Pôa Đặng Gia Duẩn, Kăn hnê ngăn Đảng ủy bêng Ea Kao, tối tiah kố ƀă tơdroăng pơkâ nhên mâu kơpong ôm hyô ki xiâm, Tơdroăng pơkâ kal thế hdró tơ’nôm mâu cheăm bêng chiâng tíu ki xiâm troh ôm hyô ki kal dêi kong pơlê. Pakĭng mê, ngế kăn mê tối pơkâ kố hdró mâu tơdroăng tơkêa pro ki pơxúa, rơtế ƀă kuăn mơngế ƀă teăng mâ kơphô̆, tung mê, ai tơdroăng ‘mâi hơ’lêh on tơhrik a 14 kơphô̆, xuân môi tiah mơdêk pơkâ mơnhông pro tơraih tơƀai Buôn Ma Thuột chiâng tơriah tơƀai lâp plâi tơnêi.

“Tíu pêi cheăng tơmeăm khoăng mê ngin ai 2 tơdroăng tơmiât môi cho ngiâ méa kơphô̆ mê tơdroăng tơkêa bro mơjiâng mâu troăng kơxái on tơhrik mâu kơphô̆ dêi kong pơlê. Má péa cho tơraih tơƀai, ƀă ki kal dêi kong pơlê nếo nôkố ƀă pin kô ai 2 tơraih tơƀai, râ dêi kong pơlê nếo nôkố ƀă ngin ai 2 tơraih tơƀai mê pơkâ hdró vâ mơnhông tơraih tơƀai Buôn Ma Thuột chiâng tơraih tơƀai lâp plâi tơnêi mê pin nếo mơnhông tơƀrê”.

 Mâ ngăn tơrŭm kơpong, pôa Lữ Ngọc Tân, Ngế pơkuâ Rak ngăn Kơpong cheăng kâ Phú Yên, tối nhên kal ‘no liăn pro troăng kơxái on tơhrik vâ xúa châ pơxúa a peăng Mâ Hâi Lu, xúa tung pêi cheăng ƀă kơmăi kơmok a kĭng têa kơxĭ.  Pôa Tân xuân pơkâ thế tăng ‘nâi plĕng troăng hrik djâ têa châu a kơno tuk Bãi Gốc troh Tây Nguyên drô hang lơng troăng kân tơdrăng Peăng Mâ Hâi Lo - Peăng Mâ Hâi Lu, vâ kơdroh kơxô̆ liăn logistics on tơhrik ‘mâi po tơdjêp kơpong.   

“Xiâm on tơhrik ‘mâi pro Peăng Mâ Hâi Lu hên, peăng Mâ Hâi Lo ƀă mâu kơpong kĭng têa kơxĭ pro on tơhrik vâ mơ’no on pơxúa ăm mơnhông kơmăi kơmok ki kal. Pakĭng pro on tơhrik mê tơmeăm khoăng hrik têa châu. Tâng pin tơkŭm ƀă vâ ‘no liăn krâ pro troăng klŏng têa châu ing Peăng Mâ Hai Lo,  Mâ Hâi Lu drô hang lơng troăng kân tơdrăng lĕm mê kơxô̆ liăn ‘no pro kô iâ tâ. Pin tơ’môe môi troăng klŏng ƀă ki xŏn hâi teăm châ 150 km. Kơxô̆ liăn ‘no hâi teăm hên la pêi tơƀrê”.

Vâ tối a cheăm, pôa Huỳnh Ngọc Oánh, Phŏ kăn hnê ngăn Đảng ủy bêng Tuy Hòa, tối nhên ki pơkâ tâk luâ tơdế kơxô̆ liăn pêi lo riân rêm ngế dêi kong pơlê tung hneăng ki nếo. Vâ ai tiah mê, tiô pôa, kal ‘no liăn hên a mơjiâng tơmeăm khoăng, malối cho troăng prôk, pakĭng mê pơtối rak vế ki rơdêi túa lĕm tro hôm hyô: Têa kơxĭ peăng Mâ Hâi Lo tơdjêp ƀă kơpong peăng Mâ Hâi Lu, pro xiâm ki po rơdêi tơdâng ‘na cheăng kâ ƀă pơlê pơla.

“Vâ pơtối rak tơmeăm khoăng ki rơdêi dế kong pơlê kal thế ‘no liăn mơjiâng tơmeăm khoăng mơnhông kơpong têa kơxĭ ƀă kong ngo; ôh ti xê thế mơnhông ‘na kơmăi kơmok ƀă peăng túa lĕm tro tiô pơkâ mê a tơmiât tiah kố ki rơdêi peăng mâ hâi lo cho têa kơxĭ, tơdjêp ƀă mâu túa lĕm tro pơtối rak vế ƀă tơrŭm pơla peăng Mâ Hâi Lu cho kong ngo kân krip, mê ki pá dêi ngin nôkố cho peăng tơdroăng ‘no liăn mơjiâng tơmeăm khoăng ki tơviah ‘na troăng prôk”.  

Mâu tơdroăng hnê tối mê pơtối ăm hlo hnoăng pêi pro, ki tơngah ƀă mơ-eăm pơ’lêh nếo, la ngiâ mơnhông Dak Lak chiâng tíu xiâm xông tơƀrê dêi kơpong Tây Nguyên ƀă kĭng têa kơxĭ peăng Hdroh tơdế tơnêi têa tung mâu hơnăm la ngiâ.