Môi tung mâu hok tro ki châ điêm tơ’noăng hên tung rôh tơ’noăng THPT hơnăm kố mê cho o Bùi Thanh Lâm – hok tro Hngêi trung THPH Chuyên Hùng Vương, ối a bêng Diên Hồng, kong pơlê Gia Lai. Lâm cho môi tung iâ kơxô̆ ngế hok tro a kong pơlê châ điêm hên cho 10 điêm môn nâl Ănglê. Tối ‘na tơdroăng ki châ điêm hên kố, Lâm tối ro ƀă kơdrâ. ‘Na ki rơkê plĕng tung hriâm tâp, Lâm tối nhên ki kal dêi tơdroăng ‘nâi nhên mâu tơdroăng tung hriâm ngữ pháp ƀă từ vựng ing hên hơnăm. Malối, á ối hbrâ rơnáu xêh tơkŭm mâu túa hriâm ki rơkê plĕng, môi tiah hriâm ngăn ing YouTube ƀă nâl Ănglê hmâ hriâm ngăn to khoa hok vâ pơhlêh túa ki hmâng ƀă pro chiâng rơkê plĕng hên từ vựng. Ing phôn, Lâm tối:

“Ko ƀai xoăng ăm hok tro gá nhên, xua kâu tơ’lêi mê gá pro tơ’lêi, tâng ko ƀai pá mê gá pá khât hlối. Á tơmiât vâ châ điêm 10 mê kal ai tơdroăng ki hlê plĕng sap ing tơxĭn nah troh nôkố, chôu từ vựng; tâng rơkê ngữ pháp ƀă ‘nâi nhên tâi tâng mê pro ƀai gá tơ’lêi. Á hmâ ngăn mâu kênh Youtube ai hên từ vựng, tơpui tơ’lêi hlê môi tiah Bsport, lơ Mini Earth ƀă hên kênh ki ê nếo”.

O Bành Gia Huân, hok tro Hngêi trung THPT chuyên Lê Quý Đôn (Quy Nhơn) cho môi tung mâu hok tro ki xuân rơkê má môi châ péa to điêm 10 cho môn nâl Ănglê ƀă Vật lý. Tơdroăng ki châ điêm hên kố ôh ti xê cho tơdroăng ki hâk tơngăm krê dêi o mê ối cho tơdroăng hâk ro tơdjuôm dêi hngêi trung ƀă rơpŏng hngêi. Vâ châ điêm hên môi tiah mê, Bành Gia Huân hiăng ai môi rôh hriâm rơbot ƀai rơkê ƀă túa ki hriâm tâp rơkê. Ƀă môn Vật lý, tơdroăng hâk vâ khoa hok hiăng gum Huân vâ hriâm môn ki kố tiô túa ki hâk vâ xêh. O đi đo pro mâu ƀai ki pá, tăng ‘nâi mâu tơdroăng ‘na lĭ thuyê̆t ƀă thưk hanh pro ƀai mơnúa ngăn vâ ‘nâi dêi tơdroăng hriâm ƀă pro hmâ ƀă tơdroăng ki mot tung lâm tơ’noăng. Ƀă môn nâl Ănglê, maluâ kơdrâ ‘na điêm kơxô̆ ki tơná châ la á xuân ối hâk tơngăm châ điêm môi tiah kố cho môn ki á hâk vâ:

“Á kơdrâ khât xua môn nâl Ănglê vâi hiăng xo tâi ko ƀai ƀă mơéa nhăp mê á ôh tá chiâng châ̆m ngăn. A hngêi trung á hriâm lâm chuyên Anh mê nếo xuân ối tung khu ki châ rah xo lăm tơ’noăng hok tro rơkê tơnêi têa mê châ hngêi trung hnê rơbot ăm hên. Drêng á ối a hngêi mê á hmâ ngăn mâu video tơpui nâl Ănglê vâ hriâm tơmâng ƀă hriâm ƀối hên tơdroăng”.

Jâ Nguyễn Thí Bé, nôu o Bành Gia Huân, ôh tá kâi kơtuâ dêi tơdroăng ro ƀă tơdroăng hâk tơngăm. Jâ Bé tối, rơpŏng đi đo cho ngế ki mơhnhôk kana, pro tơ’lêi hlâu má môi vâ Huân tơkŭm tung hriâm tâp. Ƀă tơdroăng ki ‘nâi nhên ƀă troăng tơmiât nhên, Huân dế hbrâ rơnáu ăm tơdroăng ki vâ mot hriâm a đăi hok ƀă tiô tơdroăng ki o hâk vâ hriâm.

“Tơdroăng púi vâ dêi muăn mê cho châ plah Đại học Bách khoa Pơlê kong kân Hồ Chí Ming, Khoa Khoa học Công Nghệ mê rơpŏng đi đo mơhnhôk, kơvâ hriâm mê gá pá mê hriâm athế mơeăm khât vâ ‘nâi mâu tơdroăng”.

Tung kơxô̆ 327 ngế hok tro a Gia Lai châ điêm 10 a hneăng tơ’noăng mơgêi râ má pái THPH 2025 ki hên cho mâu môn ối tung tôh hợp Khoa học xã hội ƀă Khoa học tự nhiên. Tơdroăng kố ăm hlo ki tơdâng tung tơdroăng ki rơkê plĕng ‘na hnê hriâm ƀáw ivá hriâm dêi hok tro a kong pơlê.