VOV4.Xơ Đăng - Kơxo kố, a Hngêi Kuô̆k hô̆i, Vi ƀan pơkuâ Kuô̆k hô̆i pơtối po rôh hôp má 9. Tung rôh hôp rôh ki má 2 kố, Vi ƀan pơkuâ Kuô̆k hô̆i pêi cheăng tung 3 hâi. Ki rơhêng vâ tối, Vi ƀan pơkuâ Kuô̆k hô̆i kô séa ngăn, tơbleăng tơdroăng pơkâ ‘na kơlo nâp hnoăng liăn mơhá rak vế ‘na têa châu têa kơxăng troh tâi hâi lơ 31/12/2022. Hâi lơ 13/3 kố nah, Chin phuh hiăng tơbleăng kơxop hlá mơéa ‘na kơlo ki nâp hnoăng liăn mơhá rak vế têa châu têa kơxăng troh tâi hâi lơ 31/12 vâ pơtroh ămVi ƀan pơkuâ Kuô̆k hô̆i tơbleăng.

Tiah mê, tiô tối hdrối kơlo nâp hnoăng liăn mơhá rak vế têa châu têa kơxăng ai 2 rơpâu liăn tung môi lit; têa châu disel, têa châu mazut, têa nhơk ai 1 rơpâu liăn tung môi lit; rơmâ nhơk ai 1 rơpâu liăn tung môi kg; têa châu têk on ai 700 liăn tung môi lit.

Tung kơxo kố, Vi ƀan pơkuâ Kuô̆k hô̆i ăm rơkong veăng tơpui tối ‘na tơdroăng ki tơpui leăng, tơmâng, ‘mâi rơnêu 2 kơxop hlá mơéa Luât, mê cho: Luât Tê mơdró [aoh hiêm ki ‘mâi hơ’lêh ƀă Luât pro phim ki ‘mâi hơ’lêh; ăm rơkong veăng tơpui tối ‘na kơxop hlá mơ-éa pơkâ dêi Kuô̆k hô̆i pơkâ pro tíu tơkŭm po pêi cheăng, hnê cheăng ăm mâu ngế ki kroăng phak ki ối kroăng tung hngêi phak.

Katarina Nga tơplôu ƀă tơbleăng