VOV4.Xơ Đăng - Mâu hâi hiăng hluâ, a drô troăng tơkăng kong mâu kong pơlê Tây Nguyên, tơkŭm po hên tơdroăng ki má môi leh tơbâ hâi tâi tâng kuăn pơlê veăng gâk tơkăng kong lơ 3/3, mơhnhôk kơdrâm kuăn pơlê mâu hdroâng kuăn ngo tung kong pơlê veăng. A kơpong tơkăng kong 2 kong pơlê Dak Lak ƀă Dak Nông, Khu xiâm pơkuâ mô đô̆i gâk tơkăng kong 2 kong pơlê hiăng diâp mâu kơxuô tơmeăm ki kơnía păng ‘nâng, mơhnhôk kuăn pơlê kơpong tơkăng kong veăng gâk kring hnoăng pơkuâ tơkăng kong tơnêi têa.

Kong pơlê Dak Lak ai troăng tơkăng kong xŏn lối 73 km tơkoh ƀă kong pơlê Mondulkiri, kong têa Kul. Kơpong tíu tơkăng kong kong pơlê Dak Lak ai 4 to cheăm, ối tung 2 tơring Ƀuôn Đôn ƀă Ea Súp, cho tíu rêh ối dêi lối 22 rơpâu ngế kuăn pơlê ối tung 26 hdroâng kuăn ngo. Hơnăm 2021, khu râ đảng, khu kăn pơkuâ mâu cheăm hiăng tơrŭm krá tơniăn ƀă Mố đô̆i gâk tơkăng kong rak vế krá rơdêi hnoăng pơkuâ tơnêi tơníu, gâk kring tíu tơkăng kong tơnêi têa, rak vế gâk kring tơniăn a cheăm, tơring. Ki nhên, a mâu cheăm tơkăng kong hiăng ai 26 khu pú hên, lối 480 rơpŏng, lối 1.600 ngế chêh inâi veăng rak ngăn troăng tơkăng kong, tơneăn tâp hdró tíu tơkăng kong. Pakĭng mê, kuăn pơlê a 51 to thôn, pơlê tíu tơkăng kong kĭ tơhrâ veăng tơplâ mơdât mâu ngế ki pro xôi tung pơlê.

Tiô jâ Trần Lệ Thủy, kăn pơkuâ ngăn Đảng cheăm Ia Rvê: Tơdroăng “Tâi tâng kuăn pơlê veăng rak vế hnoăng pơkuâ tơnêi tơníu, gâk kring tíu tơkăng kong tơnêi têa tung tơdroăng nôkố” hiăng mơdêk hiâm mơno ki mơhnŏng va xêh dêi khu lêng ƀă kuăn pơlê veăng lăm pơtrui ngăn tíu tơkăng kong, teăm châ mơât mâu ngế ki pro xôi luât.

Hâi mơdĭng tơkăng kong a Dak Nông

“Tung pơla a chê kố vâi krâ nhŏng pêi pro kơtăng mâu tơdroăng pơka a tíu tơkăng kong. Tơdroăng ki pro xôi luât a tíu tơkăng kong vâ pêi pro tí tăng, lămluâ kuăn kiâ kong ki hên ‘na cheăng kâ hiăng kơdroh. Vâi krâ nhŏng o hiăng hlê plĕng rêm ngế kuăn pơlê cho môi to tơneăn rêh vâ rak vế hnoăng pơkuâ gâk kring tíu tơkăng. Ôh ti xê to vâi krâ nhŏng o hlê plĕng ôh tá pro xôi tơdroăng pơkâ tíu tơkăng kong me vâi krâ nhŏng o ối cho tíu xiâm ăm khu râ đảng, khu kăn pơkuâ xuân môi tiah đông mố đô̆i gâk tơkăng kong drêng ai mâu ngế ki tơviah, ai tơdroăng vâ tơkâ luâ tíu tơkăng”.

Kong pơlê Dak Nông ai troăng tơkăng kong xŏn lối 140 km tơkoh ƀă kong pơlê Mundulkiri, kong têa Kul, tơkâ luâ 7 to cheăm tơkăng kong. A “Hâi mơdĭng Tơkăng kong tâi tâng kuăn pơlê” tơkŭm po a mâu cheăm tơkăng kong, rơtế ƀă mâu tơdroăng cheăng pêi pro mơhno túa lĕm tro ngê̆ thuât dêi hdroâng kuăn ngo, mâu kăn hiăng tối ki rơkê plĕng tung pêi pro mâu tơdroăng tơ’noăng a cheăm, tơring. Ki xiâm môi tiah a cheăm Thuận An, tơring Dak Mil, 6 to tôh ki rak ngăn xêh troăng tơkăng kong hiăng veăng rơtế ƀă khu lêng gâk tơkăng kong rak vế troăng tơkăng kong, tơneăn tâp hdró tơnêi têa.

Kăn pơkuâ tơring Ea Súp, kong pơlê Dak Lak hbru tơmeăm ăm mâu đông mố đô̆i gâk tơkăng kong.

Hơnăm hdrối nah, hên rơpŏng kuăn pơlê a cheăm hiăng pleăng tơnêi, ăm mung hngêi ối, mung tơnêi vâ kăn ƀô̆, lêng pro tíu gâk pêi pro hnoăng cheăng hbrâ mơdât mot lo ôh tá tro luât ƀă hbrâ mơdât pơreăng Covid-19 a troăng tơkăng kong.

Tung hâi mơdĭng tơkăng kong tâi tâng kuăn pơlê cheăm Thuận An, Mố đô̆i gâk tơkăng kong kong pơlê Dak Nông hiăng diâp Kỷ niệm chương “Xua hnoăng pơkuâ gâk kring troăng tơkăng kong” ăm 1 ngế krê ai hên ivá veăng kum tung hnoăng cheăng rak ngăn, rak vế hnoăng pơkuâ, gâk kring tíu tơkăng kong. Vi ƀan Măt trâ̆n Tơnêi têa việt Nam kong pơlê Dak Nông prếi Mố đô̆i gâk tơkăng kong kong pơlê diâp 2 toăng hngêi tơrŭm ăm mâu rơpŏng ki ai tơdroăng rêh ối xơpá. Teăng mâ kăn pơkuâ cheăm diâp hlá mơéa khê̆n kơdeăn ăm mâu khu pú hên, mâu ngế krê ki kơhnâ rơkê tung pêi pro tơdroăng tơ’noăng tâi tâng kuăn pơlê veăng rak vế gâk kring tơniăn kơpong tíu tơkăng kong hơnăm 2021; hbru kế tơmeăm ăm mâu ngế ki châ kuăn pơlê loi nhuô̆m, rơpŏng kơtiê a cheăm Thuận An. Mố đô̆i gâk tơkăng kong Dak Nông diâp 7 hnoăng tơmeăm ăm mâu o hok tro tung tơdroăng “Mơdêk hvêa chêng o troh hngêi trung” ƀă “Kuăn roăng đông mố đô̆i gâk tơkăng kong” a Thuận An.

VOV Tây Nguyên

Katarina Nga tơplôu ƀă tơbleăng