Hnó pêi pro tơdroăng mơhnhôk djâ thế dêi Ngế pro xiâm hnê ngăn Chin phuh ‘na ‘’500 hâi măng mơjiâng pro mơjiâng 3.000 km troăng kân – tơdrăng ăm phêp rơxế kơtâu têi’’ tung dế khế 8/2024, mâu khu ki tơdah mơjiâng pro a drô troăng kân ăm phêp rơxế kơtâu têi Khánh Hòa – Buôn Ma Thuột hiăng mơhnhôk hrĭng ngế kih sư, kŏng nhân ƀă kơmăi kơmok rơxế lo pêi ‘’3 xoh, 4 khu cheăng tung 1 hâi măng’’, pêi pro đi đo.

Troăng kân xŏn 117,5 km, ai 4 troăng tung dế ki khu rơxế tơluâ dêi pó, tâi tâng kơlo liăn mơ’no pro vâ chê 2.000 rơtal liăn, mơ-eăm pêi kêi đeăng troăng kân – tơdrăng kố a mơ’nui hơnăm 2026 ƀă ăm rơxế, kuăn mơngế prôk lăm pơxiâm sap apoăng hơnăm 2027 ah.

Troh nôkố, 2 troăng kân tung kơdâm tơnêi pêa pá hơ’vá, pêa pá hơ-ếo xŏn lối 1.700 met a troăng kân ăm phêp rơxế kơtâu têi tơdjêp péa kong pơlê Khánh Hòa ƀă Dak Lak hiăng pro kêi, tung mê troăng kân tung kơdâm tơnêi pêa pá hơ’vá châ 82% tơdroăng cheăng.

Tơdroăng pêi thâ, kơtăng a drô troăng ki dế pro mê, cho mơhno tơdroăng ki khŏm mơ-eăm pêi kêi dêi khu rah xo pro ƀă mâu tíu pêi mơjiâng tung tơdroăng pêi pro pơkâ mơjiâng troăng klông ki kân, xŏn dêi tơnêi têa.