VOV4.Xơ Đăng - Kơxo gâ hâi lơ 10/3/1975, mâu tíu ki blong plâ dêi mô đô̆i pin hiăng dôu pháu hơnêa adrêng mot plâ tung đông xâ Mai Hắc Đế ƀă mâu đông lêng ngŭi ki ê a pơlê kong krâm Ƀuôn Ma Thuột, nôkố cho pơlê kong kơdrâm Ƀuôn Ma Thuột, cho tíu ki xiâm vâ pơtối blong plâ xâ pro tơleăng lĕm Peăng Hdroh, pro tơnêi têa tơrŭm chiâng môi. Klêi kơ’nâi 47 hơnăm châ tơleăng lĕm, Ƀuôn Ma Thuột hiăng hơ’lêh chiâng troăng ki “tơtro nếo, hloh hlê rơkê plĕng, ƀă pơtối rak vế khôi túa, vêa vong hdroâng kuăn ngo”, chiâng kơphô̆ ki xiâm dêi kơpong Tây Nguyên.

Đăi tă Nguyễn Xuân Thụ, 67 hơnăm, pêi cheăng tung Trung đoân 25 Lêng tơleăng lĕm Trung Trung Bộ veăng tơplâ a Tây Nguyên 1975, nôkố chiâng kuăn pơlê kong kơdrâm ki pôa veăng tơplâ xâ. Lăm pôu kơpong tíu chôu ‘mrâm pháu, răng kơnŏngMai Hắc Đế, bêng Tân Thành, pôa tối, klêi kơ’nâi tơplâ kơpong kố tro ƀom pơtôu pro tơnêi kơhlong kơhlăng, kuăn pơlê tơprâ tơprŭng. Laga nôkố, Mai Hắc Đế xuân hiăng chiâng tíu chôu ‘măn tơmeăm khoăng ton nah, mơnhông mơdêk râ Tơnêi têa. Pôa Thụ pâ tơdroăng ton nah:

‘’Trung Đoân 25 ngin tơdah hnoăng cheăng tơplâ mơdât troăng 21 (cho troăng kân lăm ngi kong pơlê ki ê kơxô̆ 26 ing Ƀuôn Ma Thuột lăm Nha Trang nôkố). Đông lêng ngin tơplâ mơdât a tíu tơplâ xâ ó ngo 519, peăng kơnhŏng pơlê kân tơring M’Drak, mê cho tíu gak Bảo An. Pin pĕng hnêa  sap ing kơxo má lơ 5/3, vâ pơxiâm roh tơplâ hbrâ plâ ƀâ pơlê kong krâm Ƀuôn Ma Thuột.

A kơxo má lơ 10/3, khu lêng ki xiâm dêi Khu lêng tơleăng lĕm Sư Đoân 320 mot plâ a kơpong Mai Hắc Đế kơ’nâi mê châ pơkuâ tâi tâng Ƀuôn Ma Thuột; ƀă Sư Đoân 10 mê tơkŭm plâ ƀâ đông lêng a Đức Lập (tơring Dak Mil, kong pơlê Dak Nông nôkố, troh kơmăng lơ 11/3 mê mâu đông lêng tơleăng lĕm hiăng châ pơkuâ tíu tơplâ. Tơdroăng tơplâ Tây Nguyên ƀlêi trâng tâi tâng’’.

Pơlê kong kơdrâm Ƀuôn Ma Thuột dế tơmiât pêi troh pơkâ chiâng pơlê kong kơdrâm rơkê, rơxông nếo ƀă pêng păm khôi túa lĕm tro

Ing môi pơlê krâm tro tơplâ ‘nhê, klêi kơ’nâi 47 hơnăm mơjiâng mơnhông mơdêk, troh nôkố Ƀuôn Ma Thuột hiăng ƀă dế chiâng pơlê kong kơdrâm ki rơkê, rơxông nếo, pêng păm khôi túa lĕm tro. Tơdroăng rêh ối dêi kuăn pơlê rế hía rế châ mơdêk, hngêi trăng, troăng klông, khăm pơlât, hnê hriâm, tíu rêh ối rế hía rế châ pơ’lêh. Krâ pơlê cho pôa Y Siu Byă ối a ƀuôn MDuk, bêng Ea Tam tối ăm ‘nâi:

‘’Hdrối nah tơdroăng rêh ối dêi kuăn pơlê pá puât laga klêi kơ’nâi châ Đảng ƀă Tơnêi têa tơmâng mê chôa ‘lâng châ pơ’lêh. Nôkố troăng tung pơlê châ tôh ƀê-tông tâi tâng, 100% kuăn pơlê hiăng ai on tơhrik xúa, 95% châ xúa têa krúa. Kơpong pơlê mê xuân ai hngêi trung hriâm, hngêi pơkeăng, hngêi păn roăng vâi hdrêng ƀă hngêi mơhno túa lĕm tro pơlê pơla vâ tơkŭm hôp. Mâu rơpŏng kuăn pơlê pơrá ai rơxế honđa, thăm nếo hên rơpŏng hiăng châ rôe ôtô ƀă hía hé’’.

