Chôu phut hlá cờ châ tơleăng lĕm kơneăng a kuâ hngêi Dinh Độc Lập kơhâi dé lơ 30/4/1975  hdrối nah ối chôu pâ tung tuăn ngôa dêi rêm ngế môi tiah tơdroăng leh kân- hâi peăng Hdroh châ tơleăng lem,  tơnêi têa châ tơrŭm môi, tơnêi têa  tơkŭm môi. Mê ôh tá xê to plâ ƀlêi trâng  kan dêi kuăn pơlê Việt Nam tung rôh tơplâ xâ tŏng gum tơnêi têa  ki trâm hên xơpá, mê ối cho  um vâ pơtih eăng bâ   dêi chủ nghiã khên tơnôu kăch măng, dêi tuăn mơ-eăm vâ tơniăn, xông rơdêi ing ivá tởŭm môi tuăn dêi hdroâng mơngế.

Plâ ƀlêi trâng lơ 30/4/1975 cho hnoăng ki mơ-eăm krá kak  tiah hmốu dêi hdroâng mơngế Việt Nam ‘na môi tơnêi têa tơrŭm chiâng môi, ôh tá chiâng tơklâ xua ing khu ki lâi vâ klâ.  Pôa Hồ Chí Minh Kăn xiâm hnê ngăn tơnêi têa ki apoăng - Ngế ki rơkê khât dêi hdroâng mơngế pin hiăng tối tơdroăng ki lĕm tro mê ôh tá la lâi hía:  “ Tơnêi têa Việt Nam cho môi, hdroâng kuăn ngo Việt Nam cho môi. Têa kroăng kô chiâng xiâ, ngo kô chiâng hê, la tuăn chân krá ôh tá la lâi kâi pơ’lêh”. Plâ ƀlêi trâng   hâi lơ 30/4 cho vâ mơhno ăm hlo tơdroăng ki tro dêi rơxông “ Ôh tá la lâi kơnía tâ ki châ  tơniăn ”.

Plâi ƀlêi trâng rơnó hơ’hui hơnăm 1975 xuân hiăng ‘măn hdró ki rơdêi a tung lâp plâi tơnêi, veăng môi tuăn hak tơdroăng mơhnhôk plâ tơleăng lĕm hdroâng mơngế a hên kơpong châu Á, châu Phi, Mih La tinh; mơhnhôk mâu hdroâng mơngế xông pơplâ khu ki ‘mêi nếo ki hriĕn vâ plâ tơbriêt pơkuâ  xêh ƀă pin hiăng plâ blêi trâng châ pơkuâ tơniăn dêi.  Mê cho Ƀlêi trâng ki tro  ‘ló, rơkong tơpui tôi hdrối a ngiâ mâu kong têa tung lâp plâi tơnêi tiah kố: môi hdrôang mơngế mơhé kŭn la tâng  pêi pro tơdroăng ki ‘ló tro , ‘nâi tơrŭm môi tuăn dêi rơpó  ƀă ai tuăn chân krá khên tơnôu, ƀă  ki veăng môi tuăn, veăng gum ing mâu vâi pú hmâ  dêi mâu kong têa tung lâp plâi tơnêi, dêi mâu lêng ki rơkê plĕng ƀă dêi kuăn pơlê hâk vâ hơniâp lĕm tung lâp plâi tơnêi , loi khât kô kâi ƀlêi khu xâ ki rơdêi tâ pin hên hdrôh.

Tơdroăng  tối  tơbleăng “Tơnêi têa Việt Nam cho môi, hdroâng kuăn ngo Việt Nam cho môi”  dêi  Pôa Hồ Chí Minh Kăn xiâm hnê ngăn tơnêi têa  ki apoăng ôh tá xê to môi tơdroăng ki ‘ló tro, môi troăng prôk ki tro,  mê ối cho ing plâi nuih  dêi rêm hdroâng mơngế thế pêi pro.

Tung pơla tơplâ, rơkong ki tối mê chiâng  xiâm tơdroăng ki pơtôu ivá rơdêi kân, vâ mơhnhôk rơdêi,  pro xiâm ăm chât rơtuh ngế  Việt Nam lo lăm tơplâ ƀă tuăn vâ “ Tơplâ ta troh hlâ vâk vế tơnếi têa”. Rơkong dêi Pôa cho rơkong tơpui tối ki tĭng, cho vâ pơtih dêi hiâm mơno mơ-eăm tơkâ luâ tŭm tơdroăng pá puât châi heăng  vâ khŏm châ tơbriêt pơkuâ dêi tơnêi têa ăm tơniăn lĕm hdroâng mơngế, lâp tơnei têa tơrŭm môi ƀă hơniâp ro phâi tơtô ăm kuăn pơlê.

