Vi ƀan kong pơlê Gia Lai nếo tơbleăng pơkâ môi tuăn Kŏng ti pêi cheăng tiô rơnó môi khu Mơ’no liăn cheăng ƀă pơkuâ toăng hngêi (Ai-ơn Khom-plèks) Ion Complex, Pơlê kong kân Hà Nội cho khu mơ’no liăn cheăng pêi pro tơdroăng Tơkêa bro Plông golf Đak Đoa, ƀă tâi tâng kơxô̆ liăn mơ’no lối 1.150 rơtal liăn.

Tơdroăng tơkêa bro Plông golf Đak Đoa châ pêi pro a Kơpong ki hên tơmeăm a Đak Đoa, tung pơla pêi pro sap ing pái khế apoăng hơnăm 2026 troh pái khế mơ’nui hơnăm 2029, hâi khế pro tung 50 hơnăm.

Vi ƀan kong pơlê Gia Lai pơcháu Khu pơkuâ ‘na pêi chiâk deăng ƀă Kong prâi pơkuâ séa ngăn, pêi pro mâu mơ-éa pơcháu tơnêi, ăm mung tơnêi tro pơkâ luât; tơdrêng amê, tơrŭm ƀă Khu pơkuâ liăn ngân mơnhên ki kơnâ tơmeăm khoăng ƀă tơnêi, tung mê ai ƀăng kong loăng hngó ƀă mâu kơxô̆ liăn ki tơdjâk ki khu mơ’no liăn cheăng hiăng nâp liăn drêng châ rah xo drêng há yă. Mâu khu, kơvâ cheăng ki tơdjâk ƀă Vi ƀan cheăm Đak Đoa ai hnoăng tơrŭm, séa ngăn, hnê mơhno khu mơ’no liăn cheăng pêi pro tŭm mâu mơ-éa ‘na mơ’no liăn cheăng, tơnêi tơníu, mơjiâng pơlâ pêi, rak vế kong prâi, hbrâ mơdât on chếo, tơniăn gâk kring.