VOV4.Xơ Đăng - Pơtối rôh hôp má 9, hâi lơ 14/3, ăm rơkong veăng tơpui tối ‘na klêi kơ’nâi pêi pro hnoăng cheăng khế 2/2022, Vi ƀan pơkuâ Kuô̆k hô̆i pơkâ thế Chin phuh, Ngế pro xiâm hnê ngăn Chin phuh tơmâng ngăn, pơkâ thế kơdroh tơdroăng ki ‘’kâ tiô’’ yă têa châu têa kơxăng vâ pơxúa ăm dêi tơná. Kuăn pơlê mơnhên tối khât tung rôh hôp teăm tơdrêng dêi Kuô̆k hô̆i hlo tơdroăng ki yă têa châu, têa kơxăng pơtối to yă, tơdjâk kân troh tơdroăng cheăng kâ, rêh ối dêi kuăn pơlê. Tơdroăng ki yă têa châu, têa kơxăng pơtối to kơnâ hlối pro hên kế tơmeăm, tê mơdró, kơxô̆ liăn ‘no hrê ki ê tâk pro tơdroăng rêh ối, cheăng kâ kuăn pơlê trâm pá.

Vi ƀan pơkuâ Kuô̆k hô̆i pơkâ thế Chin phuh pơkâ thế Khu ngăn cheăng kơmăi kơmok ƀă tê mơdró, Khu xiâm rak liăn ngân ƀă mâu khu xiâm, kơvâ cheăng ki ai tơdjâk ai troăng hơlâ pơkâ rak ngăn, séa ngăn tơƀrê yă tê kế tơmeăm, tê mơdró drêng pêi pro ‘mâi rơnêu yă têa châu têa kơxăng, kơdroh tơdroăng ‘’kâ tiô’’ yă têa châu têa kơxăng môi tiah nôkố vâ pro pơxúa ăm dêi tơná; tơmâng ngăn, ai troăng hơlâ tŏng kum ăm kuăn pơlê ƀă khu mơdró kâ.

Katarina Nga tơplôu ƀă tơbleăng