Hên xơpá, tơvâ châ pâ thế kal rĕng tŏng gum. Troăng tơkêa bro troăng kân xŏn tơdrăng Bảo Lộc – Liên Khương cho tíu troăng tơkŭm mơ’nui dêi troăng kân tơdrăng Dầu Giây – Liên Khương ai tâi tâng ki xŏn vâ chê 74km. Châ kơchuâ pro ăm 4 toăng rơxế kơtâu, tung hneăng má 1 trêi troăng rơdâ 17m (4 toăng rơxế kơtâu, ki têi cho 80km/h), ‘no liăn pro tiô tơrŭm cheăng tơnêi têa – krê (PPP), túa tơkêa mơjiâng pro – tê mơdró – pơcháu (BOT), ƀă tâi tâng kơlo liăn pro hneăng má 1 cho lối 17.700 rơtal, pro tung pơla 30 khế.

Tơpui a rôh pêi cheăng, pôa Nguyễn Hồng Hải, Phŏ kăn hnê Vi ƀan hnê ngăn kong pơlê Lâm Đồng pơkâ thế mâu khu râ, pơkuâ cheăng ki ai tơdjâk kal rĕng pro klêi mâu hô sơ, mơ-éa tro tiô pơkâ. Malối cho cheăng xo tơnêi, xo tơvêh tơnêi athế châ pêi pro nhên,  pêi pro mâu tơdroăng pơkâ, mâu tơdroăng ki kal. Khu ngăn chiâk deăng ƀă Hyôh kong prâi tơkŭm tŏng gum xơpá ki ai tơdjâk troh cheăng xo tơnêi dêi mâu kơpong pro pơlê nếo.