Tâng tíu xiâm Tơbleăng tối tơnêi tơdro ƀă Tơbleăng hdrối kô ai têa rơlâu lân kân, Viện Vật lý Địa cầu ăm hlo, bú tung 20 hâi apoăng khế 7, a tơring Kon Plông, kong pơlê Kon Tum hiăng ai 70 hdrôh tơnêi tơhnâp, tơdro. Hdrối mê,  Tíu xiâm xuân hiăng tối pơtâng ai troh hrĭng rôh tơnêi tơhnâp, tơdro a bêng kố.

Tơdroăng rêh ối kơpong pá xôp dêi hngêi kơmăi on tơhrik Thượng Kon Tum, nâ Trần Thị Thu ƀă hên ngế kuăn pơlê a thôn 3, cheăm  Tân Lập, tơring Kon Braih tô tuăn rêm hdrôh tâng tối ‘na tơnêi tơhnâp:

“Kơpong kuăn pơlê ối pá xôp rơchôa. Kuăn pơlê tâng  tơnêi tơdro tô tuăn ‘nâng. Tâng a kơpêng ai tơnêi tơhnâp mê tơdjâk  klâi mơ’no tah têa lo pá xôp têa ki mơ’no tah hdrok hiu kô tê mê kuăn pơlê ki ối a kơpong kô tro têa lu lâp. Hmâ hlo vâi mơ’no tah têa lu hiăng lâp klêi mê ôh tá ‘nâi  rêh ối môi tiah lâi’’.

Ki khât gá, tung hrĭng rôh tơnêi tơhnâp, tơnêi tơdro tung pơla hdrối mê hía nah a Kon Plông, kuăn pơlê bê tâ tơnêi tơdro hlối. Kuăn pơlê xuân ‘nâi ai tơnêi tơhnâp, tơdro ing tơdroăng tơbleăng dêi kơ koan cheăng ‘na mê ƀă mâu tíu mơ’no hyôh rơ’jíu tối tê.

Jâ Bùi Thị Oanh, hngêi ối a thôn Vi Rin, cheăm Đăk Tăng, tơring Kon Plông tối tiah kố:        

“Kuăn pơlê vâi xuân hlo môi tiah hmâ tê. Hâi hlo ai ngế ki lâi hlâ ôh vâ xâu. Hâi hlo ki rơ-iô vâ tối khât ga ti mê. Akố hâi teăm hlo ai tơdroăng ki klâi ôh’’.

Hlo  hên tơdroăng tối tơnêi tơhnâp a tơring Kon Plông, vâ kuăn pơlê pôi tá xâu, pôi tá tô tuăn la xuân hnê pơchân pôi tá tơngôu, mâu  khu râ kăn kong pơlê Kon Tum hiăng tí tăng ngăn vâ ’nâi tơdroăng, hnê kuăn pơlê hbrâ ví, hnê tối pôi tô tuăn luâ râ ƀă thế hnê tối ti lâi vâ kuăn pơlê tơniăn tuăn. La tiô pôa Nguyễn Hữu Tháp, Kăn phŏ hnê ngăn Vi ƀan kong pơlê Kon Tum, ki pá nôkố cho hâi ai môi tơdroăng tí tăng ‘nâi plĕng ki lâi trâu tâ ‘na tơnêi tơdro tơhnâp a kơpong kố ƀă kố cho tơdroăng ki kong prâi pro ôh tá tơniăn ôh tá chiâng vâ rĕng tối tơbleăng hdrối mê chiâng kơdrâ:

“Pơtối hnê mơhno dêi mâu tíu pêi cheăng, kơvâ cheăng, mâu cheăm, bêng, tơring Kon Plông tơrŭm krá ƀă mâu Tíu xiâm tí tăng ‘nâi plĕng vâ tí tăng ngăn, hbrâ rơnáu hdrối ƀă tơnêi tơdro tơhnâp. Pâ Khu hnê mơhno cheăng tơnêi têa ‘na hbrâ ví xía vâ xua kong prâi pro ôh tá tơniăn thế tơmâng khât kum mâu cheăm tơring vâ ‘nâi tối tơbleăng hdrối, teăm hbrâ ví drêng ai tơnêi tơdro tơhnâp tung kong pơlê”.

Tiô ăm ‘nâi ing Tíu xiâm Tối tơbleăng tơdroăng tơnêi tơdro tơhnâp ƀă Tơbleăng hdrối ai têa rơlâu lân kân, Viện Vật lý Địa cầu tối, tung hrĭng rôh tơnêi tơhnâp, tơdro a tơring Kon Plông, kong pơlê Kon Tum sap hơnăm 2022 troh nôkố tơnêi tơhnâp ki tơdro têi má môi 4.7 cho a mơ’nui khế 8/2022.

Klêi rôh tơnêi tơhnâp mê, Ƀôrô Hnê mơhno cheăng dêi tơnêi têa ‘na hbrâ ví xía vâ tơnêi tơhnâp, môi tiah: Lăm ngăn a tíu mê; tơkŭm hnê ăm mâu kăn bô̆ a mâu cheăm, pơlê kân dêi tơring Kon Plông rế rơkê plĕng tơdroăng cheăng hbrâ ví; tơkŭm po hnê pơtâp hbrâ ví ƀă têa lân lu, tơnêi tơdro ƀă hên ki ê...

Laga troh nôkố hâi hlo ai tơmeăm khoăng khoa hok ki lâi tí tăng hriăn plĕng trâu tâ tung tơdroăng tí tăng ngăn vâ ’nâi ki xiâm, kơlo ki rơ-iô dêi tơnêi tơdro a kơpong tơring Kon Plông, kong pơlê Kon Tum vâ ing mê tối mâu pơkâ hbrâ ví ăm tơtro./.