Tơdroăng kố tơkŭm lối 150 ngế cho kăn ƀô̆ Đoàn, hô̆i viên droh rơtăm ƀă mâu khu ngế ki cheăng mơdró kâ hơnăm ối nếo kơhnâ rơkê dêi pái to tơnêi têa. Tơpui a rôh po tơdroăng, mâu kăn pơrá tối nhên: Việt Nam, Lếo ƀă Kul hiăng rơtế ƀă dêi rơpó tối ‘na tơdroăng kal, trâm mâ tơrŭm ton troh tá ah; ki hiăng rơtế prôk, tŏng gum dêi rơpó tơkâ luâ mâu hneăng ki xơpá dêi rôh tơplâ tơleăng lĕm hdrông mơngế.

Tung chal nôkố, pái to tơnêi têa pơtối rơtế ƀă dêi rơpó tung tơdroăng mơjiâng, rak vế ƀă mơnhông tơnêi têa. Tơrŭm tơroâ cho ivá ki kal vâ mâu kong têa po rơdâ tơrŭm cheăng ai pơxúa tung hên kơvâ cheăng: cheăng kâ, tê mơdró, ‘no liăn cheăng, hnê hriâm, khoa hok - kong ngê̆, túa lĕm tro ƀă ôm hyô. A rôh po tơdroăng, Khu pơkuâ ngăn Đoân Gia Lai hiăng kĭ tơkêa hlá mơ-éa chôu vế tơrŭm cheăng pơla hơnăm 2026 – 2030 ƀă Khu pơkuâ ngăn Đảng mâu kong pơlê Sekong, Salavan ƀă Attapeu (Lếo) vâ pêi pro mâu tơdroăng tơhrâ mơnhông.