Klăng tơdế chal hiăng prôk luâ riên sap hâi tơnêi têa cha tơleăng lĕm sap peăng kơnhŏng troh peăng hdroh, mâu idrâp dêi ƀai hơdruê Hâi vêh plâ ƀlêi trâng  xuân ối chuât  ro tung hiâm mơno dêi hdroâng mơngế Việt Nam. Mâu rơxông Việt Nam hâi kố ƀă xo ah hmôi  đi đo chôu pâ  hnoăng bă hnoăng tơplâ hlâ rêh xua vâ tơnêi têa châ tơniăn, xua vâ hơniâp ro phâi tơtô dêi kuăn pơlê ƀă xua vâ mơnhông tơƀrê dêi tơnêi têa dêi hdroâng mơngế.

Pin mơhno hiâm mơno ‘nâi mơnê kât kơ mâu vâi pú lâp plâi tơnêi mâu lêng ki rơkê, mâu kong têa xah hô̆i chuh nghiah nhŏng o, mâu khu tơrŭm tŏng gum ƀă kuăn pơlê ki hâk vâ hơniâp lĕm tung lâp plâi tơnêi - hiăng tơrŭm ƀăpin, veăng gum Việt Nam tung plâ mâu hơnăm tơplâ  vâ bro tơleăng lĕm hdrôang mơngế, xuân môi tiah tung tơdroăng ‘mâi mơnhông tơnêi têa ki hiăng tơ’nhiê klêi kơ’nâi tơplâ  tơplong.

Kơ’nâi 50 hơnăm tơnêi têa tơrŭm môi, pin  hiăng ai tŭm ivá , ai tŭm tuăn loi, ki hâk tơngăm ƀă ai tŭm tuăn têm tuăn mơ eăm vâ tơkâ luâ tơdroăng pá châi heăng rơtế ƀă dêi rơpó ngăn ‘na ngiâ - vâ tơdroăng tơplâ ki hiăng luâ mê ôh tá ai xếo kloh  ki tât pơl mâu ngế kuăn ki môi mơheăm môi hdrông hdrê Lạc Hồng.

 Ing tơdroăng mơnhông tơƀrê mê, luât pơkâ tŏng gum tơrŭm ƀă hdroâng mơngế đi đo châ Đảng ƀă Tơnêi têa  mơnhên tối cho rah xo troăng hơlâ pêi cheăng ton xŏn, cho xiâm dêi khu ki tơrŭm môi tuăn hdroâng mơngế. Pin hlê nhên mâu tơdroăng ki xiâm chiâng ai tơdroăng tơplâ - sap ing tơdroăng veăng tơmâng, pro tơklâ ing khu pá gong ta troh ing mâu ngế ai tuăn ‘mêi hriĕn vâ pro tơn’nhiê ki tơrŭm môi tuăn dêi hdroâng mơngế, vâi hnê tơdroăng ki kơneăm hêng hôu hriĕn pro ‘mêi tơdroăng kal kí.   La pin xuân hlê tiah kố: Rêm ngế Việt Nam, mơhé ối tung tơnêi têa lơ a kong têa ê, mơhé ối a peăng khu ki lâi dêi tơdroăng ton nah, xuân tơdjuôm xiâm rêi, môi tơdroăng pâ dêi rơpó pê dêi pơlê xiâm tơná , pâ dêi tơnêi têa.

Tơrŭm hdroâng mơngế ôh ti xê cho piu lôi tơdroăng ton nah lơ xut tah lôi tơdroăng ki phá tơ-ê, mê cho tơdah xo mâu víu ngăn ki phá ra phá dêi rơpó tung hiâm mơno ki ‘nâi hơ-ui ƀă loi nhuô̆m, vâ rơtế tơmiât troh tơdroăng pơkâ pêi kân tâ: mơjiâng môi tơnêi têa Việt Nam hơniâp lĕm, tơrŭm môi, ó rơdêi, rơkê plĕng, kro mdrŏng, vâ mâu rơxông kơ’nâi ah ôh tá la lâi châ hlo tơplâ, tơklâ ƀă hêng hôu dêi pó, châ rêh môi tiah pâ pôa pin nah hiăng trâm.

Pin ôh tá chiâng chêh pơtối tơdroăng ton nah, la pin chiâng pơkâ ăm tơdroăng cheăng tung la ngiâ. Tung pơla ton nah cho chôu vế, vâ mơnê ƀă xo tơdroăng mê vâ hriâm ƀối. La ngiâ cho athế rơtế ƀă dêi rơpó mơjiâng pro ƀă mơnhông.