Pôa Nguyễn Đình Trung – Kăn cheăng tung Tíu xiâm Đảng, Kăn pơkuâ hnê ngăn cheăng Đảng kong pơlê Dak Lak pơkuâ pêi cheăng ƀă Khu pơkuâ cheăng Đảng pơlê kong kơdrâm Ƀuôn Ma Thuột ‘na mơnhông mơdêk pơlê kong kơdrâm Ƀuôn Ma Thuột

Ƀuôn Ma Thuột cho tíu kuăn pơlê rêh ối tê mơdró kơdrâm kuăn pơlê má môi kơpong Tây Nguyên. Pơlê kong kơdrâm nôkố ai vâ chê 380 rơpâu pơ’leăng mâ mơngế, lối 40 hdroâng mơngế nhŏng o rơtế rêh ối. ‘Na hngêi trăng, troăng klông, nôkố pơlê kong kơdrâm hiăng ai tơraih tơ-ƀai kơneăng tung tơnêi têa ƀă dế tơmiât pêi la ngiâ kô ai troăng kơneăng troh lâp plâi tơnêi; Hngêi trăng troăng klông tung pơlê kong kơdrâm, troăng kân pakĭng pơlê kong kơdrâm peăng mâ hâi lo, peăng mâ hâi lo rơtâ tá pơlê kong kơdrâm dế châ mơjiâng pro kêi đeăng; Hngêi trung hnê hriâm, hngêi pơkeăng rế hía rế mơnhông mơdêk; 8 cheăm dêi pơlê kong kơdrâm xuân hiăng kêi đeăng pơkâ tơnêi têa mơjiâng thôn pơlê nếo; 13 bêng pơrá cho bêng mơhno túa lĕm tro; pêi lo liăn rêm pơ’leăng mâ mơngế dêi pơlê kong kơdrâm châ vâ chê 100 rơtuh liăn tung hơnăm 2021; hên kơpong hngêi kơmăi kơmok; mâu tơdroăng tơkêa bro hngêi ối tíu pơlê kong kơdrâm châ mơ’no liăn mơjiâng pro rế hía rế hên; kơlo tơtêk cheăng kâ 5 hơnăm hiăng hluâ châ kơlo 11 – 12%/hơnăm.

Pôa Từ Thái Giang – Kăn pơkuâ hnê ngăn cheăng Đảng pơlê kong kơdrâm Ƀuôn Ma Thuột tối, vâ mơjiâng pơlê kong kơdrâm Ƀuôn Ma Thuột chiâng tíu rêh ối tê mơdró Tíu xiâm kơpong Tây Nguyên, mâu râ kơvâ cheăng dế mơjiâng ƀă pêi pro mâu troăng pêi ki tơtro mơnhông mơdêk tiô rêm hneăng:

‘’Pơlê kong kơdrâm dế thăm tah lôi mâu tíu ki kreăng ‘na tơnêi tơníu, rah troăng mơhnhôk mơ’no liăn cheăng tơtro vâ mơnhông mơdêk cheăng kâ. Thăm hnê mơjiâng khu kăn ƀô̆, kŏng chưk, viên chưk ki rơkê tiô teăm tơdrêng troăng pêi 4.0 vâ pơ’lêh pro mơ-éa. Mơdêk hlê plĕng dêi khu đảng viên, kuăn pơlê ‘na hlê plĕng ki kal tung tơdroăng mơjiâng mơnhông mơdêk pơlê kong kơdrâm, mơjiâng tơdroăng mơhnhôk kêi đeăng hnoăng cheăng pơkâ mơ’no’’.

