Hdrối vâ veăng Hôp ôh ta xê tiah hmâ rôh má Môi, Kuô̆k hô̆i hneăng 16, Khu kăn Kuô̆k hô̆i kong pơlê Dak Lak hiăng tơkŭm po xo tơdroăng veăng hnê tối ƀă mâu tơdroăng chêh hlá mơ-éa luât kô pơtroh ăm Kuô̆k hô̆i séa ngăn.

Môi tung mâu tơdroăng ki kal châ tơmâng cho tơdroăng chêh hlá mơ-éa Luât ‘mâi hơ ‘lêh, tơ‘nôm mâu tơdroăng Luât Hbrâ, mơdât xúa liăn ôh tá tơdrăng. Hlo ai hên mâu ki xôi xúa kong ngê̆ rơkê nếo ƀă tơmeăm khoăng tung kơmăi rế pơkí rơkê, hên ngế tối pâ thế tơ’nôm luât pơkâ tối ăm ‘nâi mâu tơdroăng, liên thông tơdroăng chêh ‘măn tiô hâi khế pơla mâu khu xiâm, kơvâ cheăng vâ pro pơxúa ăm tơdroăng châ ‘nâi mơngế ki rôe, mơnhên tơdroăng tê rôe ki lâi nhôm ôh tá tơdrăng, tăng xiâm liăn ƀă mơdât teăm tơdrêng mâu tơdroăng ki khu ‘mêi pro xôi. Pôa Võ Quang Duy, Kăn teăng mâ Kơ koan Kăn sát séa ngăn Kong an kong pơlê Dak Lak tối:

“Nôkố, mơngế ki xôi xúa liăn ôh tá tơdrăng ƀă tơmeăm khoăng kơxô̆ tơmeăm tung kơmăi ƀă hêak pơloi xúa kŏng ngê̆ rơkê nếo nôkố vâi rơkê khât ki vâ tong xo liăn hlối rĕng. Tâng mâu khu xiâm, kơvâ cheăng bú tơrŭm pêi cheăng tiô luât pơtroh hlá mơ-éa chêh pơkâ thế tiô hmâ mê liăn ki kơtôa pơkí hiăng châ pơtroh ăm hên tài khoản ki tơdế rá, pro pá ăm tơdroăng vâ mơnhên, vâ tăng xiâm rêi, vâ mơdât tơdroăng ki vâi pro xôi. Xua mê, kal thế ai liên thông pơla mâu tài khoản pin vâ tăng xiâm rêi ƀă vâ mơdât kơxô̆ liăn mê”.

Kố ăm hlo, kố cho tơdroăng pơkâ thế xiâm ing tơdroăng ki ai khât tơplâ, mơdât mâu ki xôi, veăng pêi klêi luât pơkâ ki tro vâ mâu kơ koan khu râ pơkuâ cheăng hbrâ rơnáu tâ tung tơdroăng kring vế tơmeăm khoăng liăn ngân ƀă hnoăng ki pơxúa dêi kuăn pơlê. Ƀă hlá mơ-éa Luât ‘mâi hơ’lêh, tơ‘nôm mâu tơdroăng Luât Hnoăng ki chêl thiăn dêi Tơnêi têa, hên mâu kăn pâ thế tăng séa ngăn mâu pơkâ ‘na hâi khế hơnăm tơleăng mơnhên tơdroăng pâ thế chêl thiăn tâng rêm pâ môi tuăn  mơdon hâi khế mơnhên ki lŭp ƀă tơpui tơno, vâ tơniăn ăm hnoăng săm phoăng dêi mơngế ki pơkâ thế chêl thiăn. Jâ Phan Thị Hoa, Phŏ pơkuâ ngăn ‘na luât kong pơlê Dak Lak pơkâ thế:

"Pâ thế kơ koan chêh tăng ‘nâi plĕng nhên túa mơnhên hâi khế ki hiăng tâi hâi pơkâ thế chêl thiăn tâng rêm pâ ai hlá mơ-éa chêh tơhrâ ton hâi ton hâi pơkâ mơnhên ki tro lŭp, tơpui tơno ƀă dêi rơpó; lơ tăng ‘nâi plĕng tơ’nôm luât ki tơbleăng ‘na hâi khế mơgêi tơpui tơno tơleăng mơnhên vâ pro hlâu ăm mơngế ki pâ chêl thiê̆n tung tơdroăng pêi pro hnoăng săm phoăng, xuân môi tiah pro tơniăn ki môi tuăn tung pơla xúa pêi pro tiô luât”.

Mâu hnoăng veăng ‘no mê xuân pơxúa troh tơdroăng kring vế tro tâ hnoăng ƀă ki pơxúa tro luât dêi kuăn pơlê, hlối kum mâu pơkâ dêi luât nhên, môi tuăn ƀă tơ‘lêi hlâu tâ tung pơla xúa.

Tơdroăng ki tơxâng tơmâng xo cho rêm tơdroăng veăng hnê tối xuân pơ xiâm ing tơdroăng ki ai khât tung tơdroăng, tối mâu tơdroăng pá, tơvâ tơvân tung pơla xúa luât. Kố xuân cho mơnhên ăm hlo tơdroăng mơjiâng luât đi đo châ tơmâng khât, hnoăng pêi pro dêi rêm râ, mâu kơ vâ cheăng ƀă kuăn pơlê.

Mâu tơdroăng veăng hnê tối tá tuăn tá mơno châ tơkŭm ing tơdroăng ai khât nôkố kố pơtối châ Khu kăn Kuô̆k hô̆i  kong pơlê Dak Lak tăng ngăn nhên, tơmâng xo, pro xiâm vâ tơpui tơno a rôh hôp. Mê cho túa ki vâ rêm luât châ pơkâ pêi pro khât cho tơkŭm tuăn vâ dêi Đảng, hiâm mơno kuăn pơlê, ai tiô pơkâ mơjiâng Tơnêi têa tro tiô luât xã hội chủ nghiã ƀă pêi cheăng rế pơxúa tro tâ hnoăng, ki pơxúa tơxâng dêi kuăn pơlê.