Ki xiâm cho môi tiah Kŏng ti Tơlo liăn Banana Brothers Farm, tơring M’Drak, kong pơlê Dak Lak nếo tê 100 tâ̆n priât ngi kong têa Sinuâ ƀă Hàn Quốc; Kŏng ti pêi cheăng tiô rơnó Ban Mê Green Farm hiăng kĭ hlá mơ-éa chôu vế ƀă tơkêa tê lối 100 container sầu riêng ƀă kong têa ki tơrŭm. Hên khu mơdró kâ dêi Dak Lak hiăng pơhlêh nếo, tơkŭm túa vâ mơdêk ki dâi lĕm dêi kế tơmeăm pêi lo ing chiâk deăng, châ tiô tơdroăng púi vâ tê ngi kong têa ê.

Môi tơdroăng ro ki ê tung tê tơmeăm pêi lo ing chiâk deăng a Dak Lak cho klâ xoăng rah ngăn kơphế ki dâi lĕm, kơphế lĕm pơtối châ mâu kơchơ tê mơdró kong têa ê vâ ‘nâi. Pakĭng kơphế tá hâi uâ, mâu tơmeăm kơphế ki uâ pơliê dêi kong pơlê xuân rế hía rế châ tối rơdêi tíu ối ai mâ a hên kong têa, kơpong tơnêi tơníu. Tung mê ai mâu kong têa ki xơpá la ai hên ki ai hlâu môi tiah Mih, Nhuk, Hàn Quốc, châu Âu.