Hiăng châ 72 hơnăm, la cheăng tung Đảng hiăng châ 53 hơnăm, jâ Nguyễn Thị Hồng, ối a pơlê kân Quảng Phú, tơring Čư̆ Mgar, kong pơlê Dak Lak xuân ối kơhnâ khât tung hnoăng cheăng pơlê pơla. Cho kăn hnê ngăn Khu ki tro phak xua mơjo pâ tơnêi têa dêi tơring Čư̆ Mgar, jâ đi đo kơdo mơ-eăm hnê djâ, rak ngăn tơdroăng rêh ối, pêi cheăng dêi vâi kơdrâi. Nah xua rĕng lăm pêi hnoăng cheăng kăch măng a kơpong đông Đạt Lý 2, tơkéa vâ tối cho thôn 1, cheăm Hoà Thuận, pơlê kong kơdrâm Buôn Ma Thuột, kong pơlê Dak Lak nôkố, drêng jâ 19 hơnăm nah, jâ hiăng hâk mơnâ châ mot tung Đảng Kŏng san Việt Nam.

Klêi kơ’nâi tro khu xâ rup, xiăn pâm, jâ xuân ối rak vế tuăn loi kơ kăch măng. Klêi kơ’nâi tơnêi têa châ tơleăng lĕm, jâ pơtối veăng hnoăng cheăng a tơring Cư Mgar. Jâ Nguyễn Thị Hồng ai tối tiah kố:

“Tung roh tơplâ cho mâu roh ki kơneăm, khu xâ, khên rêh, khên hlâ ƀă khên pêi pro hên tơdroăng. Á veăng lăm pro kăch măng xuân hiăng châ ‘nâi, châ hlo khu pú vâi hlâ rêh xua vâ rak vế tơniăn krê, ăm tơdroăng tơ’lêi hlâu a hâi kố. Mê xuân cho ki xiâm, ivá ki vâ pro rơdêi vâ tơná pin kơdo mơ-eăm, pơtối rak vế tơdroăng ki tơhrâ plâ chal, plâ rơxông ƀă Tơnêi têa, ƀă Đảng, ƀă kuăn pơlê. Klêi kơ’nâi tơnêi têa châ tơleăng lĕm, á tâ dêi tơná xuân cho ngế ki mơhúa, ối châ rêh, ối châ ai tơdroăng ki vâ pleăng hnoăng cheăng ăm pơlê pơla, ăm tơnêi têa”.

Ƀă Thươ̆ng tă Lữ Thị Anh Đào, Phŏ Kăn bơrrô PA02, Kŏng an kong pơlê Dak Lak, vâ chê 30 hơnăm pêi ‘na tơdroăng cheăng ki mơdât khu ki ai tuăn mơno tơtrâ tơnêi têa, nâ đi đo hlê plĕng nhên hiâm mơno dêi kăch măng ƀă tuăn mơno dêi mơngế đảng viên, pêi pro klêi tơniăn mâu hnoăng cheăng châ pơcháu. Thươ̆ng tă Lữ Thị Anh Đào ai tối tiah kố:

“Kơnôm châ mâu rơxông hdrối djâ troăng, hnê hriâm, tơdrêng ƀă mâu tuăn ngôa ki rơkê xua châ hriâm a hngêi trung, châ hlê plĕng tung pơla hriâm tâp, á hlo mâu tơdroăng ki hlâ rêh, tơdroăng ki pleăng hnoăng cheăng dêi rơxông pâ pôa, mê mâu tơdroăng ki pá puih, khéa kho ki á hiăng trâm, hiăng hlo, ga ôh tá xê tơdroăng ki kŭn xo. Xua ing mê, á hiăng kơdo mơ-eăm hriâm pât dêi tuăn mơno athế kơdo mơ-eăm đi đo, pin athế kơhnâ khât, pôu râng hnoăng cheăng mê á kô chiâng pêi pro”.

Cho ngế kăn ƀô̆ hdroâng kuăn ngo, hiăng châ 39 hơnăm, nâ H’Cir Mlô, ối a cheăm Ea Đar, tơring Ea Kar hiăng ai 14 hơnăm cheăng Đảng. Hdrối nah pro Kăn pơkuâ hnê ngăn ƀuôk Sưk, cheăm Ea Đar, klêi mê, pro Kăn hnê ngăn khu vâi kơdrâi cheăm Ea Đar, hmâ ối a hnoăng cheăng ki lâi, nâ xuân pơtối mơnhông hnoăng cheăng pro kông ki tơdjêp pơla Đảng ƀă kuăn pơlê. Gum kuăn pơlê châ tơno tối dêi mâu tơdroăng ki tơmiât, tơdroăng pói vâ ki păng ‘nâng ƀă châ ai tơdroăng ki tŏng veăng, tiâ mơnhên ing khu râ kăn pá pêng, nâ H’Cir Mlô hiăng veăng gum thăm mơdêk hiâm tuăn loi tơngah, tơdroăng ki pôu râng hnoăng cheăng dêi kuăn pơlê ƀă Đảng ƀă khu kăn pơkuâ.

“Xua ai tŭm hiâm tuăn, ai tŭm tơdroăng ki rơkê, rak vế tơniăn hnoăng cheăng dêi môi ngế kăn ƀô̆ tung chal nếo, pin athế môi tuăn, ing rơná pin athế pôu râng hnoăng cheăng ki apoăng. Á loi tơngah khât a mâu troăng hơlâ, mâu hlá mơ-éa, tơdroăng pơkâ, tơdroăng hnê tơdjâ dêi Đảng ƀă tơnêi têa. Xua mê, tơdroăng ki axoăng cheăng, pơhlêh tơdroăng cheăng ki lâi, á xuân kơdo mơ-eăm vâ pêi po klêi hnoăng cheăng pá pêng pơcháu ăm i lĕm tơniăn”.

Ƀă tơdroăng ki pôu râng dêi hnoăng cheăng, tuăn mơno ki khŏm tơkâ luâ tơdroăng pá, ƀă tuăn mơno ki pêi kơhnâ khât tơdroăng cheăng ƀă Đảng, ƀă kuăn pơlê, mâu vâi kơdrâi đảng viên ki môi hiâm môi mơno prôk tiô Đảng a kong pơlê Dak Lak dế pơtối hnê tơdjâ ăm rơxông hơnăm ối nếo pơtối hvêa chêng prôk, mơjiâng pơlê pơla rế hía rế thăm kro mơdrŏng, lĕm ro.