tơdroăng ki oh tá tro, hriăn vâ tơklâ mâu kăn mâu ngế cheăng tung khu xiâm.

‘Na pro rế lĕm râ ủy, thế tơniăn hnoăng pơkuâ tơdrêng, tâi tâng dêi rêm râ ƀă mâu tơring, kong pơlê mâu tơdroăng ki kal; ngăn cho tơƀrê, ôh tá ngăn a tơdroăng xoăng mơngế cheăng ah lơ ôh tá nhoăm pơkâ; ôh tá xê khŏm thế tơring, kong pơlê, khu râ, kơvâ cheăng ki lâi xuân thế ai ngế veăng cheăng tung râ ủy; khu ủy viên châ rah xo thế cho ngế ki chiâng rơkê vâ pơkuâ tơdroăng kal kí, cho teăng mâ ăm mâu đảng viên ƀă châ kuăn pơlê pâ nhoăm, rah xo; rêm râ ủy thế tơxâng cho mơngế tung Khu tăng ‘nâi plĕng ‘’ tơplâ ƀă thế môi tuăn dêi pó ‘na tuăn tơmiât ƀă tơdroăng pêi pro, cho krúa lĕm, krá rơdêi, khên tơnôu. Kal thế ai hnoăng cheăng dêi mơngế ki ối a ko tung tơ droăng pơkâ thế, tơbleăng tăng mơngế pêi cheăng, malối cho ngế ki vâ pơtối tiô mâu pơkâ ki nếo dêi Tíu xiâm.

Hbrâ, kơhnâ pêi tro tơdroăng cheăng ‘na tuăn mơno, tơdroăng hnê tối vâ môi tuăn tung tâi tâng Đảng ƀô̆ ƀă môi tuăn tung khu pú hên, kuăn pơlê; ‘mâi mơnhông, mơdêk tuăn loi dêi kăn ƀô̆, đảng viên ƀă kuăn pơlê ƀă khu tơrŭm cheăng Đảng. Pro tơ’lêi hlâu ƀă hyôh kong prâi tơtro vâ mơnhông rak vế tuăn ngôa rơkê ƀă veăng ai khu râ kuăn pơlê tung mơjiâng mâu tơdroăng chêh ƀă tơdroăng cheăng kăn ƀô̆ veăng ‘no hnoăng pêi kơhnâ, ai pơxúa a hneăng hôp kân, rĕng tơbleăng pơkâ hneăng hôp Đảng pêi tung rêh ối, pro ăm tơdroăng rêh ối phâi tơtô tơniăn, tơniăn, hơniâp ăm rêm ngế kuăn pơlê.