VOV4.Xơ Đăng - Hâi lơ 13/3, mâu khu xiâm, kơvâ cheăng, mâu kơ koan teăng mâ Việt Nam tơdjâk troh hiăng tơkŭm ăm péa hdroh tơƀai kơneăng chơ vâ chê 600 ngế kuăn pơlê Việt Nam ƀă rơpŏng hngêi lo ing Ukraina ngi Ba Lan ƀă Rumani vêh dêi a tơnêi têa tơniăn. Tung mê ai 138 ngế vâi ‘nĕng ing 3 khế troh 18 hơnăm, 70 ngế hơnăm hiăng krâ rơtế hên vâi kơdrâi ki dế mơ-êa ƀă mơngế ki châi ta mo.

Ôh tá iâ mơngế hiăng troh lối 30 hơnăm rêh ối pêi cheăng a Ukraina. Vêh dêi a tơnêi têa tung tơdroăng pá puât, hên ngế ôh tá ai hlá mơ-éa tung châ, ôh tá ai visa, ôh tá ai hlá mơ-éa mot lo. Laga, mâu kăn bô̆ kơvâ  cheăng hiăng hnê mơhno ăm Khu râ pơkuâ cheăng a tơraih tơ-ƀai kum pro ăm vâi hlá mơ-éa teăm tơdrêng tơdroăng chêh inâi, mơnhế vâ pro ăm vâi hlá mơ-éa kal rak vế dêi châ.

Gương tơplôu ƀă tơbleăng