Tơdroăng rah xo Khu râ kăn pơkuâ Đảng ƀô̆ kong pơlê Dak Lak hneăng hơnăm 2025 – 2030 ai 122 ngế kăn, Khu pơkuâ hnê mơhno Tỉnh ủi ai 38 ngế kăn pêi cheăng. Mâu kăn ƀô̆ ki xiâm tơniăn pêi cheăng rak tiô khôi ton, tơdjêp ƀă mơnhông pơla mâu rơxông. Hên kăn ƀô̆ hiăng châ hnê mơjiâng, pơhlêh tíu pêi cheăng, xing xoăng tíu cheăng, xúa pêi cheăng ƀă chiâng pêi cheăng ing tơdroăng pêi cheăng nôkố. Laga tơdroăng rah xo kăn ƀô̆ ôh tá xê to rah tŭm kơxô̆ mơngế pêi cheăng. Tơdroăng ki kal tâ cho rah xo tro mơngế ƀă pro tơ’lêi hlâu vâ kăn ƀô̆ chiâng rế rơkê.

Ki khât gá ăm hlo, kơxô̆ kăn ƀô̆ hơnăm ối nếo, malối cho tung pơkâ Khu pơkuâ hnê ngăn Đảng ƀô̆ kong pơlê, ối iâ; kơxô̆ kăn ƀô̆ kơdrâi a mâu kơvâ cheăng tá hâi hên. Ki rơkê plĕng tơtro ƀă tơdroăng cheăng nếo xuân tá hâi tơdâng tơ'mô. Ai kăn ƀô̆ ối tơvâ tơvân drêng pơhlêh troh mâu kơvâ cheăng ki pá môi tiah liăn ngân, tơnêi tơníu, mơjiâng pro tơmeăm khoăng. Tung tơdroăng pêi cheăng dêi khu kăn pơkuâ kong pơlê péa râ, hiâm mơno xâu tơdroăng cheăng, xâu ôh tá tro, xâu pôu râng hnoăng cheăng xuân ối cho tơdroăng ki kal châ ngăn nhên.

Ing tơdroăng ki ai khât a pơlê cheăm, pôa Vũ Hồng Nhật, Kăn pơkuâ hnê ngăn Đảng ủi cheăm Quảng Phú tối tiah kố, tơdroăng ki vâ mơnhên ngăn kăn ƀô̆ mơ'nui cho ing tơdroăng pêi cheăng.

“Drêng hiăng mơnhên tro tíu ki kreăng thế tơkŭm mơngế pêi cheăng, xing xoăng inhên hnoăng ƀă séa ngăn troh tá tui lui vâ pro pơhlêh păng ‘nâng; tơdroăng má péa cho thế xo tơdroăng châ tơƀrê păng ‘nâng mê pro loăng rêk tơdroăng cheăng. Kuăn pơlê ôh tá mơnhên kăn ƀô̆ ƀă kơxô̆ rôh hôp lơ mơ-éa mê ƀă mâu tơdroăng pêi ki nhên châ tơleăng ƀă mâu tơdroăng pơhlêh ki vâi hlo nhên tung tơdroăng rêh ối’’.

Tơdroăng tơmiât kố xuân pơkâ mơ'no hnoăng cheăng ki kal khât ƀă tơdroăng pơkâ rah xo mơngế pêi cheăng: Ôh tá xê ngăn to a hồ sơ, ƀâng lơ tơdroăng pêi cheăng, mê thế ngăn a tơdroăng ki rơkê plĕng tung tơleăng mơnhên mâu tơdroăng, tơdroăng ki tơkŭm pêi pro ƀă ki tơƀrê dêi tơdroăng cheăng. Xông tơpui a rôh hôp, pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak tối nhên, pơkâ rah xo mơngế pêi cheăng athế cho tơdroăng ki pro xiâm mơngế pêi cheăng ki rơkê; ing mê, vâ rĕng 'nâi mâu ngế ki ai hiâm mơno lĕm, rơkê, loi tơngah ƀă tơdroăng ki vâ mơnhông vâ hnê mơjiâng, hnê tơ'nôm, pơtâp tro mơngế, tro tơdroăng.

“Pơkâ mơnhông mơdêk nếo dêi kong pơlê pơkâ thế khu kăn ƀô̆ ahdrối thế pơhlêh tơdroăng tơmiât pêi, troăng tơmiât, troăng pêi tung tơdroăng pơkâ nôkố. Pin ôh tá chiâng pêi tiô troăng ki klê nếo. Thế pơhlêh ó rơdêi ing pơkuâ, troh tơmiât pêi mơjiâng pêi rơkê, ing tơpui ƀă pêi pro tơdroăng pro mơ-éa rêh ối cheăng kâ ƀă tơnêi têa tơmiêt mơjiâng mơnhông mơdêk, ing troăng tơmiât hneăng cheăng ki pơkâ tê thế pơhlêh troăng tơmiêt ton xŏn tâi tâng ƀă djâ tơdroăng ki tơdjêp kơpong’’.