VOV4.Xơ Đăng - Mơgêi rôh pêi cheăng ƀă kăn pơkuâ kong pơlê Khánh Hòa pơla hdrối kố nah, pôa Phạm Minh Chính, Ngế pro xiâm hnê ngăn tơnêi têa tối nhên Khánh Hòa athế pro tơ’lêi hlâu nếo vâ tơ’mot kơxô̆ liăn ‘no ing kong têa ê ƀă tơmâng ngăn troh túa pơkâ, mơjiâng tơring chuăn rơlố Trường Sa chiâng tíu xiâm cheăng kâ, mơhno túa lĕm tro, pơlê pơla a têa kơxĭ, chiâng pơlê kong kơdrâm krá rơdêi rak vế hnoăng pơkuâ chuăn rơlố. Ngế pro xiâm hnê ngăn tơnêi têa pơchân tơdroăng ki pơkâ mơjiâng chuăn Trường Sa chiâng tíu xiâm cheăng kâ, mơhno túa lĕm tro pơlê pơla a têa kơxĭ dêi lâp tơnêi têa ƀă chiâng pơlê kong kơdrâm krá rơdêi rak vế hnoăng pơkuâ chuăn dêi Tơnêi têa.

Pôa Phạm Minh Chính, Ngế pro xiâm hnê ngăn tơnêi têa

Tơdroăng kố kal pêi rế rĕng rế ‘ló ƀă klêi kơ’nâi túa pơkâ athế ‘măn chôu liăn vâ pêi, ki hdrối tâ châ kơjo kum liăn mơjiâng tíu xiâm ‘na tơdroăng tơnăng ká akố, pơtối mê cho mơhnhôk kuăn pơlê veăng mơnhông cheăng kâ rêh ối pơlê pơla, tơniăn tơdroăng rêh ối ton xŏn a chuăn, tiô tro tơdroăng pơkâ dêi Đảng ƀă Tơnêi têa, tung tơdroăng luât pơkâ kong têa ê, malối cho tơdroăng tơkêa Khu lâp kong têa ‘na Luât têa kơxĭ UNCLOS hơnăm 1982.

Katarina Nga tơplôu ƀă tơbleăng