A tơraih tơƀai Phù Cát, khu ki ai tơdjâk troh Kŏng an xoăng péa khu rak vế krá tơniăn, sap ing kơpong pa gong troh tung dế hngêi tơkôm. Cheăng séa ngăn gâk kring tơniăn ăm rôh kơneăng châ pêi pro kơtăng khât, la xuân ối pro tơ’lêi hlâu, rĕng ăm tơmối to tơƀai. Chêh xo tơdroăng ki ai khât kố ăm hlo, hên tơmối mơnhên tối khât tơdroăng ki rơkê, tơniăn ƀă hlế kơ tơmối dêi khu cheăng ai tơdjâk troh. Nâ Hoàng Thị Thùy, tơmối lo ing Hà Nội tối:

“Troh a tơraih tơƀai Phù Cát mê á hlo tơdroăng gâk kring akố gá hlo tơniăn khât, pro hồ sơ mơ-éa gá rĕng. Tâng ai rôh vêh akố kơ’nâi ah nếo mê á kô ối rah xo tíu ôm hyô kố tíu ôm hyô Quy Nhơn môi xôh nếo”.

Tiô Ƀơrô Pơkuâ ngăn tơdroăng troh, vêh Kŏng an kong pơlê Gia Lai, bu tung pơla tơdế khế hdrối, khu ki ai tơdjâk troh hiăng rak tơniăn ăm vâ chê 300 rôh kơneăng, chơ dâng 50.000 ngế tơmối. Rêm hâi khu ối pêi séa ngăn lối chât tâ̆n tơmeăm ƀă kế ki tâ ‘măn tơmeăm pơtroh chơ ing péa tơraih tơƀai Pleiku ƀă Phù Cát.

Thươ̆ng tă Ngô Lam Sơn, Phŏ pơkuâ tơdroăng ki to tơƀai mot tung kong pơlê ƀă lăm ngi kong pơlê ki ê, Kŏng an kong pơlê Gia Lai ăm ‘nâi, khu kố hiăng séa ngăn pêi pro kơtăng mâu pơkâ, tơdrêng amê hlối mơ-eăm pro tơ’lêi hlâu má môi ăm tơmối, veăng pro tơ’mot hên kơdrâm tơmối troh a kong pơlê tung Hơnăm Ôm Hyô tơnêi têa.

“Kăn pơkuâ tíu pêi cheăng hiăng hôp ƀă pơkâ thế kăn ƀô̆ pêi pro tơdroăng cheăng a gong Tơraih tơƀai; tơkŭm pêi pro tro cheăng hnê tối, tơpui tơno ƀă tơmối ƀă pro tơ’lêi hlâu má môi vâ drêng vâi troh akố cho đi đo hlo tơniăn lĕm. Tơdrêng amê, hlối tơrŭm ƀă khu pơkuâ Phù Cát tơbleăng kơtúa paneau, tơdroăng vâ pro tiah lâi troh achê má môi ƀă tơmối dế ai mâ a tơraih tơƀai vâ vâi ngăn hlo, vâi pêi pro”.

Hơnăm Ôm hyô tơnêi têa 2026, kong pơlê Gia Lai pơkâ pêi tơdah dâng 15 rơtuh ngế tơmối tung tơnêi têa ƀă kong têa ê. Rơtế ƀă tơdroăng rak vế tơniăn gâk kring a tâi tâng mâu tơraih tơƀai, Gia Lai xuân pơkâ thế mâu khu pơkuâ tơƀai thăm mơnhông rôh kơneăng troh Pleiku ƀă Phù Cát, vâ chơ tơmối ăm rôh po tơdroăng ki kân tung hơnăm.