Leh tơbâ 80 hơnăm Kăch măng Khế tơheăm châ tơƀrê ƀă Hâi mơjiâng Tơnêi têa lơ 2/9, ai mâu tơdroăng pêi ki xiâm: Tơdah đuốc tiô khôi vâi krâ nah, Tơdroăng leh koh hlá cơ, Ƀai pơchuât dêi kăn xiâm pơkuâ Đảng, Tơnêi têa; Pĕng mlŏi leh, Khu lêng tơƀai kơneăng koh phiu ro; Mơđah tơbleăng ăm lêng prôk lăm. Mâu khu lêng ki prôk pơtăng, prôk chêng ƀă vâ chê 16.000 kăn ƀô̆, mâu lêng, kŏng an rơtế kăn teăng mâ mâu râ kuăn pơlê, mâu hdroâng mơngế...Khu ki to rơxế prôk pơtăng ai tŭm mâu khu lêng gâk kring têa kơxĭ, lêng tơƀai, lêng pĕng kanŏng, lêng vê rơxế komƀa...ƀă hên rơxế đăk chủng. Khu lêng 4 kong têa Rusi, Sinuâ, Lếo, Kul xuân pơtroh khu lêng ki veăng prôk pơtăng. Klêi kơ’nâi hluâ leh đài, mâu khu lêng prôk pơtăng prôk tơkâ hluâ mâu troăng kân kơphô̆ vâ mơhno tuăn pâ tơrŭm pơla khô̆i ƀă kuăn pơlê.

A hbo plêng Hà Nội, Khu lêng pơkuâ ngăn Hbo plêng – Tơƀai tơkŭm po 9 tốp tơƀai ƀă lối 30 toăng tơƀai cho trưk thăng, tơƀai chơ tơmeăm, tơƀai hnê hriâm tơplâ, tơƀai phản lưk ƀă tơƀai ki pla mơhnhôk, tơkŭm chiâng hên đô̆i tơƀai tung Leh tơbâ. Rơtế tung rôh kố, a kơpong têa kơxĭ Cam Ranh (Khánh Hòa), mâu lêng tuk, xuân kơto pơtăng a têa kơxĭ, ƀă châ mơ’no tơdrêng tung um tơvi ‘na Plông kân Ba Đình.

*Tung roh kố, hên hĭn tơdroăng ki kal khôi túa lĕm tro, rơhdruê xoâng dế tơkŭm po lâp tơnêi têa. A Hà Nội, mơđah tơbleăng ‘’80 hơnăm troăng prôk Tơniăn krê – Tơniăn lĕm – Hơniêp lĕm’’ hiăng lôu péa tê kơtê kum kuăn pơlê sap ing hâi lơ 28/8 – 5/9/2025, a Tíu xiâm Mơđah tơbleăng Tơnêi têa, Cổ Loa, Đông Anh, Hà Nội. Mơđah tơbleăng veăng amê ai tâi tâng 34 kong pơlê, pơlê kong kơdrâm, 28 khu xiâm kơvâ cheăng ƀă mâu khu tê mơdró ki kơhnâ rơkê tung lâp tơnêi têa. Mơđah tơbleăng, mơhno mâu tơdroăng ki má môi dêi Tơnêi têa tung 80 hơnăm mơjiâng ƀă mơnhông tung tâi tâng kơvâ cheăng. Tơdrêng amê, tơbleăng khôi túa lĕm tro Việt Nam ƀă khôi túa lĕm rơpâu hơnăm mơnhông tơtêk; tơdroăng ki ai hên khôi túa lĕm dêi 54 hdroâng mơngế; tơdroăng ki ai hên dêi kế tơmeăm khoăng, tơmeăm pái kơpong ƀă mâu tơmeăm hngêi trăng ki má môi nah ƀă nôkố tung lâp tơnêi têa...

*Rơ’jiu Việt Nam veăng mơđah tơbleăng ƀă tíu ki mơđah tơbleăng “80 hơnăm Rơ’jiu Việt Nam rơtế prôk ƀă tơnêi têa”. Malối akố kuăn pơlê ối châ hlo kong ngê̆ ki ôh ti xê khât “Vêh ƀă rôh tơplâ ƀlêi trâng nah”: tâng a Plông kân Ba Đình 80 hơnăm hdrối nah, tơmâng pôa Hồ Chí Minh, kăn xiâm hnê ngăn tơnêi têa tâng a tíu ki pơchuât, pơchuât mơéa Tơniăn krê, tung tơdroăng ki hâk tơngăm, ƀriê tung hiâm mơno chiâng vâ phât hiâm, hơniâp ro tung idrâp têa kŏng, idrâp tríu dêi lối rơpâu ngế kuăn pơlê, rơtế ƀă kŏng têk tơhrâ rak vế Tơnêi têa. Bu tung to lâi hâi, “Vêh ƀă rôh ki mê nah” hiăng tơdah lối rơpâu ngế troh veăng ai mâ ƀă châ ngăn.

*Pơlê kong xiâm Hà Nội tơkŭm po tơdroăng ngê̆ thuât leh tơbâ 80 hơnăm Kăch măng Khế tơheăm châ tơƀrê ƀă Hâi mơjiâng tơnêi têa lơ 2/9 a péa tíu Cung Văn hóa Quần Ngựa ƀă Plông kân Kăch măng Tháng Tám ( a ngiâ Hngêi rơhdruê kân (Nhà Hát Lớn). Pơlê kong kân tơkŭm po 6 tíu pĕng mlŏi reăng ăm kuăn pơlê ngăn.

*Rơtế tung rôh ki mê, Pơlê kong kân Hồ Chí Minh xuân kô rơ’eăng bâ ƀă 4 tíu ki pĕng mlŏi reăng. Tơdroăng ki xiâm tung tơdroăng tơkŭm po a Pơlê kong kân kố ối cho tơdroăng ngê̆ thuât ki hơniâp ro tơkŭm po a 3 tíu: troăng Nguyễn Huệ (pơlê krâm 1), plông mơđah pa gong Công viên tíu xiâm Pơlê kong kân nếo (bêng Bình Dương) ƀă Plông kân Thùy Vân (bêng Vũng Tàu).

*A kơpong Tây Nguyên – Nam Trung Bộ, hên tơdroăng mơhno khôi túa lĕm tro, rơhdruê xoâng, tơ’noăng ivá, pĕng mlŏi reăng...xuân châ tơkŭm po lâp mâu kong pơlê vâ ăm kuăn pơlê ngăn. Ki má lối cho Leh hô̆i ‘’Ki lĕm Kơpong kân rơdâ – Têa kơxĭ ngiêt lĕm tơkŭm’’ a kong pơlê Gia Lai; Măng tĭng leh Khôi túa lĕm tro – Ôm hyô – Kơchâi kâ ƀă tơdroăng ngê̆ thuât a kong pơlê Dak Lak; Tơdroăng mơđah tơbleăng ‘’Lâm Đồng – 50 hơnăm tơdroăng phiu ro môi tuăn tơnêi têa’’, mơđah tơbleăng ngê̆ thuât a Đà Lạt, kong pơlê Lâm Đồng; Tơdroăng mơđah tơbleăng 50 hơnăm tơleăng lĕm Gia Lai – Kon Tum a Plông kân Đại Đoàn Kết, Pleiku, kong pơlê Gia Lai; tơdroăng mơđah tơbleăng ‘’Mơngiơk tơkŭm’’ rơtế Kơchơ mơđah tơbleăng kơvâ kơphế ƀă tơmeăm OCOP a Ƀuôn Ma Thuột, kong pơlê Dak Lak...