VOV4.Xơ Đăng - Kơxo kố, a hngêi Kuô̆k hô̆i, Vi ƀan pơkuâ Kuô̆k hô̆i tơkŭm po kơ-êng ƀă tiâ rơkong kơ-êng dêi kăn teăng mâ Kuô̆k hô̆i ƀă 2 ngế kăn xiâm tung Chin phuh. Hdrối roh kơ-êng, kuăn pơlê loi tơngah hên klêi kơ’nâi roh kơ-êng Chin phuh ai troăng hơlâ tơtro, tơniăn yă têa châu, têa kơxăng tung la ngiâ xuân môi tiah ai troăng mơdât tơdroăng pro pơxúa ăm dêi tơná tung tơdroăng ‘na yă tung roh tơbriât yă tơnêi. ‘Na hrik chuâ kơhleăng têa châu têa kơxăng, tê têa châu têa kơxăng; tơdroăng pơkuâ yă têa châu têa kơxăng tung pơla kố nah cho 1 tung 2 khu tơdroăng châ Vi ƀan pơkuâ Kuô̆k hô̆i rah vâ tơkŭm kơ-êng pôa Nguyễn Hồng Diên, Ngế xiâm pơkuâ Kơmăi kơmok-tê mơdró.

Pôu râng hnoăng ƀă troăng mơdât tơdroăng pro pơxúa tơdroăng há yă tung mâu roh tơbriât há yă tơnêi ƀă kơlo hluâ ki kơnâ dêi kơchơ tê mơdró vâ mơdêk yă tơnêi mâu kơpong achê to a’ngêi vâ pro pơxúa ăm krê tơná ƀă hía hé cho môi tung mâu tơdroăng xiâm châ Khu pơkuâ cheăng Kuô̆k hô̆i rah xo kơ-êng ƀă pôa Trần Hồng Hà, Ngế xiâm pơkuâ tơnêi tơníu, loăng pơlái kong kế ƀă kong prâi.

Roh kơ-êng châ tơkŭm po a Hngêi hôp kân Diên Hồng, Hngêi Kuô̆k hô̆i ƀă mơ’no tơdrêng tung um tơvi ƀă 63 Khu râ kăn teăng mâ Kuô̆k hô̆i a mâu kong pơlê, pơlê kong kơdrâm ối tung tơnêi têa.

A Sa Ly tơplôu ƀă tơbleăng