Djâ muăn lăm hriâm hâi apoăng a Hngêi trung Mầm non Sao Mai – Hngêi trung dêi Binh đoân 15 (Khu xiâm pơkuâ ngăn lêng) nếo diâp ăm mâu kuăn ‘nĕng cheăm Ia Krel, pôa Rah Lan Vọng ối a pơlê Ngol Le ôh tá kơtôa châ tơdroăng ki tơná sôk ro. Hngêi trung nếo lĕm, 5 kơbong ai tŭm tơmeăm, tíu pơchên kế kâ, ƀơrô hnê pơtâp ivá, plông xah hêi, gara... ai tŭm tíu vâ ăm 300 ngế hdrêng xah hêi, hriâm tâp.

Tơdrêng ƀă tơmeăm khoăng, hngêi trung ối châ hbrâ vâ chê tâi tâng tơmeăm hnê, tơmeăm xah hêi, tơdroăng púi vâ dêi vâi hdrêng mâu pơlê kơpong tơkăng kong. Pôa Rah Lan Vọng krâ pơlê ăm ‘nâi, kố ôh tá xê to tơdroăng púi vâ dêi mâu vâi o mê cho dêi tá mâu ngế hiăng kân, xua kô hmiên tuăn pơtroh dêi kuăn vâ hmiân tuăn pêi cheăng, veăng rak tơniăn kơpong tơkăng kong:

“Hngêi trung krúa, lĕm, kuăn cháu ngin châ kâ, hriâm tơniăn, châ hriâm troh tui lui, xo ah hmôi xông kân hdrah hăng ai cheăng pêi kô pêi cheăng pơxúa ăm tơnêi têa. Ngin hâk ro ƀă loi khât a Đảng ƀă Tơnêi têa, xua kuăn pơlê tơmâng khât, tơmâng troh kuăn cháu, tơtro khât ƀă tơdroăng rêh ối dêi kuăn cháu xo ah hmôi”.

Ôh tá xê to a Ia Krêl, a 7 to cheăm Ia Mơ, Ia Puch, Ia Pnôn, Ia Nam, Ia Dom, Ia Chia ƀă Ia O, kong pơlê Gia Lai hiăng pơxiâm pêi tơdroăng tơkêa pro Hngêi trung phôh thông hnê kuăn ngo ai tíu kâ koi ki pơtối râ Má môi ƀă Má péa ki ai hên 212 to lâm, tâi tâng kơlo ‘no liăn mơjiâng pro 1.516 rơtal liăn. Tiô vê hdró, mâu hngêi trung châ mơjiâng tơdâng tơ’mô ƀă ai tŭm khu kơvâ cheăng ƀă tơmeăm khoăng kih thuât, pro tíu hriâm tâp tơniăn ăm lối 7.000 ngế hok tro, ki hên cho kuăn ‘nĕng kuăn ngo. Pôa Rơ Châm Lan Thúy, hok tro lâm 8D Hngêi trung râ Má péa Phan Bội Châu (cheăm Ia Nan) tối:

“Á sôk xo ‘nâng xua nôkố á châ hriâm 2 xôh môi hâi. Hngêi trung ai tŭm mâu veăng hriâm, thái cô, veăng pơchuât hlá mơ-éa, akô châ xah hêi ro ƀă veăng mâu tơdroăng hriâm thí nghiệm hóa học, vật lý, ối châ kâ kơhâi dế, hlâu kơ nôu pâ ôh tá êa lăm chơ chiân xo vêh”.

Nôkố, Gia Lai ai vâ chê 200.000 ngế hok tro kuăn ngo dế hriâm a mâu râ hriâm, ki hên cho kuăn ‘nĕng mơngế Jarai, Bơhnéa, Hrê... Pôa Phạm Văn Nam - Ngế pơkuâ ngăn Hnê hriâm ƀă Hnê mơjiâng tuăn ngôa rơkê ăm ‘nâi vâ mơdêk tơdroăng hnê hriâm ƀă hriâm a kơpong kuăn ngo ƀă kơpong tơkăng kong, kong pơlê dế rơtế ƀă pê klêi mâu hngêi trung hriâm hlối mơjiâng luât tơtro ăm mâu thái cô, tơniăn tơtro tơdroăng rêh ối cheăng kâ krê xêh dêi cheăm kong pơlê.

Tơdrêng amê, la ngiâ kô ah, Khu xiâm kô pơtroh ăm Hô̆i đong Kuăn pơlê dêi kong pơlê pơkâ luât tŏng gum mâu hok tro kơpong kơtiê xơpá; hlối ‘mâi hơ’lêh luât tŏng gum thái cô vâ hmiân tuăn  pêi cheăng ton hơnăm ƀă kơpong hơngế, hơngo. Tơdrêng ƀă troăng hơlâ pơkâ, kong pơlê xuân dế tơbleăng tơdroăng Tơkêa bro mơdêk tơƀrê tơdroăng hnê dêi Hngêi trung phôh thong hnê kuăn ngo ai tíu kâ koi ối pơtê ƀă kâ koi ối pơtê kơhâi dế pơla hơnăm 2025-2030, vâ pơtối rak kơxô̆ ƀă po rơdâ rôh hriâm tâp ăm hok tro kơtiê, vâ chê kơtiê.

“Kố cho troăng hơlâ ki kân dêi Đảng ƀă Tơnêi têa tung tơdroăng mơdêk hlê plĕng, hnê hriâm, ăm hriâm tơ’nôm vâ ai mơngế pêi cheăng rơkê a cheăm bêng kong pơlê, malối mơngế pêi cheăng a kơpong kuăn ngo, kơpong tơkăng kong. Ing mê, kô mơdêk ki tơƀrê tơdroăng cheăng kal kí a cheăm bêng, ‘mâi mơnhông luât pơkâ tŏng gum mâu kuăn ngo, pơtối rak ki môi tuăn tơrŭm dêi rơpó, rak tơniăn ƀă hơniâp lĕm kơpong tơkăng kong”.

Mâu hngêi trung lĕm krúa a kơpong kuăn ngo rêh ối ƀă a tíu tơkăng kong ăm hlo Đảng ƀă Tơnêi têa pin hiăng tơmâng khât tơdroăng tŏng gum ‘na hnê hriâm ăm kơpong xơpá. Kố cho tíu tơngah krá kak kum vâi o hdroâng kuăn ngo châ hriâm tŭm, veăng ‘no hnoăng mơjiâng kơpong tơkăng kong rế ton rế tơniăn, mơnhôk tơƀrê krá ton a kong pơlê Gia  Lai.