VOV4.Xơ Đăng - Pơtối tơdroăng dêi rôh hôp má 16, kơxo lơ 11/10, Vi ƀan pơkuâ Kuô̆k hô̆i ăm veăng hnê tối a mâu tơdroăng tối tơbleăng dêi Chin phuh ‘na tơdroăng pêi pro tiô pơkâ mơnhông cheăng kâ- rêh ối hơnăm 2022 ƀă hbrâ liăn ngân tơnêi têa. Hơnăm 2022 tơdroăng pêi pro tiô pơkâ mơnhông cheăng kâ - rêh ối kố châ luâ 14/15 tơdroăng pơkâ tâng vâ pơchông ƀă tơdroăng pơkâ dêi Kuô̆k hô̆i pơcháu, tung mê mơdêk cheăng kâ riân dâng 8%, luâ tơdroăng pơkâ 6-6,5%, pro xiâm ki kal ăm mâu hơnăm pơtối pêi mâu pơkâ mơnhông cheăng kâ dêi pơkâ 5 hơnăm 2021- 2025.

Tung hơnăm 2023, tiô tối tơbleăng, tơdroăng cheăng kâ dêi lâp plâi tơnêi, tung tơnêi têa ai rôh, tơ’lêi hlâu ƀă xơpá, pơloăng mơnúa la tơdroăng ki xơpá pơloăng mơnúa mê hên tâ, malối ƀă tơdroăng pơkuâ cheăng kâ kân. Xua mê, Chin phuh pơkâ pêi pơtối mâu tơdroăng rak tơniăn cheăng kâ kân, séa ngăn liăn ôh tá kơnâ, mơdêk cheăng kâ, tơniăn tơdâng tơ’mô kân dêi tơdroăng cheăng kâ. Pêi kơtăng ƀă mơdêk rĕng ki tơ ƀrê, Tơdroăng ‘mâi mơnhông ƀă mơdêk cheăng kâ rêh ối, 3 tơdroăng pơkâ dêi tơnêi têa: mơjiâng thôn pơlê nếo mơnhông cheăng kâ rêh ối kơpong hdroâng kuăn ngo ƀă kong ngo ƀă kơdroh kơklêa xăm kơtiê krá tơniăn.

VOV Tây Nguyên/Tơplôu: Gương