VOV4.Xơ Đăng - Kơxo lơ 21/3, a pơlê kong xiâm Viêng Chăn, kong têa Lếo, pôa Nguyễn Chí Dũng, Ngế xiâm pơkuâ ‘na pơkâ túa cheăng ƀă Mơ’no liăn cheăng Việt Nam, Kăn xiâm hnê ngăn Vi ƀan tơrŭm cheăng Việt Nam – Lếo – ƀă Ngế xiâm pơkuâ túa cheăng ƀă mơ’no liăn cheăng kong têa Lếo, Kăn xiâm hnê ngăn Vi ƀan tơrŭm Lếo – Việt Nam Khăm-Chên Vông-Phô-Sỷ rơtế pơkuâ roh tơpui tơno khu tê mơdró Việt Nam – Lếo vâ thăm pêi pro mâu tơdroăng tơkêa bro kân dêi khu tê mơdró Việt Nam a kong têa Lếo ƀă mơ’no liăn cheăng mâu tơdroăng tơkêa bro mơ’no liăn cheăng nếo, djâ troăng pêi ton xŏn tung la ngiâ.

Hôp tơpui tơno khu mơdró kâ Vi ệt Nam -Lếo

Xông tơpui a roh tơpui tơno Mơnhên ‘na tơrŭm cheăng mơ’no liăn cheăng pơla péa tơnêi têa, pôa Nguyễn Chí Dũng mơnhên, hên tơdroăng tơkêa bro mơ’no liăn cheăng dêi khu tê mơdró Việt Nam a kong têa Lếo pêi cheăng châ tơƀrê, kum hên tung mơnhông mơdêk cheăng kâ – rêh ối pơlê pơla, tăng cheăng pêi ƀă mơdêk pêi lo liăn ăm rơpâu ngế pêi cheăng, tơ’nôm kơxô̆ liăn ngân tơnêi têa Lếo, ki má lối tung mâu kơvâ hyôh phôn, hngêi arak liăn, pêt ƀă uâ pro kơxu, mơjiâng pro ƀă uâ mơdiê tơmeăm kâ, kơchâi kâ, têa tôu ro ƀă hía hé.

Tiô xêo veăng tơlo ‘na xo hnoăng mơhá ƀă hnoăng cheăng liăn ngân ki ê dêi khu tê mơdró Việt Nam ăm Chin phuh Lếo tung 5 hơnăm achê kố châ lối 1 rơtal dollars.

A Sa Ly tơplôu ƀă tơbleăng