VOV4.Xơ Đăng - Hiăng chiâng tơdroăng ki hmâ, klêi kơ’nâi pơtê Têt Lo hơnăm nếo, vâi rơtăm tung lâp tơnêi têa hiăng hbrâ rơnáu tơdroăng vâ lăm pro lêng, kring vế tơnêi têa. A kong pơlê Dak Lak, ai vâ chê 3 rơpâu ngế vâi rơtăm hbrâ lo lăm pro lêng apoăng rơnó lo hơnăm nếo Nhâm Dần, hơnăm 2022.

Tung hneăng lăm tăng rah mơngế pro lêng kố, ngoh Nguyễn Trung Sơn, 24 hơnăm, toh kơphô̆ 8, pơlê kân Quảng Phú, tơring Čư̆ Mgar, kong pơlê Dak Lak hiăng mơhnŏng chêh pro hlá đơn vâ lăm pro lêng. Sơn ai tối tiah kố: ga dế vê rơxế a tíu pêi cheăng kâ dêi tơring, rêm khế kâ tơniăn châ 7 rơtuh liăn. La ƀă tơdroăng pói rơhêng vâ lăm pro lêng ƀă hnoăng cheăng dêi tơná ƀă pơlê pơla, tơnêi têa, mê ga pơtê tơdroăng cheăng tăng liăn ngân dêi krê tơná, ga git khât kơ tơdroăng lăm pro lêng.

“Á hâk tơngăm ‘nâng drêng châ rah xo lăm pro lêng. Á kô pêi pro klêi tơniăn hnoăng cheăng dêi rơxông nếo. Á ‘nâi hdrối, lăm pro lêng cho athế rak luât kơtăng, kô xahpá, la á kơdo mơ-eăm rak vế tro tiô luât, ôh tá pro pơkheá ăm kơ mâu ngế ki hiăng veăng loi tơngah kơ á”.

Vâi rơtăm Dak Lak chêh tối dêi inâi vâ pro mô đô̆i hơnăm 2022

Drêng chêh hlá đơn lăm pro lêng, Trương Thái Hoàng, 25 hơnăm dế cho môi ngế kăn ƀô̆ Đoân droh rơtăm bêng Ea Tam, pơlê kong kơdrâm Ƀuôn Ma Thuột. Hoàng hiăng mơgêi klêi kơvâ Kinh tế, hngêi trung Đại học Tây Nguyên, xuân cho môingế đảng viên hơnăm ối nếo. Ga hiăng mơhnŏng lo lăm kring gak tơnêi têa, pêi pro tiô dêi tơdroăng ki pâ ga djâ, cho môi ngế kăn ƀô̆ lêng hiăng pơtê cheăng.

“Ƀă hnoăng cheăng cho môi ngế rơtăm hiăng klêi mơgêi hriâm đại học mê á hiăng ai tơdroăng pói vâƀă kal athế pêi pro dêi hnoăng cheăng ăm tơnêi têa, ƀă  pơlê pơla, xua mê, athế lo lăm pro lêng kring vế tơnêi têa. Tung pơla pro lêng athế rak vế luât kơtăng, pêi pro tŭm têk mâu tơdroăng ki hiăng châ pơcháu, pêi pro tơniăn hnoăng cheăng vâ drêng lo ing lêng ah, kô pêi pro lĕm tro hnoăng cheăng dêi mơngế kuăn pơlê”.

Vâi rơtăm Dak lak veăng lăm khăm hdrối pro mô đô̆i

Hơnăm 2022, kong pơlê Dak Lak châ pơcháu rah xo 2 rơpâu 977 ngế kuăn pơlê lăm pro lêng. Mâu tơring, cheăm tung kong pơlê hiăng pêi pro krâu khât tơdroăng rah xo, krếo mơngế lăm pro lêng, châ pêi pro troh hnoăng cheăng pơcháu. Mâu vâi rơtăm ki lăm pro mô đô̆i mê pơrá châ tơniăn ‘na tuăn mơno, ‘na hơnăm, ‘na ivá, ‘na tơdroăng hriâm. Tung mê, ai 60 ngế kuăn pơlê hiăng châ hriâm troh đại học, cao đẳng; 4 ngế cho đảng viên, ki ê cho đoân viên; vâi rơtăm cho hdroâng kuăn ngo châ lối tơdế. Đại tá Lê Văn Hùng, Kăn phŏ pơkuâ ngăn lêng kong pơlê Dak Lak tối ăm ‘nâi:

“Hô̆i đong ngăn ‘na cheăng lêng dêi kong pơlê hiăng pơkâ thế mâu khu râ, kơvâ cheăng pơtối mơdêk tơdroăng cheăng kal kí, pơlê pơla, khu râ ngăn cheăng Đảng tơkŭm hnê tối, mơhno khĕn ‘na luât lăm pro mô đô̆i, klêi mê, mâu hlá mơ-eá luât hnê tối dêi khu xiâm, Kuân khu, Hô̆i đong ngăn ‘na lêng râ kong pơlê troh tơkŭm tâi tâng mâu kuăn pơlê ki tro hơnăm lăm pro mô đô̆i. Tơdrêng amê, ngin xuân hiăng tơbleăng mơnhên mâu tơdroăng cheăng ki tơtro, mê cho mâu ngế ki châ ối a hngêi, ôh tá eâ lăm pro mô đô̆i, xua vâi ai tơdroăng ki ôh tá khoh lăm pro. Ing mê, kuăn pơlê, vâi rơtăm ki tro hơnăm lăm pro mô đô̆i vâi hiăng mơhnŏng chêh pro hlá đơn vâ pâ lăm pro xêh mô đô̆i”.

Troh nôkố, tâi tâng mâu vâi rơtăm ki lăm pro mô đô̆i a kong pơlê Dak Lak hiăng châ pâk tŭm vaccine hbrâ mơdât pơreăng COVID-19, ki hên, to mâu ngế ki châ pâk 3 hdroh. Tiô tơdroăng pơkâ, a kơxo hâi lơ 16/2, mâu tơring, cheăm tung kong pơlê Dak Lak kô lo lăm pro mô đô̆i, rak vế tơniăn hnoăng cheăng, xuân cho hâi ki leh mơdĭng dêi tâi tâng mâu hdroâng kuăn ngo a Dak Lak.

Tuấn Anh chêh

Nhat Lisa tơplôu ƀă tơbleăng