Luâ tâ mâu ki lâi, rơxông nôkố ‘nâi nhên tơniăn krê ƀă tơrŭm môi ôh ti xê to tơdroăng ki xiâm má mơ’nui, mê ối cho tíu ki pơxiâm ăm môi tơdroăng cheăng ki nếo: tơdroăng mơjiâng môi tơnêi têa Việt Nam hơniâp lĕm, kro mơdrŏng, rơkê plĕng, mơnhông ƀă đi đo. Tâng môi tiah rơxông pâ ngoh nah hiăng chêh ‘măn tơdroăng lĕm ‘Tơnêi têa Việt Nam cho môi, hdroâng mơngế Việt Nam cho môi” ƀă mâu tơdroăng ki hlâ rêh châi heăng, mê rơxông nôkố athế pơhlêh tơdroăng lĕm mê chiâng ivá mơnhông, chiâng mơná mơeăm tung chal ki nếo.

Luâ rôh ki lâi, pin kal mơjiâng môi tơnêi têa cheăng kâ mơeăm xêh; môi tơnêi têa cheăng lêng – gâk kring tâi tâng kuăn pơlê, tŭm têk ƀă rơkê plĕng; môi khu pơkuâ tơdroăng kal kí iâ, ‘nâng, pêi cheăng xêt, tơƀrê, môi pơlê pơla mơnhông, tơrŭm ƀă rơkê plĕng.

Chal ki nếo ki pin dế pơtối prôk cho ƀă kong ngê̆ tuăn ngoâ rơkê ki kuăn mơngế pro, pơhlêh kơxô̆, cheăng kâ ngiât ƀă mơnhông krá tơniăn ton, pâ thế ai tuăn tơmiât nếo, túa pêi mơnhông nếo, kuăn mơngế nếo. Ki hdrối tâ, pin ối ai hên tơdroăng pơloăng mơnúa ‘na troăng pơkâ tŏng gum, ivá pêi cheăng, ki rơkê plĕng ‘na mâu ngế pêi cheăng, gâk kring kong prâi tơnêi tơníu, hbrâ mơdât pơreăng tâ tú, kong prâo pơhlêh ƀă tá mâu tơdroăng gâk kring khôi hmâ. La tơdroăng ton nah hiăng mơhno: hdroâng mơngế Việt Nam tá hâi ton tưrŏng xua mâu tơdroăng ki pá puât, pơloăng mơnúa. Tơdroăng ki pin ai tŭm ivá khên tơnôu vâ pơhlêh, ai tŭm hiâm mơno vâ mơeăm, ƀă ai tŭm tơdroăng tơrŭm vâ pro tơdroăng xơpá chiâng ivá mơeăm mơnhông há lơ ôh.

Ngăn peăng ‘na ngiâ, pin kô hâk tơngăm loi tơngah  tung ivá rơdêi dêi hdroâng mơngế Việt Nam, môi hdroâng mơngế hiăng to lâi xôh plâ ƀlêi trâng khu xâ vâ hdi xo pơkuâ ngăn tơnêi têa ƀă hiăng xông sap ing tơplâ, tối rơdêi tơná tung rôh tơplâ ton nah ƀă a ngiâ lâp plâi tơnêi. Ƀă khôi hmâ rơpâu hơnăm mơjiâng ƀă rak vế tơnêi têa, ƀă tơdroăng rơhêng vâ mơeăm ôh tá la lâi pơtê, ƀă mâu rơxông hơnăm ối nếo rơkê plĕng, ƀă mâu tơdroăng tơchĕng tơmiât pêi mâu tơdroăng ki kân kĭn, pâ nhuô̆m tơnêi têa, tơmiât pêi rơkê ƀă khên tơnôu – Viẹet Nam mơni kô ƀlêi chiâng.

Chal XXI cho chal  dêi mâu hdroâng mơngế ‘nâi pơkuâ dêi tơná ivá dêi tơná. Ƀă hdroâng mơngế Việt Nam, ƀă tâi tâng mâu ƀai hriâm sap ing ton nah, ƀă tâi tâng tơdroăng tơrŭm hâi kố, mơni kô pơtối chêh mâu tơdroăng ki nếo rơ’eăng tung mơnhông dêi tơná. Xua môi tơnêi têa Việt Nam tơniăn krê, hơniâp ro, kro mơdrŏng, rơkê plĕng, ai tíu ối ƀă rơkong tơpui kal tung mâu kong têa lâp plâi tơnêi.