Kăn xiâm hnê ngăn Kuô̆k hô̆i khĕn kơdeăn khât mâu hnoăng veăng ‘no dêi pôa Olivier Brochet, Kăn teăng mâ tung mơnhông mơdêk tơrŭm cheăng kâ pơla Việt Nam - Pơhlăng, tung mê ai tơrŭm cheăng pơla Kuô̆k hô̆i Việt Nam ƀă Kuô̆k hô̆i râ má môi Pơhlăng. Kăn xiâm hnê ngăn Kuô̆k hô̆i tối, tơrŭm cheăng pơla Việt Nam - Pơhlăng dế hlo hên tơ‘lêi hlâu vâ pơtối mơnhông rơdêi, malối klêi kơ’nâi péa tơnêi têa mơdêk tơrŭm cheăng to a kơlo Tơrŭm tung tŭm tơdroăng cheăng, Kuô̆k hô̆i Việt Nam póu vâ rơtế ƀă Kuô̆k hô̆i Pơhlăng mơdêk tơpui tơno tơrá kăn rêm râ, tối ăm dêi rơpó ‘nâi túa pêi cheăng mơjiâng luât, séa ngăn ƀă mơdêk tơrŭm krá pơla péa tơnêi têa tung mâu kơvâ cheăng.

Pôa Trần Thanh Mẫn, Kăn xiâm hnê ngăn Kuô̆k hô̆i pâ thế pôa Olivier Brochet Kăn teăng mâ pơtối cho kông tơdjêp, veăng mơnhông mơdêk tơrŭm cheăng pơla Việt Nam - Pơhlăng thăm rế trâu rơdâ, khât tâ ƀă tơƀrê. Pôa Olivier Brochet, Kăn teăng mâ tối kố pơtối veăng ‘no hnoăng mơdêk tơrŭm cheăng krá pơla péa tơnêi têa, malối tung kơvâ cheăng ‘na Kuô̆k hô̆i.