Mơnhông mơdêk pơlê kong kơdrâm Ƀuôn Ma Thuột rơxông nếo, pêng păm khôi túa lĕm tro kuăn pơlê tung kố

Tiô pôa Nguyễn Đình Trung – Kăn pơkuâ hnê ngăn cheăng Đảng kong pơlê Dak Lak, tung Mơgêi kơxô̆ 67 dêi Khu xiâm kal kí hơnăm 2019 tối nhên tơdroăng pơkâ mơnhông mơdêk troh hơnăm 2030, troăng tơmiât pêi troh hơnăm 2045, pơlê kong kơdrâm Ƀuôn Ma Thuột, tíu ki má môi dêi kong pơlê Dak Lak chiâng tíu kơdrâm kuăn pơlê rêh ối tê mơdró Tíu xiâm kơpong Tây Nguyên, tiô troăng ‘’rơkê, tiô rơxông nếo ƀă pêng păm khôi túa lĕm tro’’.

Vâ pêi pro pơkâ kố, mâu hơnăm hiăng hluâ Đảng ƀă Tơnêi têa hiăng mơ’no chât rơtal liăn mơjiâng mâu tơmeăm khoăng ki xiâm môi tiah: Troăng kân Hồ Chí Minh tơkâ Dak Lak, Hngêi pơkeăng kân kơpong Tây Nguyên, troăng kân pakĭng pơlê kong kơdrâm peăng mâ hâi lo, peăng mâ hâi luô, thăm po rơdâ tơraih tơ-ƀai Ƀuôn Ma Thuột ƀă hía hé kum thăm mơnhông mơdêk ó rơdêi pơlê kong kơdrâm tối krê xuân môi tiah kơpong Tây Nguyên tối tơdjuôm.

Pôa Nguyễn Đình Trung tối ăm ‘nâi, Pơkâ Hneăng hôp Đảng ƀô̆ kong pơlê Dak Lak roh má XVII hneăng hơnăm 2020 – 2025 xuân hiăng mơjiâng ƀă mơhno nhên pơkâ pêi hnoăng cheăng xiâm tung hâi khế vâ mơjiâng pơlê kong kơdrâm Ƀuôn Ma Thuột chiâng Tíu xiâm kơpong Tây Nguyên tiô tơdroăng mơgêi kơxô̆ 67 dêi Khu xiâm kal kí.

‘’Má môi, kal tơkŭm pơkâ pro Ƀuôn Ma Thuột tơtro ƀă pơkâ pro dêi kong pơlê ƀă lâp tơnêi têa, tơdrêng amê tơrŭm krá tơniăn pơkâ pêi pro tâi tâng ‘na mơjiâng xuân môi tiah pơkâ pêi tơnêi tơníu tung hneăng la ngiâ. Má péa, kal tơkŭm mơ’no liăn cheăng mơjiâng pơlê kong kơdrâm Ƀuôn Ma Thuột tŭm têk, krá tơniăn tung rêm kơvâ cheăng.

Pơtối mê, kal mơnhông mơdêk ivá tung pơlê kong kơdrâm ƀă mơhnhôk pakong kơxô̆ liăn mơ’no cheăng ing tơnêi têa vâ tơkŭm mơjiâng pro mâu tơdroăng tơkêa bro ki xiâm, ví pro ôh tá tơkŭm, choâ ‘lâng pro Ƀuôn Ma Thuột chiâng tíu xiâm kơpong Tây Nguyên. Ƀă má pŭn, mơnhông mơdêk cheăng kâ – rêh ối pơlê pơla tung pơlê kong kơdrâm Ƀuôn Ma Thuột ing troăng mơnhông mơdêk cheăng kâ, tơtrŏng mơnhông mơdêk trâu hơngế, pơ’lêh thế tâk chôa ‘lâng ki châ hôm păng ‘nâng tung mơnhông mơdêk pêi cheăng xúa kơmăi kơmok…’’.

Ƀă tơmeăm ki ai hlâu rơtế tơdroăng khŏm mơ-eăm dêi khu cheăng kal kí, tơdroăng môi hiâm mơno dêi mâu râ kuăn pơlê, tung la ngiâ ôh tá hơngế Ƀuôn Ma Thuột dế chôa ‘lâng krá tơniăn la ngiâ pêi châ pơkâ chiâng tíu kơdrâm kuăn pơlê rêh ối tê mơdró Tíu xiâm kơpong Tây Nguyên. Kố cho môi tíu kơdrâm kuăn pơlê rêh ối tê mơdró tơxâng vâ rêh ôh tá xê to mâu kong pơlê Tây Nguyên mê ối ƀă lâp tơnêi têa.

Tuấn Long chêh

A Sa Ly tơplôu ƀă tơbleăng