VOV4. XơĐăng - Pơtối rôh hôp má 9, kơxo lơ 23/3, a Hngêi Kuô̆k hô̆i, Vi ƀan pơkuâ Kuô̆k hô̆i ăm rơkong tơpui ‘na kơxop hlá mơ-éa Luât Pêi pro tơniăn krê a cheăm, bêng, pơlê kân. Ki rơhêng vâ tối, kơxop hlá mơéa luât rôh kố hiăng po rơdâ pêi pro tơniăn krê a kơ koan, tíu pêi cheăng; tơdrêng amê hlối ‘mot tơ’nôm tơdroăng pơkâ Séa ngăn kuăn pơlê chiâng pơkâ kơxop hlá mơ-éa pêi pro tơniăn krê a cheăm, tơring, rak vế ivá cheăng tơnêi têa ‘na Kuăn pơlê, tối nhên hiâm mơno dêi Tơnêi têa dêi Kuăn pơlê, xua Kuăn pơlê, xua vâ kum kuăn pơlê.

Tơdroăng ki nếo dêi kơxop hlá mơ-éa Luât cho ‘mot tơ’nôm tơdroăng pơkâ rêm ngế kuăn pơlê pơrá tơdâng tơ’mô, ôh tá chiâng pơrah tung tơdroăng ki pêi pro tơniăn krê a cheăm, tơring; pơkâ nhên hnoăng ƀă tơdroăng cheăng dêi kuăn pơlê, kăn ƀô̆, kông chưk, mâu ngế pêi cheăng tung pêi pro tơniăn krê a cheăm, tơring, tung mê ‘mot tơ’nôm pơkâ ‘na hnoăng pơcháu pêi pro tơniăn krê a cheăm, tơring, hnoăng ki pơsăm tối, pơsăm tơkêng, tơbleăng mâu tơdroăng ki pro xôi luât ‘na pêi pro tơniăn krê a cheăm, tơring.

Katarina Nga tơplôu ƀă tơbleăng